Toro Voleka Vua na Kalou
“E Savasava, e Savasava, e Savasava o Jiova”
NA VOSA cava mada o na digia me vakamacalataka vinaka se Kalou vakacava o Jiova? Ena ikawalu ni senitiuri B.S.K. a raivotutaka na parofita o Aisea ni rogoca na nodra vakalagilagi Jiova na kabula vakayalo, nira vakayagataka na vosa e kilaitani kina oya na savasava. Na ka e raica o Aisea kei na ka e rogoca me uqeti keda meda vakalagilagi Jiova qai vakavolekati keda vua. Ni o wilika na Aisea 6:1-3, raitayaloyalotaka ni o tiko sara ga kina.
Na cava e raica o Aisea? “Ka’u a raica na Turaga [Jiova] ni sa tiko e nai tikotiko vakaturaga, sa cecere ka toka sara ki cake,” e tukuna o Aisea. (Tikina e 1) A sega ni raica dina o Aisea na Turaga Cecere o Jiova. E sega ni dua na tamata e raica rawa e dua na kabula vakayalo. E tukuna vakamatata na iVolatabu: “E sega ni dua na tamata e se bau raica na Kalou.” (Joni 1:18) A raivotu ga o Aisea.a E tarai koya vakalevu na ka e raivotutaka, e vaka sara ga ni raici Jiova dina.
Sa qai raivotutaka tarava o Aisea e dua na ka e sega ni se bau raica e dua na tamata. A vola: “Era sa tu ecake vua [Jiova] ko ira na serafimi: sa yaono na tabadratou; e rua sa tabonaka kina na matana, e rua sa tabonaka kina na yavana, ka rua sa vuka kina.” (Tikina e 2) Era kabula vakayalo cecere na serafimi. O Aisea ga na dauvola iVolatabu e vakamacalataki ira na serafimi. Era tu vakarau mera lako ra qai cakava na ka e vinakata o Jiova. Era tabonaka na matadra kei na yavadra me ivakaraitaki ni nodra doka na Kalou, e itavi dokai tale ga na nodra qaravi koya.
E tarai Aisea vakalevu na ka e raica kei na ka e rogoca. Era lewena na serafimi e dua na matasere vakalomalagi ra qai tabalaka na domodra ena sere. E vola o Aisea: “Era kacivaka: ‘E savasava, e savasava, e savasava o Jiova na iliuliu ni mataivalu vakalomalagi.’ ” (Tikina e 3, NW) Na vosa vakaIperiu e vakadewataki tiko qo me “savasava” e vosa veiwekani kei na tawacala se sekavula. E okati tale ga kina “na vakasama ni galala kei na wasei tani mai na ivalavala ca.” Era rairai camana na sere qori na serafimi nira lagata vakatolu na “savasava” me vakabibitaka ni uasivi duadua na savasava i Jiova. (Vakatakila 4:8) Na savasava e dua na ka e kilaitani kina o koya. E nona bula sara ga o Jiova na savasava, na ka kece baleti koya e dodonu qai sega ni vakamelei rawa.
Na noda kila ni savasava o Jiova me uqeti keda meda toro voleka vua. Na vuna? O Jiova e tawacala, e uasivi ira kina na iliuliu vakatamata nira dau veidabui qai voravora. Na nona savasava e vakadeitaka vei keda ni Tama vinaka duadua, iLiuliu yalododonu, qai Turaganilewa tawaveitovaki. Meda nuidei ni nona bula sara ga na Kalou na savasava, e rawa nida vakanuinui vakatabakidua vua.
Wili iVolatabu e Vakatututaki ena Tiseba:
[iVakamacala e ra]
a E kaya na Insight on the Scriptures: “Ni vakatakila na Kalou na raivotu vua e dua ni yadra tu, kena irairai ni yadra vinaka sara tu ga na nona vakasama. Ena dua na gauna e muri, o koya e raivotu e rawa ni qai nanuma lesu, vakamacalataka, se volatukutukutaka ena nona vosa ga.”—Tabaka na iVakadinadina i Jiova.
[Tikina bibi ena tabana e 26]
Na noda kila ni savasava o Jiova me uqeti keda meda toro voleka vua