Eparama​—Na Turaga Vakabauta

E duri toka e tautuba o Eparama ena bogi ni vakanomodi tu na vanua. Ni dagava na serau ni kalokalo, e vakasamataka sara na yalayala ni Kalou ni na vaka na levu ni kalokalo na nona kawa. (Vakatekivu 15:5) Ni raica o Eparama na kalokalo, ena nanuma lesu na vosa ni yalayala i Jiova qai vakadeitaka vua ni na yaco dina. Ke tu vei Jiova na kaukaua me bulia na lomalagi, na vuravura kei na ka kece e tu kina, e rawa tale ga ni vakavuna na nodrau vakaluveni o Eparama kei Sera. E va sara ga qori na dei ni vakabauta i Eparama.

NA CAVA NA VAKABAUTA? Na “vakabauta” e cavuti ena iVolatabu e dusia na kena vakabauti dei e dua na ka e sega ni laurai, ia e tiko na kena ivakadinadina. O koya e vakabauta na Kalou e kila ni na vakayacora na nona yalayala, na dei ni nona vakabauta qori e vaka ga nira sa vakayacori oti.

A VAKARAITAKA VAKACAVA O EPARAMA NA VAKABAUTA? A laurai sara ga ena ka e cakava ni vakabauta na yalayala ni Kalou. Ena nona vakabauta, a biuta o Eparama na vanua a sucu kina ni nuidei ena dina o Jiova ina nona yalayala me lai vakatikori koya ena dua tale na vanua. A veilakoyaki voli ena vakabauta ena vanua o Kenani ni nuidei era na taukena dina na vanua oya na nona kawa. A vakabauta tale ga o Eparama ke talairawarawa me cabori Aisake me isoro, ena vakaturi Aisake o Jiova ke vinakata.​—Iperiu 11:8, 9, 17-19.

A vakanamata o Eparama ena veigauna se bera mai, sega ni vakasamataka na veigauna sa oti. A totoka na bula erau rairai marautaka tu mai Uri o Eparama kei Sera ni vakatauvatani kei Kenani, ia “erau sega ni nanuma tiko ga na vanua erau sa biuta mai.” (Iperiu 11:15, Today’s English Version) Erau vakasamataka ga na nona vakalougatataki rau na Kalou kei na nodrau kawa ena veigauna se bera mai.​—Iperiu 11:16.

A yavutaki vinaka na vakabauta i Eparama? Io, a vakayacora kece o Jiova na nona yalayala. A qai levu dina na kawa i Eparama lai tauyavu kina na matanitu o Isireli. Toso na gauna, era qai tawana na Isireli na vanua o Kenani me vaka ga a yalataka o Jiova vei Eparama.​—Josua 11:23.

NA CAVA EDA VULICA KINA? Meda nuidei ni na vakayacora o Jiova na veika e yalataka. Ena rai vakatamata eso na yalayala qori e nanumi ni na sega ni rawa ni yaco, ia eda nuidei ni “rawarawa vua na Kalou na ka kece.”​—Maciu 19:26.

Eda vulica ena ivakaraitaki i Eparama meda vakasamataka ga na veika totoka ena veigauna se bera mai, sega ni veika sa oti. Qori na ka e vulica o Jason me cakava. E tauvi koya e dua na mate e vakamalumalumutaki koya qai paralasi kina. E kaya o Jason: “Eso na gauna au dau nanuma lesu na veika sa oti.” E tomana: “Eso sara ga na ka lalai e dau vagalilitaki au me vaka na noqu mokoti Amanda na watiqu.”

A vakabauta dina o Jason ni na vakayacora na nona vosa ni yalayala o Jiova, qori e wili kina na kena sa vakarau parataisi na vuravura, kei na nodra uasivi ra qai bula tawamudu o ira era yalodina.a (Same 37:10, 11, 29; Aisea 35:5, 6; Vakatakila 21:3, 4) E tukuna o Jason: “Au dau vakasamataka ni sa tu qo e matada na gauna totoka. Sa voleka sara ni oti na nuiqawaqawa, lomaocaoca, na rarawa, kei na ca ni lomada​—sa na oti vakadua.” A vakatotomuria vinaka o Jason na vakabauta i Eparama!

[iVakamacala e ra]