Taro na Dauwiliwili

E rawa ni vakasivoi e dua na lotu vaKarisito ke vakamatauni koya ena sara iyaloyalo ca?

▪ Io, e rawa. Qori na vuna e bibi kina meda kua sara ga ni raica na iyaloyalo ca, ke mani volai se tabaki ena mekesini, iyaloyalo, vidio kei na Internet.

E takalevu tu ena veiyasai vuravura na iyaloyalo ca. Sa qai vakarawarawataka ga na kena saravi na iyaloyalo ca na Internet, qori na vuna e tubu tiko ga kina na kedra iwiliwili na sarava. Eso mada ga na gone kei na qase era sega ni nakita na nodra raica na iyaloyalo ca ena Web site. Eso tale era nakita mera raica, ra qai sega ni lomaleqa baleta ni rawa nira sarava lo ena nodra vale se ofisi. Na cava e rerevaki kina vei keda na lotu vaKarisito na saravi ni iyaloyalo ca?

E sauma vakamatata qori o Jisu ena nona ivakasala: “O koya e vakaraica tiko ga na yalewa ena nona garosa, e sa veibutakoci oti kei na yalewa ya e lomana.” (Maciu 5:28) E macala ga ni savasava qai vakamarautaki rau na veiwatini na nodrau veiyacovi. (Vkai. 5:15-19; 1 Kor. 7:2-5) Ia e sega ni va qori na inaki ni sara iyaloyalo ca, e uqeta ga na veiyacovi dukadukali kei na vakasama vakasisila. Qori na itovo e veivakasalataki kina o Jisu meda qarauna. E veisaqasaqa sara ga kei na ivakaro vakalou na wiliki kei na saravi ni iyaloyalo ca: “O koya gona, moni vakamatea na gagadre ni veitikiniyagomuni vakavuravura, na veidauci, na ivalavala tawasavasava, na garogaro, na gagadre ca, kei na kocokoco ni okati me qaravi matakau.”​—Kolo. 3:5.

Vakacava ke raica ga vakadua se vakarua na iyaloyalo ca e dua na lotu vaKarisito? Ena tautauvata sara ga kei na ituvaki e sotava na daunisame o Esafa ena nona tukuna: “Ia koi au, sa voleka ni lako sese na yavaqu; sa voleka ni tidara na noqui lakolako.” Ena rawa vakacava me veiyaloni kei na Kalou e dua na lotu vaKarisito qai savasava na nona lewaeloma ke raica na itaba ni yalewa se tagane luvawale, se na nodrau veiyacovi e dua na veiwatini? De dua ena vakataki Esafa: “Ni’u sa yaviti tiko e na siga ka bogi, ka cudruvi e na mataka kecega.”​—Same 73:2, 14.

Ke sarava tiko ga e dua na lotu vaKarisito na iyaloyalo ca, e bibi me dikevi koya tale, me qara tale ga na veivuke vakayalo. E rawa ni kerea na nodratou veivuke na qase ni ivavakoso: “Ke dua e sega ni liaca ni sa butucala tiko, ni saga o kemuni na rawata na ivakatagedegede vakayalo moni vakadodonutaki koya ena yalomalua.” (Kala. 6:1) E rawa ni veivuke e dua se rua na qase, qai ‘masulaki ena vakabauta me rawa ni vakabulai kina o koya e tauvimate, me vosoti tale ga na nona ivalavala ca.’ (Jeme. 5:13-15) Nira vukei mera muduka na sara iyaloyalo ca era na vakila kina na kena yaga baleta ni sa vinaka na nodra veiwekani kei Jiova, me vaka a cakava o Esafa.—Same 73:28.

Ia e tukuna o Paula ni so era sega ni veivutunitaka na “nodra ivalavala tawasavasava, nodra veidauci, kei na ivalavala vakasisila.”a (2 Kor. 12:21) Ena vakadewa vaKirisi ni vosa “tawasavasava,” e tukuna kina o Parofesa Marvin R. Vincent ni tiko kina “na vakasama ni ka dukadukali me baleta na ivalavala vakasisila.” Ia e rarawataki ni tiko eso tale na ka e vakasisila sara mai na itaba ni luvawale se nodra veiyacovi na tagane kei na yalewa. Qori na veiyacovi vakamataqali vata, veiyacovi vakailawalawa, veiyacovi kei na manumanu, nodra vaqaseni na gone, kucu vakailawalawa, vakalolomataki na yalewa se vesu e dua qai vakayacori vua na ivalavala torosobu. Ena gauna i Paula, eso e “butobuto nodra vakasama,” era “sega tale ni qai kila na madua, era soli ira kina ina veimataqali ivalavala vakasisila mera vakaitavi ena ka kece e tawasavasava ena levu ni nodra kocokoco.”​—Efeso 4:18, 19.

E cavuta tale ga o Paula na “ivalavala tawasavasava” ena Kalatia 5:19. E tukuna e dua na daunivuku ni Igiladi ni vosa tawasavasava e cavuti qori “e dusia vakalevu na ivalavala e sega ni vakatamata.” Era vakabauta kece na lotu vaKarisito ni vakasisila na iyaloyalo ca kece eda sa veivosakitaka mai, e uqeta tale ga na gagadre dukadukali e sega ni vakatamata. E qai tinia o Paula ena Kalatia 5:19-21 “ni o ira na cakava na” ka tawasavasava “era na sega ni rawata na matanitu ni Kalou.” Ke dua e vakamatauni koya ena sara iyaloyalo ca, de dua e vakayacora tiko ena loma ni dua na gauna, qai sega ni veivutuni, ena sega ni ganiti koya me lewe ni ivavakoso vaKarisito. E veiganiti ga me vakasivoi me rawa ni savasava tiko ga na ivavakoso, me taqomaki tale ga kina.​—1 Kor. 5:5, 11.

Eda marau ni so era dau sara iyaloyalo ca era kerea na nodra veivuke na qase mera cakava kina na veiveisau ena nodra bula. E uqeti ira kina na lotu vaKarisito e Sariti o Jisu: “Mo vakaukauataka tale ga na ka sa vakarau mate . . . mo nanuma tiko ga na ka e soli vei iko, o rogoca tale ga, mo muria tiko ga, mo veivutuni. Ia ke o sega ni yadra . . . o na sega sara ga ni kila na aua au na lako yani kina.” (Vkta. 3:2, 3) E rawa nida veivutuni da qai yawaka na rerevaki ni sara iyaloyalo ca.​—Juta 22, 23.

Ena yaga vei keda na noda sega ni via tovolea na ka rerevaki qori. Meda vakadeitaki mada ga meda kua ni sarava na iyaloyalo ca kece ga.

[iVakamacala e ra]

[Tikina bibi e 30]

Ke sarava tiko ga e dua na lotu vaKarisito na iyaloyalo ca, e bibi me dikevi koya tale, me qara tale ga na veivuke vakayalo