Meda Vakavotuya na Lagilagi i Jiova

“Eda vaka na iloilo ena noda vakavotuya na lagilagi i Jiova.”​—2 KOR. 3:18.

O NA SAUMA VAKACAVA?

Nida sucu ivalavala ca, e rawa vakacava nida vakalagilagia na Kalou?

Ena yaga vakacava na masu kei na noda tiko ena soqoni meda vakavotuya kina na lagilagi ni Kalou?

E rawa vakacava meda vakalagilagi Jiova tiko ga?

1, 2. Na cava e rawa kina nida vakatotomuria na itovo i Jiova?

E RAWA ni tukuni nida vakataki ira na noda itubutubu ena so na ka eda dau cakava. Sa rauta mera dau kaya eso vua e dua na gonetagane, ‘O ucui tamamu sara ga.’ Ena rairai tukuni vua e dua na goneyalewa, ‘O ucui tinamu sara ga.’ Era dau vakatotomuria vinaka na gone na ka era raica vei ira nodra itubutubu. Vakacava o keda? Eda rawa ni vakatotomuria na Tamada vakalomalagi o Jiova? E macala nida sega ni raici koya, ia eda rawa ni kila na nona itovo talei nida wilika na nona Vosa, sarava na nona ibulibuli, da qai vakasamataka vakatitobu na iVolatabu. Vakabibi na noda vakasamataka na ka e tukuna kei na ka e cakava na Luvena o Jisu Karisito. (Joni 1:18; Roma 1:20) Nida cakava qori sa qai rawa meda vakavotuya na lagilagi i Jiova.

² A kila na Kalou nida rawa ni vakayacora na lomana, vakatotomuria na nona itovo, da qai vakalagilagi koya ni bera mada ga ni buli Atama kei Ivi. (Wilika Vakatekivu 1:26, 27.) Nida lotu vaKarisito eda vinakata meda vakatotomuria na itovo ni Kalou. Ke da cakava qori sa da vakaraitaka tiko nida rawa ni vakavotuya na lagilagi ni Kalou se mani matatamata cava eda cavutu mai kina, itovo vakavanua se ivakatagedegede ni vuli eda yacova. Na vuna? Ni “sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”​—Caka. 10:34, 35.

3. Na cava ena vakila na lotu vaKarisito e qaravi Jiova?

³ Era vakavotuya na lagilagi i Jiova na lotu vaKarisito lumuti. E dua vei ira qori na yapositolo o Paula a qai vola: “O keda kece ni sega ni ubi na matada, eda vaka na iloilo ena noda vakavotuya na lagilagi i Jiova, e laurai vei keda na iyaloyalo vata ga oya mai na dua na lagilagi ina dua tale e uasivi.” (2 Kor. 3:18) A tukuna tiko o Paula na serau ni kuli ni matai Mosese ena nona vosa vua o Jiova ni lesu mai ena ulunivanua o Saineai qai kauta mai e rua na vatu e volai kina na Vunau e Tini. (Lako 34:29, 30) Ena sega sara ni serau na kuli ni matadra na lotu vaKarisito, ia e laurai ga na nodra marau nira tukuna vei ira tale eso na veika me baleti Jiova, nona itovo, kei na veika totoka sa vakarautaka tu vua na kawatamata. Se da mani vakanuinui na lai bula e lomalagi se vuravura eda vaka ga na kaukamea taliva ena gauna makawa nida vakavotuya na lagilagi i Jiova ena noda bula kei na cakacaka vakaitalatala. (2 Kor. 4:1) O vakavotuya tiko na lagilagi i Jiova ena nomu itovo kei na nomu vakaitavi vakalevu ena cakacaka vakavunau?

EDA VINAKATA MEDA VAKAVOTUYA NA LAGILAGI I JIOVA

4, 5. (a) Na cava eda valuta tiko me vakataki Paula? (b) E vakaleqai keda vakacava na ivalavala ca?

⁴ Nida qaravi Jiova, eda vinakata meda dokai koya na Dauveibuli da qai vakalagilagi koya ena ka kece eda cakava. E levu na gauna eda dau cakava na veibasai ni ka eda nanuma meda cakava. E va sara ga qori na veika a sotava o Paula. (Wilika Roma 7:21-25.) A vakamacalataka o Paula na vuna meda saga kece kina meda valuta na gagadre ca ena nona vola: “Nida ivalavala ca kece, eda sega ni yacova rawa tale ga na lagilagi ni Kalou.” (Roma 3:23) Io, nida kawa i Atama e lewai keda kece na ivalavala ca, me vaka ga na nona veiliutaki e dua na ‘Tui Ca.’​—Roma 5:12; 6:12.

⁵ Na cava na ivalavala ca? Oya e dua na ka e veibasai sara ga kei na itovo i Jiova, nona ivakarau, nona ivakatagedegede, kei na nona inaki. Na ivalavala ca e vakaleqa sara ga na noda veiwekani kei na Kalou. Me vaka ga e dua na dauvana e sega ni lauta donu na takete, na ivalavala ca tale ga a vakavuna meda calata na takete. So na gauna eda nakita noda cala, so na gauna eda sega ni nakita. (Tiko 15:27-31) E kaukaua dina na ivalavala ca ni vakavuna meda sega kina ni veiriti kei na Dauveibuli. (Same 51:5; Aisea 59:2; Kolo. 1:21) O keda kece eda yawaka sara ga na Kalou, sa da sega gona ni rawata na ka e talei duadua, oya na noda rawa ni vakavotuya na lagilagi i Jiova. Na leqa levu duadua e tara tiko na kawatamata na ivalavala ca.

6. Nida sucu ivalavala ca, e rawa vakacava nida vakalagilagia na Kalou?

⁶ Eda ivalavala ca, ia ‘e vu ni noda inuinui’ na noda Kalou o Jiova. (Roma 15:13) Sa vakarautaka na isoro ni veivoli i Jisu Karisito me bokoca kina na noda ivalavala ca. Na noda vakabauta na isoro qori, eda na sega tale ni ‘bobula ina ivalavala ca,’ sa qai rawa nida vakavotuya na lagilagi i Jiova. (Roma 5:19; 6:6; Joni 3:16) Nida tomana tiko ga na noda veiwekani qori kei na Kalou, ena vakalougatataki keda nikua o Jiova da qai rawata na bula uasivi ena parataisi sa tu qo e matada. Eda se ivalavala ca tiko ga, ia eda kalougata ni kila na Kalou nida rawa ni vakavotuya na nona lagilagi!

VAKAVOTUYA NA LAGILAGI NI KALOU

7. Na cava meda kila taumada ke da via vakavotuya na lagilagi ni Kalou?

⁷ Me rawa nida vakalagilagia na Kalou, e dodonu meda kila taumada na noda malumalumu. (2 Vei. 6:36) Meda ciqoma gona ni tiko na noda malumalumu da qai saga vakaukaua meda muduka me rawa nida vakalagilagia na Kalou. Kena ivakaraitaki, ke da sikalutu ina kena saravi na iyaloyalo ca, meda kila tiko ni dodonu meda qara na veivuke vakayalo, da qai saga sara meda cakava kina e dua na ka. (Jeme. 5:14, 15) Qori na imatai sara ga ni ka meda cakava ke da vinakata dina meda vakalagilagia na Kalou. Nida sokaloutaki Jiova meda dikevi keda wasoma se da muria tiko na nona ivakatagedegede savasava se sega. (Vkai. 28:18; 1 Kor. 10:12) Se mani cava na noda malumalumu meda saga tiko ga vakaukaua meda valuta me rawa nida vakavotuya kina na lagilagi ni Kalou.

8. Eda sega ni uasivi, ia na cava meda cakava?

⁸ O Jisu duadua ga a vakayacora sara vakavinaka na loma ni Kalou qai vakavotuya na nona lagilagi, ia eda sega ni uasivi me vakataki koya. E rawa ga nida vakatotomuria na nona ivakaraitaki, ia ena vinakati kina na sasaga. (1 Pita 2:21) O Jiova e sega ni raica wale ga na veika eda sa cakava rawa meda vakalagilagi koya kina, e raica tale ga na noda sasaga qai vakalougatataka.

9. Ena dusimaki keda vakacava na iVolatabu meda vakavotuya vakavinaka kina na lagilagi ni Kalou?

⁹ Na iVolatabu e rawa ni dusimaki keda meda vakavotuya vakavinaka na lagilagi ni Kalou. E bibi gona meda vulica da qai vakasamataka vakatitobu na ka e tukuna. (Same 1:1-3) Nida wilika e veisiga na iVolatabu eda na rawa ni vakayacora kina eso na veiveisau ena noda bula. (Wilika Jemesa 1:22-25.) Ena vakaukauataka na noda vakabauta na noda vulica na iVolatabu, ena gu tale ga na lomada meda vorata na cala bibi da qai vakamarautaki Jiova.​—Same 119:11, 47, 48.

10. Ena yaga vakacava na masu meda qaravi Jiova kina vakavinaka?

¹⁰ E bibi tale ga meda ‘masu vagumatua’ ke da via vakavotuya na lagilagi ni Kalou. (Roma 12:12) Meda kerea na veidusimaki i Jiova meda qaravi koya ena sala e vinakata. Eda rawa ni kerea na veidusimaki ni yalona tabu me levu kina na noda vakabauta, me vakaukauataki keda meda vorata na veitemaki, meda ‘wasea tale ga vakadodonu na ivakavuvuli dina.’ (2 Tim. 2:15; Maciu 6:13; Luke 11:13; 17:5) Me vaka ga e dua na gone e nuitaki tamana, e dodonu tale ga meda nuitaka na Tamada vakalomalagi o Jiova. Ke da kerei koya me vukei keda meda qaravi koya vakavinaka, eda vakadeitaka ni na cakava dina qori. Meda kua ni nanuma nida vakasosani koya! Ena yasana adua, meda saga mada ga meda vakacaucautaki koya nida masu, meda vakavinavinakataki koya, da qara na nona veidusimaki vakabibi nida vakatovolei, meda kerei koya tale ga me vukei keda meda qaravi koya ena sala e vakalagilagi kina na yacana.​—Same 86:12; Jeme. 1:5-7.

11. Ena yaga vakacava na soqoni meda vakavotuya kina na lagilagi ni Kalou?

¹¹ E nuitaka na Kalou nira na maroroi ira na nona sipi na ‘dauveiqaravi yalodina e vuku.’ (Maciu 24:45-47; Same 100:3) E vinakata na dauveiqaravi yalodina meda vakavotuya na lagilagi ni Kalou. Dua na sala e cakava kina qori na noda tiko ena soqoni, qori ena vakavinakataki na noda itovo vaKarisito, me vaka ga na nona cula vakavinaka na noda isulu e dua na dauculacula me rairai vinaka nida dara. (Iper. 10:24, 25) Meda totolo gona ena soqoni, ke da dau bera sa da na calata kina eso na ivakasala yaga me vakavinakataki keda.

MEDA VAKATOTOMURIA NA KALOU

12. Eda na vakatotomuria vakacava na Kalou?

¹² E dodonu meda “vakatotomuria na Kalou” meda vakavotuya kina na nona lagilagi. (Efeso 5:1) E dua na sala eda cakava kina qori oya na noda vulica na nona rai. Ke da sega ni muria na veika e vinakata, eda sa vakaraitaka tiko nida sega ni dokai koya, eda na vakaleqai tale ga kina. E liutaka tiko na vuravura qo na vunica o Setani na Tevoro, meda saga gona vakaukaua meda cata na ka e cata o Jiova da qai vinakata na ka e vinakata. (Same 97:10; 1 Joni 5:19) Meda kila deivaki ni sala vinaka duadua ga meda qarava kina na Kalou, oya na noda cakava na ka kece me dokai kina o koya.​—Wilika 1 Korinica 10:31.

13. Na cava meda cata kina na ca? Na cava mo kua ni cakava?

¹³ E cata o Jiova na ca, e dodonu meda cata tale ga. Meda yawaka gona na veika eda rawa ni sikalutu kina ina ca. Kena ivakaraitaki, meda qarauna meda kua ni muria na nodra rai na vukitani, qori ena vakavuna meda sega ni vakalagilagia na Kalou. (Vkru. 13:6-9) Meda kua ni veimaliwai kei na vukitani se dua e kaya ni tacida ia e sega ni doka na Kalou, ke da vuvale vata mada ga. (1 Kor. 5:11) E sega ni yaga meda vakalasuya na nodra ile na vukitani se o ira era vakalewa na isoqosoqo i Jiova. Meda kua tale ga ni via kila na ka era vola se biuta ena Internet, ni rawa ni vakaleqai keda vakayalo.​—Wilika Aisea 5:20; Maciu 7:6.

14. Na cava me laurai vei keda ke da via vakavotuya na lagilagi ni Kalou, na vuna?

¹⁴ Na sala vinaka duadua eda rawa ni vakatotomuria kina na Tamada vakalomalagi na noda dauloloma. Io, meda dauloloma me vakataki koya. (1 Joni 4:16-19) Na noda veilomani mada ga eda kilai kina nida qaravi Jiova, eda tisaipeli tale ga i Jisu. (Joni 13:34, 35) Nida sucu ivalavala ca eda na sega ni loloma ena so na gauna, ia meda saga tiko ga meda dauloloma. Ke da bucina gona na loloma kei na so tale na itovo vakalou eda na sega ni caka ca se tawayalololoma.​—2 Pita 1:5-7.

15. E yaga vakacava na loloma ena noda veimaliwai?

¹⁵ Ke da dauloloma eda na via caka vinaka vei ira tale eso. (Roma 13:8-10) Kena ivakaraitaki, ke da lomani watida ena sega ni vakadukadukalitaki na noda imocemoce ni vakawati. Ke da lomani ira na qase ni ivavakoso eda na doka na nodra itavi, eda na talairawarawa vei ira da qai yalomalumalumu ena nodra veidusimaki. O ira na gone era lomani nodra itubutubu era na talairawarawa ra qai dokai ira, era na sega ni vosa vakacacataki ira. Ke da lomana e dua, eda na dokai koya, eda na sega ni vosa beca. (Jeme. 3:9) O ira tale ga na qase ni ivavakoso era lomana na sipi ni Kalou era na karoni ira vakayalololoma.—Caka. 20:28, 29.

16. E yaga vakacava ena cakacaka vakaitalatala na noda dauloloma?

¹⁶ Me laurai tale ga na noda loloma ena cakacaka vakaitalatala. Nida lomani Jiova eda na sega ni yalolailai ke sega ni via vakarorogo e dua se kauai ena ka eda tukuna, eda na vunautaka tiko ga na itukutuku vinaka. Ena uqeti keda tale ga na loloma meda vakavakarau vinaka da qai saga me laulau na noda cakacaka vakaitalatala. Ke da lomana dina na Kalou kei ira na wekada eda na sega ni raica na noda cakacaka vakavunau me dua wale ga na itavi se ka ga me caka. Ia eda na raica ga me ilesilesi dokai da qai vakayacora ena marau.​—Maciu 10:7.

VAKALAGILAGI JIOVA TIKO GA

17. Ena yaga vakacava noda kila nida sega ni yacova rawa na lagilagi ni Kalou?

¹⁷ Eda kila na revurevu ni ivalavala ca, ia e levu era lecava. Qori e dodonu me uqeti keda meda valuta na noda dui malumalumu. Noda kila na noda malumalumu ena vukei keda meda vakavulica na noda lewaeloma meda cakava kina na ka e dodonu ke tekivu buroro ena noda vakasama kei na lomada meda vakayacora na ka e ca. (Roma 7:22, 23) E tiko kece na noda malumalumu, ia e rawa ni vakaukauataki keda na Kalou meda caka dodonu ena ituvaki cava ga.​—2 Kor. 12:10.

18, 19. (a) Eda na vorati ira vakacava na timoni? (b) Na cava meda sa vakadeitaka qo?

¹⁸ Ke da via vakalagilagi Jiova e dodonu meda vorati ira na timoni. Ena vukei keda na isasabai vakayalo e vakarautaka na Kalou. (Efeso 6:11-13) E sega ni cegu o Setani ni via suguta na nona vakalagilagi o Jiova. E saga tiko ga na Tevoro me vakaleqa na noda veiwekani kei Jiova. Dua na ka na nona rarawa o Setani ni raici keda kei na milioni tale na tagane, yalewa kei na gone eda yalodina tiko ga qai vakalagilagia na Kalou, dina nida sega ni uasivi! O koya gona meda vakacaucautaki Jiova tiko ga me vakataki ira na vo ni agilosi mai lomalagi nira kaya: “E ganiti kemuni Jiova, na neimami Kalou, me nomuni na lagilagi, na vakarokoroko, kei na kaukaua, ni oni bulia na ka kece, ena nomuni lewa era bula, era buli kina.”​—Vkta. 4:11.

¹⁹ Meda vakalagilagi Jiova tiko ga se mani cava e yaco. E marau dina o koya ni levu era saga ena nodra vinaka taucoko mera vakatotomuri koya ra qai vakavotuya na nona lagilagi. (Vkai. 27:11) Meda vakataki Tevita mada ga ena nona lagata: “Au na vakavinavinaka vei kemuni na Turaga na noqu Kalou, e na yaloqu taucoko: Au na vakarokorokotaka na yacamuni ka sega ni mudu.” (Same 86:12) Eda rai vakanamata tu ena siga ena uasivi kina na noda vakavotuya na lagilagi i Jiova, da qai vakacaucautaki koya me tawamudu! Sa voleka qo mera na marautaka qori o ira na talairawarawa. O sa vakavotuya tiko na lagilagi i Jiova ena gauna qo qai vakanuinui mo na cakava qori me tawamudu?

[iYaloyalo ena tabana e 27]

Eda sa vakavotuya tiko na lagilagi i Jiova ena sala qo?