Taro na Dauwiliwili

Na cava e “talei kina ena mata i Jiova” na nodra mate na tamata yalosavasava?

▪ A uqeti na daunisame me lagata: “A ka talei e na mata i Jiova na nodra mate na nona tamata yalosavasava.” (Same 116:15) E bibi dina vei Jiova na nona bula e dua e sokaloutaki koya. Ia e sega ni vakaibalebaletaka tiko na ika116 ni Same na nona mate ga e dua.

E vinaka me kua ni vakayagataki na Same 116:15 ena vunau ni veibulu vua e dua na dauveiqaravi i Jiova, ke mate mada ga ena yalodina. Na vuna? E rabailevu na ka e vakaibalebaletaka na daunisame. E tukuna tiko ni na sega ni vakatara na Kalou mera vakawabokotaki na nona tamata yalodina.​—Raica Same 72:14; 116:8.

E vakadeitaka na Same 116:15 ni na sega ni vakatara na Kalou mera vakawabokotaki vakailawalawa o ira kece era qaravi koya. Ena keda ivolatukutuku nikua, e laurai ni sega ni vakalaiva na Kalou mera vakawabokotaki na nona tamata, nira vosota na veivakacacani kaukaua.

E sega ni vakaiyalayala na nona kaukaua o Jiova qai yaco tu ga na nona inaki, ena sega gona ni vakalaiva mera vakarusai vakailawalawa na nona tamata. Ke vakalaiva qori na Kalou ena vakaraitaka nira kaukaua cake vua na nona meca. Ena sega ni cakava qori o koya! Ena yaco tu ga inaki i Jiova oya mera tawana na vuravura o ira era yalodina vua. (Aisea 45:18; 55:10, 11) Ke ra kawaboko na nona tamata, ena sega ni dua me qaravi koya ena lomanibai ni nona valenisoro vakayalo e vuravura! Ena sega tale ga ni dua ena isevu ni “vuravura vou”—o ira era talairawarawa vua na Kalou ena veiliutaki ni “lomalagi vou.” (Vkta. 21:1) Ena sega tale ga ni Veiliutaki o Jisu me duanaudolu na yabaki ke sega ni dua e bula tu e vuravura.​—Vkta. 20:4, 5.

Ena vakatitiqataki tale ga na itutu ni Kalou kei na kena irogorogo ke vakatarai ira na nona meca mera vakawabokotaki ira kece na nona tamata. Ena vakarogorogocataka tale ga na nona Veiliutaki Cecere ke vakalaivi ira na kena meca mera vakamatei ira kece na nona tamata e vuravura. Kena ikuri, ni dokai koya o Jiova kei na yacana tabu ena sega gona ni vakatara mera vakamatei kece o ira era yalodina vua. Vakasamataka tale ga qo: Ni “yalododonu” tu ga na Kalou, ena maroroi ira na nona tamata era qaravi koya tiko ga ena yalodina. (Vkru. 32:4; Vkte. 18:25) Ke vakatara mera vakamatei na nona tamata ena veicoqacoqa kei na ka e tukuna na nona Vosa: “Ni na sega ni laivi ira na nona tamata ko Jiova e na vuku ni yacana levu.” (1 Sam. 12:22) Ena sega gona ni ‘biuti ira na nona tamata o Jiova qai sega ni laivi ira na nona ivotavota.’​—Same 94:14.

E veivakacegui dina nida kila nira na sega ni kawaboko o ira era qaravi Jiova e vuravura! Meda saga gona vakaukaua meda yalodina tiko ga vua na Kalou, da qai nuitaka na nona vosa ni yalayala qo: “Nai yaragi kece ga sa caka me kemu ena sega ga ni yaco; kei na yame kece ga ena mai veilewai kei iko ko na vakacala ga. Oqo na nodrai votavota na tamata i Jiova, kei na nodra veivakadonui maivei au, sa kaya ko Jiova.”​—Aisea 54:17.

[Tikina bibi ena tabana e 22]

Ena sega ni vakatara na Kalou mera vakawabokotaki na nona tamata