“Qarauni Kemudou Mai na Nodra Leveni na Farisi”

A vakaroti ira na nona tisaipeli o Jisu: “Dou qarauni kemudou mai na nodra leveni na Farisi, ya na veivakaisini.” (Luke 12:1) Ena itukutuku vata ga oya e vola o Maciu, e laurai kina ni vakacala tiko o Jisu na “nodra ivakavuvuli” na Farisi.​—Maciu 16:12.

Na iVolatabu e dau vakayagataka ena so na gauna na “leveni,” se isi, me vakatayaloyalotaka na ka e ca. Sa rauta me vakaleqai ira na vakarorogo na nodra ivakavuvuli kei na nodra itovo na Farisi. Na cava e veivakaleqai kina na veika era vakavulica?

1 Era dokadokataka na Farisi na nodra yalododonu, ra qai beci ira na tauvanua.

A tukuni ira na Farisi sega ni veinanumi qo ena dua na nona vosa vakatautauvata o Jisu. E kaya: “E tucake na Farisi qai tekivu masu lo ena nona kaya, ‘Kemuni na Kalou, au vakavinavinaka vei kemuni niu sega ni vakataki ira na so, era dau kocokoco, era sega ni yalododonu, era dau veibutakoci, seu vakataki koya na daukumuni ivakacavacava qo. Au lolo vakarua ena dua na macawa, au solia na ikatini ni ka kece au rawata.’ Ia e duri tu mai vakayawa na daukumuni ivakacavacava, e sega mada ga ni rawa vua me tacake i lomalagi. E tavimabu tiko ga ena nona kaya, ‘Kemuni na Kalou, ni lomani au niu tamata ivalavala ca.’”​—Luke 18:11-13.

A vakacaucautaka na nona yalomalumalumu na daukumuni ivakacavacava o Jisu, ni kaya: “Au tukuna vei kemuni, e vakadonui na tagane qo ni lako sobu i nona vale, e sega ni vakadonui na tagane adua [na Farisi]; ni o koya e vakacerecerei koya ena vakalolovirataki, o koya e vakamalumalumutaki koya ena vakacerecerei.” (Luke 18:14) Era kilai na daukumuni ivakacavacava mera tawayalodina, ia a saga o Jisu me vukei ira na daukumuni ivakacavacava era dau rogoci koya. Rau qai nona imuri e rua na daukumuni ivakacavacava o Maciu kei Sakiusa.

Vakacava ke da nanuma nida vinaka cake vei ira eso ena taledi e tu vei keda, se na itavi lavotaki e lesi vei keda, se na noda raica na nodra malumalumu eso tale? Me kua ni va qori na noda rai, ni tukuna na iVolatabu: “Na loloma e vosota vakadede qai yalovinaka. Na loloma e sega ni vuvu, e sega ni tukutukuni koya, e sega ni dokadoka, e sega ni cakava na ka e sega ni kilikili, e sega ni kauaitaka ga na ka e baleti koya, e sega ni cudrucudru. E sega ni katona na ca. E sega ni marautaka na ka e sega ni dodonu, e marautaka ga na dina.”​—1 Kor. 13:4-6.

Me tiko vei keda na nona rai na yapositolo o Paula. Ni cavuta oti ni “lako mai vuravura o Karisito Jisu me vakabulai ira na ivalavala ca,” a tomana: “Au torosobu duadua vei ira qori.”​—1 Tim. 1:15.

Taro meda vakasamataka vakatitobu:

Au kila tiko niu ivalavala ca qai gadreva na nona yalololoma o Jiova meu bula kina? Au dau raica na levu ni yabaki au veiqaravi kina ena yalodina kei na noqu taledi meu beci ira kina eso tale?

2 E vakarairai ga na nodra yalododonu na Farisi. Era vaqara rogo kei na itutu.

A vakarota o Jisu: “Era cakava vakarairai na ka kece; era vakalevutaka na kato e tawani kina na tikinivolatabu ra qai dau vesuka e yadredra kei na ligadra me itataqomaki. Era vakabalavutaka tale ga na bele ni nodra isulu me savu tu. Era dau vinakata mera dabe ena idabedabe dokai ena soqo ni kana kei na idabedabe e liu ena valenilotu, mera kidavaki tale ga ena vanua ni veivoli ra qai kacivi mera Rapai.” (Maciu 23:5-7) Vakatauvatani ira mada na Farisi kei Jisu. O Jisu e Luve uasivi ni Kalou, ia a yalomalumalumu. Ni kacivi koya e dua na turaga me “vinaka,” e kaya: “Na cava o kaya kina niu vinaka? Sega tale ni dua e vinaka, na Kalou ga.” (Mari. 10:18) Ena dua tale na ituvaki a vuya na yavadratou na nona tisaipeli me vakaraitaka kina vei ratou na ibalebale ni yalomalumalumu.​—Joni 13:1-15.

Na lotu vaKarisito dina e dodonu me qaravi ira na tacina vakayalo. (Kala. 5:13) Vakabibi vei ira era via sauva na itavi vakaivakatawa ena ivavakoso. E vinaka ke dua e via sauva “na itavi vakaivakatawa,” ia me vu mai lomana na nona via vukei ira tale eso. Na “itavi” qori e sega ni dua na itutu, se sa soli vua na lewa. O ira era veiqaravi vakaivakatawa e vinakati mera “yalomalua” me vakataki Jisu.​—1 Tim. 3:1, 6; Maciu 11:29.

Taro meda vakasamataka vakatitobu:

Au dau solimaka vei ira na qarava eso na itavi bibi ena ivavakoso meu rawa ni dokai kina se soli vei au eso tale na itavi? Au dau kauaitaka ga eso na itavi ena ivavakoso au na rogo se vakacaucautaki kina? Au saga tiko meu ivakaraitaki vei ira tale eso?

Era vakayagataka na Lawa na Farisi mera bulia kina eso tale na lawa kei na ivakarau mera vakaicolacolataki kina na tauvanua.

Na Lawa a soli vei Mosese a vakaraitaka na ivakarau mera sokaloutaki Jiova kina na Isireli. Ia a sega ni matailalai sara na lawa. Me kena ivakaraitaki, e tiko na Lawa e vakatabuya na cakacaka ena siga ni Vakacecegu, ia a sega ni tukuni sara na cakacaka me caka kei na kena me sega. (Lako 20:10) Era mani vakuria eso tale na lawa na Farisi, eso tale na kena ibalebale kei na kena itovo. A sega ni muria o Jisu na nodra lawa buli na Farisi, ia e doka na Lawa a soli vei Mosese. (Maciu 5:17, 18; 23:23) A sega wale ga ni kila o Jisu na veika e volai ena Lawa, ia e kila na kena inaki kei na sala me vakaraitaki kina na yalololoma kei na veinanumi. E yalorawarawa ni ratou dau cala na nona imuri. Kena ivakaraitaki, a tukuna vakavica vei ratou na nona imuri me ratou yadra tiko ena bogi sa na vesu kina, ia ratou tabaka ga na sosovu. E lomani ratou ga ena nona kaya: “E gu na yalo, ia e malumalumu na yago.”​—Mari. 14:34-42.

Taro meda vakasamataka vakatitobu:

Au dau yalodredre qai bulia ga eso na noqu lawa? Au dau yalorawarawa ena ka au namaka vei ira tale eso?

Vakasamataka mada na duidui ni ka a vakavulica o Jisu kei ira na Farisi. O raica kina eso na ka mo vakavinakataka? Ke vaka kina, vakacava mo cakava sara ga qo?

[iYaloyalo ena tabana e 28]

Era dau vesuka na Farisi e yadredra kei na ligadra na kato e tawani kina na tikinivolatabu.​—Maciu 23:2, 5

[iYaloyalo ena tabana e 29]

O ira na qase ni ivavakoso era tu vakarau mera veiqaravi, era sega ni vakataki ira na Farisi dokadoka

[iYaloyalo ena tabana e 30]

Me vakataki Jisu, o dau yalorawarawa ena ka o namaka vei ira tale eso?