Yaco Dina na Ka e Parofisaitaki Kina
“Ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou.”—JOSUA 23:14.
E DUIDUI VAKACAVA NA IVOLATABU? E kilai levu ni sega ni dau nuitaki qai veicalati na ka era dau parofisaitaka na bete ena gauna makawa, va tale ga kina na horoscope ena gauna qo. Na vulici ni veika e nanumi ni na yaco ena gauna se bera mai qai yavutaki ena ka e yaco tiko ena gauna oqo (futurology), e dredre mada ga me parofisaitaka na veika matailalai kece ena yaco ena veisenitiuri tarava. Ia na parofisai ena iVolatabu e tukuna vakamatailalai na ka ena yaco qai dau yaco dina, na veika mada ga ‘e tukuni makawa sara ni se bera ni yaco.’—Aisea 46:10.
KENA IVAKARAITAKI: Ena ikaono ni senitiuri B.S.K., a raivotutaka na parofita o Taniela ni na totolo ga nona vakamalumalumutaki Mitia kei Perisia o Kirisi. E parofisaitaka tale ga ni gauna ena “kaukauwa” kina na tui qaqa ni Kirisi, ena “ramusu” tale na nona veiliutaki. O cei ena sosomitaki koya? E vola o Taniela: “Ena tubu mai e va na matanitu mai na matanitu ko ya, ka na sega ni kaukauwa me tautauvata kaya.”—Taniela 8:5-8, 20-22.
KA ERA KAYA NA DAUNITUKUTUKU MAKAWA: Ni oti e 200 vakacaca na yabaki nona mate o Taniela, a qai tui kei Kirisi o Alekisada na Ka Levu. Ena loma ga ni tini na yabaki, a vakamalumalumutaka o Alekisada na matanitu o Mitia kei Perisia qai toso na vanua e lewa o Kirisi me yaco sara ina uciwai na Indus (sa kilai nikua me o Pakistan). Ia a mate ni se qai yabaki 32. A kasura vakadua na nona matanitu ena ivalu a yaco volekata na koro o Ipsus e Esia Lailai. Eratou qai vida na matanitu o Kirisi na le va eratou qaqa ena ivalu qori. Ia eratou sega ni kaukaua me vakataki Alekisada.
NA CAVA O NANUMA? E dua tale na ivola e rawa ni tukuna ni dau yaco dina na ka e parofisaitaka? Se na iVolatabu duadua ga e rawa ni cakava qori?
[Tikina bibi ena tabana e 4]
‘E levu na parofisai ena iVolatabu, ia me nanumi tiko nira na sega tu ga ni yaco vakacalaka.’—A LAWYER EXAMINES THE BIBLE, VOLA O IRWIN H. LINTON
[iTaba ni Credit Line ena tabana e 4]
© Robert Harding Picture Library/SuperStock