Me Sauma na iVolatabu
O Rawa ni Bula Tawamudu?
Ena veivosakitaki ena ulutaga qo eso na taro o rairai dau lomatarotarotaka tu, o na raica tale ga na tikinivolatabu mo wilika kina na kena isau. Era marau na iVakadinadina i Jiova mera veivosakitaka kei kemuni na kena isau.
1. Na cava e lekaleka kina na noda bula?
Eso na vonunivanua era bula me 150 na yabaki, eso tale ga na vunikau era bula me 3,000 na yabaki. Ni o vakatauvatana qori kei na balavu ni noda bula na kawatamata, e lekaleka sara na noda bula. Ia e rawa ni vakainaki vakalevu na noda bula mai na vonunivanua se na vunikau. Na Kalou o Jiova e bulia na tamata me rawa ni marautaka na ivakatagi, qito, kana, vuli, gade kei na veimaliwai. E biuta tale ga e lomada na gagadre ni via bula tawamudu.—Wilika Dauvunau 3:11.
2. E rawa dina nida bula tawamudu?
E tawavakaiyalayala na bula i Jiova. E sega vakadua ni mate. Ni iVurevure ni bula, e rawa gona ni vakarautaka na bula tawamudu vei ira tale eso. (Same 36:9; Apakuki 1:12) E yalataka tale ga nira na rawata na bula tawamudu o ira ga era talairawarawa vua. Ena sega ni vakalaiva me vakilai tale na bula vaqase.—Wilika Jope 33:24, 25; Aisea 25:8; 33:24.
Na cakacaka veivakurabuitaki a cakava o Jisu e vakadinadinataka nida rawa ni nuitaka na yalayala ni Kalou me baleta na noda rawa ni bula tawamudu qai uasivi. A walia o Jisu e levu na mataqali tauvimate, a vakaturi ira mada ga na mate.—Wilika Luke 7:11-15, 18, 19, 22.
3. Gauna cava ena vakavotukanataki kina na bula tawamudu?
E vinakata na Kalou meda bula tawamudu, sega ena vuravura e sinai kina na veivakalolomataki kei na itovo kaukaua, ia ena vuravura parataisi. E vinakata o koya meda kua ni lomaleqa. (Same 37:9, 29; Aisea 65:21, 22) Ni sa na vakalesui tale na Parataisi e vuravura, era na vakaturi e vica vata na milioni na tamata era mate tu. Ke ra digia o ira qori mera qarava na Kalou ra qai talairawarawa vua, era na rawata na bula tawamudu.—Wilika Luke 23:42, 43; Joni 5:28, 29.
4. Eda na rawata vakacava na bula tawamudu?
Na Kalou duadua ga ena rawa ni solia vei keda na bula tawamudu. Ena vinaka gona meda toro voleka vua ena noda saga meda kilai koya. Na noda saga meda kila na Kalou e vakatauvatana na iVolatabu ina noda kania na kakana. (Maciu 4:4) Eda dau marautaka dina na kana, ia na kena rawati kei na kena vakarautaki ena vinakati kina na sasaga. Na noda vakani keda tale ga vakayalo ena vinakati kina na sasaga. Koya gona, e sega tale ni dua na ka e uasivita na noda toro voleka vua na Kalou da qai rawata na bula tawamudu, se vakacava?—Wilika Luke 13:23, 24; Joni 6:27; 17:3.
Me ikuri ni ivakamacala, raica na wase 3 ni ivola qo, Na Cava Sara Mada e Kaya na iVolatabu?, tabaka na iVakadinadina i Jiova.
[iYaloyalo ena tabana e 16]
[iYaloyalo ena tabana e 16]
[iYaloyalo ena tabana e 17]
[iYaloyalo ena tabana e 17]
E yaga na noda saga meda kilai koya na Kalou