Veivakayaloqaqataki “na Gusudra na Gone Lalai”
Ena Tiseba 2009, e tokona na Mataveilewai Cecere mai Rusia me vakatabui na isoqosoqo ni iVakadinadina i Jiova mai Taganrog, tauri vakaukaua na Vale ni Soqoni, tukuni tale ga ni 34 na noda ivola e vakavuna na tiko yavavala. E kurabuitaki dina na ka e yaco qori qai tabaki ena Web site ni isoqosoqo ni iVakadinadina i Jiova na kedra itaba na iVakadinadina e tarai ira na vakatulewa ni mataveilewai, wili kina o ira na gone.
Oti e vica na vula, a vakau ina nodra itikotiko liu na iVakadinadina i Jiova e Rusia e dua na kateni kei na nodratou ivola e dua na vuvale iVakadinadina mai Kuinisiladi, Ositerelia, eratou raica tale ga na itukutuku ni vakatulewa ni mataveilewai: “Raveitacini, e tarai rau sara ga na luvei keirau o Cody kei Larissa, na nodra vakabauta kei na nodra vakararawataki na itokani mai Rusia. Erau vola na kad kei na ivola, keitou vakarautaka tale ga eso na iloloma lalai me soli vei ira na gone e Taganrog, mera kila kina ni o ira tale ga na gone era tu sara yani vakayawa era yalodina tiko ena nodra qaravi Jiova, era nanumi ira tale tu ga yani. Erau loloma tu yani vakabibi.”
Nira taura na gone mai Taganrog na nodra iloloma, era vola sara na nodra ivola ni vakavinavinaka vei ratou na vuvale mai Ositerelia. Ni tarai koya na kena veivakayaloqaqataki “na gusudra na gone lalai,” e dua na iVakadinadina e veiqaravi tiko ena valenivolavola ni tabana e Rusia a vola vei rau o Cody kei Larissa: “Dua dina na ka mosimosi vei ira na gone kei na uabula mera totogitaki ena veika era sega ni cakava. Era sega ni cala na mataveitacini e Taganrog, ia e tauri vakaukaua na nodra Vale ni Soqoni. Qori e vakararawataki ira dina. Ena vakayaloqaqataki ira sara ga na nodra kila ni nanumi ira tu e dua e tiko ena dua tale na yasa i vuravura. Vinaka vakalevu na veikauaitaki kei na lomasoli!”—Same 8:2.
Eda lewena dina e dua na mataveitacini e vuravura raraba, qai yaga na noda veilomani meda vosota kina na veika rarawa kei na veika dredre eda dau sotava. E veiletitaki ena mataveilewai ke vakavuna tiko na veicati na noda ivola, ia era vakaraitaka galugalu na noda gone na nodra kauaitaki ira na nodra icaba. Era sega ni kauaitaka na duidui vanua se matatamata era cavutu mai kina ra qai vakadinadinataka kina na ka e tukuna o Jisu: “Na ka qo era na kila kece kina ni dou noqu tisaipeli, ke dou veilomani.”—Joni 13:35.
[iYaloyalo ena tabana e 32]
O rau na gone mai Ositerelia (imatau)
[iYaloyalo ena tabana e 32]
Rau vakau iloloma vei ira na gone mai Rusia (imawi)