Na Cava Era Sega ni Solevutaka Kina Eso na Kirisimasi?

E veiyasa i vuravura, voleka nira le rua na bilioni era solevutaka na Kirisimasi e veiyabaki ena ika25 ni Tiseba, e rauta ni le 200 na milioni era solevutaka na siganisucu i Jisu Karisito ena ika7 ni Janueri. Ia e vica tale ga na milioni era vakatulewataka mera kua ni solevutaka na Kirisimasi. Na cava na vuna?

Dua oya nira rairai lewena e dua na lotu e sega ni tiki kei Lotu ni Veivanua Vakarisito. De dua era Jiu, Idu, se ra lewena na vakabauta vakaShinto. So tale era raica na Kirisimasi me dua wale ga na itukuni, me vakataki ira na sega ni vakabauta na Kalou, o ira era sega ni vakadeitaka ni bula dina tiko, o ira era kauaitaka ga na ka era nanuma, kei ira era vakabauta ni sega ni gadrevi na lotu me rawati kina na marau.

Ia e kurabuitaki ni dua na iwiliwili levu era vakabauti Jisu era cata na solevu vakalotu e vakatokai na Yuletide (na solevu e dau caka ena vica na siga ni bera na Kirisimasi). Baleta na cava? Era vakamacalataka e va na vuna.

Kena imatai, era sega ni vakabauta ni a sucu o Jisu ena vula o Tiseba se Janueri. E sega tale ga ni tukuna na iVolatabu e dua na tikinisiga. E tukuna ga: “Ena vanua ya, eratou tu e tautuba ena bogi eso na ivakatawanisipi eratou veisau yadra tiko ena kena vakatawai na nodratou qelenisipi. E qai rairai vakasauri vei iratou na agilosi i Jiova, . . . qai kaya vei iratou na agilosi: ‘. . . Sa sucu nikua na nomuni iVakabula o Karisito, na Turaga.’”​—Luke 2:8-11.

E levu tu na ivakadinadina ni a rairai sucu o Jisu ena itekitekivu ni vula o Okotova nira vakatawa sipi tiko i tuba na ivakatawa ena bogi, me vaka e cavuti ena tikinivolatabu e cake. Ena veikoro wavoliti Peceliema e dau batabata sara kina na draki donuya na vula o Tiseba kei na vula o Janueri. Koya gona, era na kau na qelenisipi ena nodra vale e taqomaki vinaka tu mera katakata kina ena bogi.

Kena ikarua: A vakaroti ratou na nona imuri o Jisu meratou vakananuma ga na nona mate, sega ni nona sucu. (Luke 22:19, 20) Dikeva ni rau sega tale ga ni tukuna e dua na ka me baleta na sucu i Jisu na Kosipeli o Marika kei Joni.

Kena ikatolu: E sega tale ga ni dua na ivakadinadina e tu ni o ira na lotu vaKarisito taumada era dau solevutaka na sucu nei Karisito. Ia era vakananuma ga na nona mate. (1 Korinica 11:23-26) Ni oti e 300 na yabaki nona sucu o Jisu, sa qai tekivu solevutaka kina o Lotu ni Veivanua Vakarisito na Kirisimasi ena ika25 ni Tiseba. E kurabuitaki ni a vakadonui ena palimedi mai Igiladi e dua na lawa ena loma ni ika17 ni senitiuri, e vakatabui kina na solevutaki ni Kirisimasi ena vanua qori. E vakayacora tale ga qori na Massacusetts General Court mai Merika. Na cava na vuna? E kaya na ivola na Battle for Christmas: “E sega ni yavutaki vakaivolatabu se tu e dua na kena ivakadinadina makawa e dusia ni a sucu o Jisu ena ika25 ni Tiseba.” E tukuna tale ga na ivola qori ni o ira na lotu Puritan era kaya ni “Kirisimasi e dua na nodra ivakarau ni sokalou na lotu butobuto, eso era veisautaka qori mera solevutaka na lotu vaKarisito.”

Qo na ikava ni vuna: Na veika vakasisila e yavutaki kina na solevu qo. Na Kirisimasi e vu mai na lotu butobuto vakaRoma qai dau salavata qori kei na veisoqo e dau qaravi kina na kalou ni teitei o Saturn kei na kalou ni matanisiga o Sol Invictus, se Mithra. Erau vola na dau dikeva na veika me baleta na tamata o Christian Rätsch kei Claudia Müller-Ebeling ena ivola Pagan Christmas: “Na solevu e dau vakayacori e veiyabaki ena gauna makawa me vakananumi kina na nona lesu mai na kalou ni matanisiga sa dau vakayagataki qori me vakananumi kina na nona sucu na Karisito, e va tale ga qori e levu na itovo vakavanua kei na vakabauta ni bera na gauna vaKarisito.”

Ena veika sa vakamacalataki mai, o sa qai raica na vuna era sega ni solevutaka kina na lotu vaKarisito dina na Kirisimasi?