Jisu—A Vakainaki Nona Bula

VAKACAVA a vakainaki dina na bula i Jisu? E susugi ena dua na koro lailai, qai sega ni levu na ka a taukena ena gauna a bula voli kina. “E sega na vanua me kotora kina na uluna.” (Luke 9:​57, 58) E cati tale ga, a vosavakacacataki, ra qai vakamatei koya na kena meca.

De dua o na veinanuyaka, ‘Qori e sega ni bula vakainaki!’ Ia e vinaka meda dikeva eso tale na ka me baleta na bula i Jisu. Meda dikeva mada e va na ka a cakava ena nona bula.

1. NA INAKI NI BULA I JISU ​—ME VAKAYACORA NA LOMA NI KALOU.

“Na qau kakana meu cakava na loma i koya e talai au mai.”​—Joni 4:34.

A vinakata o Jisu me vakayacora na lomai Jiovaa na Tamana vakalomalagi, qai vakaraitaka qori ena ka e tukuna kei na ka e cakava. E marau vakalevu o Jisu ni cakava na loma ni Kalou. E vakatauvatana qori ina kakana, me vaka e cavuti ena tikinivolatabu mai cake. Dikeva mada na gauna a cavuta kina na vosa qori.

A cavuta o Jisu na vosa qori ena sigalevu tutu. (Joni 4:6) A taubale voli ena veidelana mai Samaria ena mataka taucoko, qai sega tu ni kana, dua na ka na nona walokai. Eratou mani cikevi koya na nona tisaipeli: “Rapai, kana mada.” (Joni 4:31) E laurai ena ka e tukuna o Jisu ni vakaukauataki koya qai vakacegui koya na nona cakava na loma ni Kalou. Qori e vakaraitaka ni vakainaki dina nona bula, se vakaevei?

2. E LOMANI TAMANA VAKALEVU O JISU.

“[Au] lomani Tamaqu.”​—Joni 14:31.

Rau sa bau veivolekati dina o Jisu kei Tamana mai lomalagi. Na nona lomani Tamana o Jisu e uqeti koya me vakatakila na yaca ni Kalou, nona inaki, kei na nona itovo. E vakatotomuri Tamana vinaka sara ga o Jisu ena ka e tukuna, ka e cakava kei na nona itovo. Na ka kece qori e vakatayaloyalotaki Tamana vinaka sara ga. Ni tarogi Jisu gona o Filipi: “Vakatakilai Tamamuni mada vei keitou,” a sauma o Jisu: “O koya e raici au e raici Tamaqu.”​—Joni 14:​8, 9.

Na levu ni nona lomani Tamana o Jisu a talairawarawa tiko ga me yacova na nona mate. (Filipai 2:​7, 8; 1 Joni 5:3) Na nona vakaraitaka gona o Jisu na loloma qori, e vakainaki kina na nona bula.

3. E LOMANI IRA NA TAMATA O JISU.

“E sega ni dua na loloma e sivia na loloma qo, me dua e solia nona bula ena vukudra na nona itokani.”​—Joni 15:13.

Nida ivalavala ca ena sega tu ga ni vinaka na noda bula ena veigauna se bera mai. E kaya na iVolatabu: “Ena vuku ni dua ga na tamata [Atama] e curu kina i vuravura na ivalavala ca kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.” (Roma 5:12) E sega gona vei keda na kaukaua meda drotaka na isau ni ivalavala ca, na mate.​—Roma 6:23.

Ia eda kalougata ni vakarautaka o Jiova na iwali ni noda leqa. E tala mai o Jiova na Luvena uasivi o Jisu, me vakararawataki qai vakamatei meda sereki kina na kawatamata mai na ivalavala ca kei na mate. E uqeti Jisu sara ga na nona lomani Tamana kei ira na tamata me talairawarawa qai solia na nona bula ena vukuda. (Roma 5:​6-8) Qori e vakainaki kina na nona bula.b

4. A KILA O JISU NI LOMANI KOYA O TAMANA QAI VAKADONUI KOYA.

“Qo na Luvequ lomani, au vakadonuya.”​—Maciu 3:17.

A cavuta na vosa qori mai lomalagi o Jiova ena gauna a papitaiso kina o Jisu. A vakaraitaka sara ga e matanalevu o Jiova ni lomani luvena, e vakadonui koya tale ga. Sa rauta me tukuna ena nuidei o Jisu: “E lomani au . . . o Tamaqu”! (Joni 10:17) Ni kila ni lomani koya qai vakadonui koya o Tamana, e vosota kina na veivakatovolei kei na veivakacacani. E vukei koya tale ga me yalodina tiko ga me yacova na nona mate. (Joni 10:18) Sa qai vakainaki ga vakalevu na nona bula o Jisu ni kila ni lomani koya o Tamana, e vakadonui koya tale ga.

A vakainaki dina na bula i Jisu. E macala nida rawa ni vuli vua ke da vinakata me vakainaki tale ga na noda bula. Ena ulutaga tarava eda na dikeva kina eso na ka a vakasalataki ira kina na nona imuri o Jisu me rawa ni vakainaki na nodra bula.