Vakatotomuria na Lomasavu kei na Yalorawarawa i Jiova

1, 2. Na cava era vakanuinui tu kina na itokani i Jiova?

E TUKUNA o Monika e dua na tacida vaKarisito: “Sa voleka ni 35 na yabaki na neirau vakawati. Keirau veikilai vinaka sara kei watiqu. Ia ena gauna kece mada ga qori, se toso tiko ga na neirau kila eso tale na ka me baleti keirau!” E dau yaco tale ga qori ena levu na vakawati kei na veitokani.

² Eda dau marautaka meda veikilai vinaka kei ira eda lomana. Ia na veitokani bibi duadua eda rawa ni bucina oya na noda veitokani kei Jiova. Eda na sega ni kila na ka kece me baleti koya. (Roma 11:33) Eda na marautaka tawamudu na noda vulica vinaka sara na itovo i Jiova.​—Dauv. 3:11.

3. Na cava eda na veivosakitaka ena ulutaga qo?

³ E uqeti keda na ulutaga sa oti meda vakatotomuria vinaka sara na nona torovi rawarawa o Jiova kei na nona sega ni dau veivakaduiduitaki. Meda veivosakitaka mada e rua tale nona itovo talei o Jiova​—nona lomasavu kei na nona yalorawarawa. Nida cakava qori eda na qai kila vinaka sara ni “yalovinaka ko Jiova vei ira na tamata kecega: ka sa yacova na nona cakacaka kecega na nona yalololoma.”​—Same 145:9.

DAULOMASAVU O JIOVA

4. Na cava na ibalebale dina ni lomasavu?

⁴ Na cava na ibalebale ni lomasavu? Eda kila na kena isau ena vosa e cavuta o Jisu ena Cakacaka 20:35: “E marau vakalevu o koya e solia na ka, vakalailai o koya e taura na ka.” E vakamatatataka e keri o Jisu na ibalebale dina ni lomasavu. O koya e lomasavu ena solia vakarawarawa nona gauna, kaukaua, kei na iyau me yaga vei ira tale eso​—e cakava tale ga qori ena marau. E sega ni kilai gona na lomasavu ena levu ni ka e soli, e kilai ga ena inaki e soli kina. (Wilika 2 Korinica 9:7.) E sega ni dua tale e lomasavu vakalevu me vaka na noda “Kalou mamarau” o Jiova.​—1 Tim. 1:11.

5. E dau vakaraitaka vakacava o Jiova na lomasavu?

⁵ E dau vakaraitaka vakacava o Jiova na lomasavu? E vakarautaka vei keda na kawatamata kece na veika eda gadreva, wili kina o ira na se sega ni sokaloutaki koya. Io, “sa yalovinaka ko Jiova vei ira na tamata kecega.” E dau “vakacabea na matanisiga vei ira na tamata ca kei na tamata vinaka, e vakatauca tale ga na uca vei ira na yalododonu kei ira na sega ni yalododonu.” (Maciu 5:45) Oya na vuna e rawa ni tukuna kina na yapositolo o Paula vei ira na sega ni vakabauta, ni o Jiova e dau “caka vinaka tiko ga, e vakatauca vei kemuni na uca mai lomalagi, e solia na gauna vinaka ni tatamusuki, qai vakamamautaka na lomamuni ena kakana kei na marau.” (Caka. 14:17) E laurai sara ga e keri ni dau lomasavu o Jiova vei keda kece na kawatamata.​—Luke 6:35.

6, 7. (a) O cei e marautaka vakalevu o Jiova me vakarautaka na veika era gadreva? (b) Tukuna e dua na irogo e vakaraitaka kina na Kalou ni dau karoni ira nona dausokalou yalodina.

⁶ E dau marautaka vakalevu o Jiova me vakarautaka na ka era gadreva nona dausokalou yalodina. E tukuna o Tui Tevita: “Au a gone, ka’u sa qai qase mai; ia ka’u a sega ni raica na yalododonu ni sa biu laivi, se na nona kawa ni ra sa vosai kedra madrai.” (Same 37:25) Era sa vakadinadinataka e levu na lotu vaKarisito yalodina na nona veikaroni va qori o Jiova. Dikeva mada e dua na ivakaraitaki.

⁷ Ena vica na yabaki sa oti, a sotava e dua na ituvaki o Nancy e dua na tacida e veiqaravi vakatabakidua. A nanuma lesu: “A vinakati e $66 me saumi kina na noqu rede ena siga e tarava. Au sega ni kila au na rawata vakacava na ilavo ya. Au masulaka qori, au lai cakacaka sara ena valenikana au dauveiqaravi kina. Au sega ni namaka mera lolomataka vei au e levu na ilavo (tip) o ira na lai kana yani ena yakavi oya, nira sega ni dau gole yani e valenikana e levu ena siga va ya. Ia au kurabui nira gole yani e levu e valenikana. Niu wilika na ilavo e lolomataki vei au ena gauna au sa suka kina, kena levu e $66.” E vakadeitaka o Nancy ni a lomasavu o Jiova me vakarautaka na ka sara ga e gadreva.​—Maciu 6:33.

8. Na cava na iloloma levu duadua i Jiova?

⁸ E rawa ni yaga vei keda kece na iloloma levu duadua i Jiova. Na cava oya? Na isoro ni veivoli i Luvena. E tukuna o Jisu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.” (Joni 3:16) Ena ikotokoto qori na vosa “vuravura” e vakaibalebaletaki vei keda na kawatamata. Io, na iloloma levu duadua i Jiova e rawa ni yaga vei ira kece era ciqoma. O ira era vakabauti Jisu ena balavu na nodra bula​—era na bula tawamudu! (Joni 10:10) Qori sara ga na ivakaraitaki uasivi ni lomasavu i Jiova.

VAKATOTOMURIA NA LOMASAVU I JIOVA

9. Eda na vakatotomuria vakacava na lomasavu i Jiova?

⁹ Eda na vakatotomuria vakacava na lomasavu i Jiova? O Jiova e “vakarautaka vakayauyau vei keda na ka kece meda marau kina,” e dodonu gona meda dau “yalosolisoli” nida na vakamarautaki ira kina eso tale. (1 Tim. 6:​17-19) Eda marautaka meda vakayagataka na noda iyau vei ira eda lomana, meda vukei ira tale ga era vinakata na veivuke. (Wilika Vakarua 15:7.) Na cava ena vukei keda meda lomasavu tiko ga? Era muria eso na lotu vaKarisito na iwalewale qo: Na gauna ga era ciqoma kina e dua na iloloma, era na saga mera soli iloloma tale ga vua e dua tale. Eda kalougata nira lewena na ivavakoso vaKarisito e levu na tacida e sa tiki ni nodra bula na lomasavu.

10. Na cava e dua na sala vinaka eda rawa ni lomasavu kina?

¹⁰ Na sala vinaka duadua eda rawa ni vakaraitaka kina nida lomasavu, oya ena noda vosa kei na ka eda cakava. Eda na cakava vakacava qori? Nida vakayagataka noda gauna kei na noda kaukaua meda veivukei da qai veivakayaloqaqataki kina. (Kala. 6:10) Ke da via kila se da sa cakava tiko qori, e vinaka meda taroga: ‘Vakacava era raici au eso tale niu dau yalorawarawa, meu rogoca tale ga na nodra leqa? Ke kerea e dua meu vukei koya ena dua na ka, vakacava au dau veivuke ena gauna kece e rawa? Gauna cava sara mada au bau vakacaucautaka kina e dua na lewe ni vuvale se dua na taciqu vakayalo?’ Nida “soli ka,” eda na toro voleka vei Jiova kei ira na noda itokani.​—Luke 6:38; Vkai. 19:17.

11. Na cava eso na sala eda rawa ni lomasavu kina vei Jiova?

¹¹ Eda rawa tale ga ni lomasavu vei Jiova. E uqeti keda na iVolatabu: “Mo dokai Jiova e na nomui yau.” (Vkai. 3:9) E okati tiko me ‘iyau’ na noda gauna, kaukaua, kei na ka eda taukena, nida rawa ni vakayagataka vakalevu ena noda qaravi Jiova. E rawa mada ga nira vulica na gone mera dau lomasavu vei Jiova. E tukuna e dua na tama o Jason: “Ni keitou dau solia neitou cau vakavuvale ena Vale ni Soqoni, keirau dau laivi rau na gone me rau biuta na ilavo ena kato ni cau. Erau dau marautaka qori baleta na gauna rau biuta kina, erau sa ‘solia tiko e dua na ka vei Jiova.’” O ira na gone era marautaka na nodra solika vei Jiova nira se lalai, ena rawa nira lomasavu tiko ga vua nira sa uabula.​—Vkai. 22:6.

YALORAWARAWA O JIOVA

12. Na cava na ibalebale ni yalorawarawa?

¹² E dua tale na itovo talei i Jiova na yalorawarawa. Na cava na ibalebale ni yalorawarawa? Na vosa vaKirisi e dau vakadewataki ena Vakadewa ni Vuravura Vou me “yalorawarawa” e kena ibalebale na nona “vakalaiva e dua me yaco na lomadra eso tale.” (Taito 3:​1, 2) O koya e yalorawarawa e kila ni vakatau ena ituvaki e sotavi na kena muri na lawa, ena sega ni kaukaua nona lewa, yalodredre se voravora. Ia ena saga me yalomalua ena nona veimaliwai, e kauaitaka tale ga na kedra ituvaki eso tale. E tu vakarau me vakarorogo, ena cakava na ka era vinakata eso tale qai veisautaka na nona vakatulewa ke raica ni veiganiti.

13, 14. (a) E vakaraitaka vakacava o Jiova ni dau yalorawarawa? (b) Na cava eda vulica me baleta na yalorawarawa ena ka a cakava na Kalou vei Loti?

¹³ E vakaraitaka vakacava o Jiova ni dau yalorawarawa? E kauaitaka vakayalololoma na ka era vinakata na nona dauveiqaravi, e dau vakayacora tale ga na nodra kerekere. Kena ivakaraitaki, vakasamataka mada na ka a cakava o Jiova vua na turaga yalododonu o Loti. Ni sa vakadeitaka o Jiova me vakarusa na siti o Sotoma kei Komora, a tukuna vakamatata vei Loti me dro ina veiulunivanua. Ia a rairai tiko na vuna a kerea kina o Loti me dro ina dua tale na vanua. Vakasamataka mada​—e kerei Jiova sara ga o Loti me veisautaka na nona ivakaro!​—Wilika Vakatekivu 19:​17-20.

¹⁴ Ena rawarawa sara me nanuma e dua ni gogo se talaidredre o Loti. A sega sara ga ni dredre vei Jiova me taqomaki koya ena vanua cava ga e tu kina, a sega gona ni dodonu me lomaleqa o Loti. E sega ni kilai na vuna e lomaleqa kina, ia e kila o Jiova qai vakayacora na nona kerekere. A vakalaiva o Jiova me dro o Loti ena dua na siti a nakita me vakarusa. (Wilika Vakatekivu 19:​21, 22.) Io, e sega ni yalodredre se yalodua o Jiova. E yalorawarawa ga qai dau vakalaiva me yaco na lomadra eso tale.

15, 16. E kilai vakacava ena Lawa a soli vei Mosese na yalorawarawa i Jiova? (Raica na imatai ni iyaloyalo ena tabana e 12.)

¹⁵ Raica mada e dua tale na ivakaraitaki ni yalorawarawa i Jiova me vaka e laurai ena Lawa a soli vei Mosese. Ke dravudravua e dua na Isireli qai sega ni rawa ni cabora me isoro e dua na lami se me, e rawa ni cabora e rua na soqe se rua na ruve. Ia vakacava ke sa dravudravua sara e dua na Isireli qai sega ni volia rawa mada ga e rua na ruve? E vakadonuya o Jiova vua na Isireli qori me cabora vakalailai na falawa. Ia e bibi me nanumi tiko qo: Me kua ni dua ga na falawa e rawa, ia me falawa vinaka sara na kena e dau vakayagataki vei ira na vulagi dokai. (Vkte. 18:6) Na cava e bibi kina qori?​—Wilika Vunau ni Soro 5:​7, 11.

¹⁶ Kaya mada ke o dua na Isireli o dravudravua sara ga. O kauta tiko yani vakalailai na falawa ena valeniveitavaki mo lai cabora me isoro, o raici ira sara na Isireli vutuniyau era kauta tiko yani na nodra manumanu. O na rairai madua ni o nanuma ni sega ni yaga na falawa o kauta tiko yani me isoro. Ia o qai vakasamataka ni o Jiova e raica qori me ka talei. Na vuna? Ni vinakata ga o Jiova me falawa vinaka sara. E vaka me tukuna tiko o Jiova vei ira na Isireli dravudravua: ‘Au kila ni oni sega ni cabora rawa e levu na ka me vakataki ira eso tale, ia au kila tale ga ni oni solia tiko vei au na ka vinaka duadua e tu vei kemuni.’ Io, e vakaraitaka o Jiova na nona yalorawarawa ena nona kauaitaka ni vakaiyalayala na ka e rawa nira cakava nona dauveiqaravi kei na ituvaki era sotava.​—Same 103:14.

17. Na veiqaravi cava o vakadeitaka ni vakadonuya o Jiova?

¹⁷ E veivakacegui na noda kila ni yalorawarawa i Jiova ena vakadonui kina na noda veiqaravi e vu mai lomada. (Kolo. 3:23) E tukuna o Constance, e dua na tacida yalewa itabaqase mai Itali: “Au dau taleitaka vakalevu meu tukuna yani na veika me baleti koya na Dauveibuli. Oya na vuna au vunau tiko ga kina, au caka vuli iVolatabu tale ga. Eso na gauna e dau vakararawataki au na noqu sega ni cakava rawa e levu na ka ena vuku ni kequ ituvaki. Ia au liaca ni kila o Jiova ni vakaiyalayala ga na ka au rawata, e lomani au qai marautaka na ka au rawa ni cakava.”

VAKATOTOMURIA NA YALORAWARAWA I JIOVA

18. Na cava e dua na sala e rawa nira vakatotomuri Jiova kina na itubutubu?

¹⁸ Eda na vakatotomuria vakacava na yalorawarawa i Jiova? Vakasamataka tale mada na ka a cakava o Jiova vei Loti. E tu vei Jiova na lewa, ia a yalololoma me rogoca na ka e tukuna o Loti. A vakayacora na Kalou na kerekere i Loti. Ke o itubutubu, vakacava o rawa ni vakatotomuria na ivakaraitaki i Jiova? Vakacava o rawa ni rogoca na ka era dau kerea na luvemu qai cakava na ka era vinakata ke veiganiti? E tukuni ena ilavelave ni Vale ni Vakatawa ni 1 Seviteba, 2007 me baleta na tikina qori ni rawa vei ira na itubutubu mera okati ira na luvedra ena kena veivosakitaki na lawa me muri e vale. Kena ivakaraitaki, era dau vakatulewataka na itubutubu mera yalana na nodra gauna ni veilakoyaki na luvedra, e tu vei ira na itubutubu na dodonu mera lewa na gauna mera lesu kina i vale na luvedra. Ia e se rawa ga vei ira na itubutubu mera kauaitaka na nodra rai na luvedra me baleta na gauna e sa vakatulewataki. Ena so na gauna era na rairai nanuma na itubutubu mera veisautaka na gauna e sa vakatulewataki qori ke sega ni veisaqasaqa kei na ivakavuvuli vakaivolatabu. De dua era na raica na itubutubu nira na kila vinaka na luvedra na ibalebale ni lawa e biu e vale ra qai muria sara ke ra kauaitaka na rai i luvedra me baleta na lawa me muri e vale.

19. Mera vakatotomuria vakacava na qase na yalorawarawa i Jiova?

¹⁹ Mera saga na qase ni ivavakoso mera vakatotomuria na yalorawarawa i Jiova ena nodra dau kauaitaka na kedra ituvaki na tacidra vakayalo. Nanuma tiko ni talei mada ga vei Jiova na nodra isoro na Isireli dravudravua. Eso tale ga na mataveitacini e vakaiyalayala na ka era cakava ena cakacaka vakaitalatala, de dua nira tautauvimate se ra sa qase sara. Vakacava ke ra yalolailai na tacida lomani qori ni vakaiyalayala na ka era rawata? E rawa nira vakayaloqaqataki ira qori na qase ni o Jiova e lomani ira ena nodra solia nodra vinaka taucoko.​—Mari. 12:​41-44.

20. Vakacava e ibalebale ni yalorawarawa na noda tusuka ni qarava na Kalou? Vakamacalataka.

²⁰ Meda kua ni nanuma ni ibalebale ni yalorawarawa na noda tusuka ni qarava na Kalou ena noda leqataka vakasivia noda bula. (Maciu 16:22) Eda na sega ni via raica vakamamada na noda sokalou da qai vakaiulubaletaka qori ena noda tukuna nida yalorawarawa. Ia eda na ‘saga ena noda igu kece’ meda tokona na veika e vauca na Matanitu ni Kalou. (Luke 13:24) Io, eda na saga meda veiraurautaka na rua na ivakavuvuli qo: Ena dua na yasana eda na solia na noda igu kece, eda na sega ni tusuka meda veiqaravi. Ena yasana kadua, eda kila ni o Jiova e sega vakadua ni namaka vakasivia vei keda na ka. Nida solia vua na noda vinaka taucoko eda nuidei ni na marautaka o koya. Eda marau nida qarava e dua na Turaga e dau kauai qai yalorawarawa! Eda na dikeva ena ulutaga e tarava e rua tale na itovo talei i Jiova.​—Same 73:28.