VAKAVULICA NA LUVEMU
Dau Rarawa na Kalou ena so na Gauna—O na Vakamarautaki Koya Vakacava?
Bau dua na gauna o tagi sara ga ena levu ni nomu rarawa?—a Rairai sa yacovi keda kece qori. Ia ena so na gauna na noda rarawa e sega ni vu mai na mosi ni dua na tikiniyagoda. E dua beka e tukuna eso na ka lasu me baleti keda. Ena mosi dina ya, se cava nomu nanuma?— Ni tukuni na veika lasu me baleta na Kalou ena mosi tale ga vua. Dikeva mada qo se da na vakamarautaka vakacava na Kalou da qai kua ni vakararawataki koya.
E tukuna na iVolatabu ni so era tukuna nira lomana na Kalou era “vakararawataki koya.” Qori e mosi dina vua! E sega ni dua e rawa ni vakamavoataka na Kalou o Jiova baleta ni Kalou kaukaua duadua. Ia e dau rarawa nida sega ni muria na ka e tukuna. Meda raica mada na vuna.
Na imatai ni rua na tamata a bulia o Jiova e vuravura erau vakararawataki koya vakalevu. E nodrau itikotiko na Parataisi e vakatokai “na were ko Iteni.” O kila na yacadrau?— Io, a buli e liu o Atama qai muri o Ivi. E vakararawataki Jiova vakacava na ka erau cakava?
Ni sa biuti rau ena were o Iteni a tukuna vei rau o Jiova me rau qarava. A tukuna tale ga ni rawa ni rau vakaluveni rau qai bula tiko ena were me tawamudu. Ia e dua na ka ca sara a yaco ni bera ni rau vakaluveni o Atama kei Ivi. O kila na cava ya?— A vakamuai Atama kei Ivi e dua na agilosi me rau talaidredre vei Jiova. Raica mada se yaco vakacava qori.
A vakayagataka e dua na gata na agilosi me vaka e vosa tiko. E taleitaka vakalevu o Ivi na ka e tukuna na gata ni na “vaka na Kalou.” Mani muria o Ivi na ka e tukuna na gata. Na cava qai cakava?—
E kania o Ivi na vuanikau a tukuna o Jiova vei Atama me kua ni tara. Ni bera ni buli o Ivi, a tukuna na Kalou vei Atama: “E tara mo kana mai na kau kecega sa tu e na were: ia mai na kau sa kilai kina na ka vinaka kei na ka ca, mo kakua ga ni kana kina: ni ko na mate vakaidina e na siga ko sa kana kina.”
E kila tale ga o Ivi na lawa ya. Ia e raica tiko ga na vuanikau ni “yaga . . . me kakana, a sa ka e via raica na matada . . . sa qai tauca na vuana, ka kania.” Oti sa qai solia vei Atama, “sa kania tale ga ko koya.” O kila na vuna e cakava kina ya?— E lomani Ivi vakalevu o Atama, lailai nona lomani Jiova. E via vakamarautaki watina ga mai na nona vakamarautaka na Kalou. Ia e bibi duadua meda talairawarawa vei Jiova mai na noda talairawarawa vua e dua tale!
E vosa vakacava na gata vei Ivi? Me vaka ga nona rawa ni cakava na matakau na tamata me vosa, e dua tale ga e vakayagataka na gata me vaka e vosa tiko. Na domo i cei e rogo tiko ya?— Qori na domo ni “gata makawa, e vakatokai na Tevoro se o Setani.”
Ena rawa vakacava mo vakamarautaki Jiova?— Oya ena nomu talairawarawa vua. E tukuna o Setani ni rawa ni vakamuai ira na tamata kece mera cakava na ka e vinakata. E vakamasuti keda o Jiova: “Mo vuku, na luvequ, ka vakamarautaka na lomaqu, me dua na vosa me’u tauca vua sa beitaki au.” O Setani e beitaki Jiova se vosa vakacacataki koya. E kaya ni na vakamua na tamata kece mera kua ni qarava na Kalou. Ke o talairawarawa qai qaravi Jiova, o sa vakamarautaki koya! O na saga vagumatua mo cakava ya?
Wilika ena Nomu iVolatabu
Vakatekivu 1:26-28; 2:15-17; 3:1-6
Vakatakila 12:9; Vosa Vakaibalebale 27:11
[iVakamacala e ra]
a Ke o wiliwili tiko kei na dua na gone, mo cegu ni o raica na itoqa balavu qai uqeti gone me tukuna na nona nanuma.
[iYaloyalo ena tabana e 14]
[iYaloyalo ena tabana e 15]