Me Salavata Noda Bula na Masu i Jisu
“Tamaqu, . . . moni vakalagilagi luvemuni me rawa tale ga ni vakalagilagi kemuni na luvemuni.”—JONI 17:1.
1, 2. Vakamacalataka na veika a cakava o Jisu vei ratou na nona yapositolo yalodina ni oti nodratou solevutaka na Lakosivia ena 33 S.K.
ENA ika14 ni Naisani ena 33 S.K. ni sa bogilevu na vanua, e solevutaka o Jisu kei ratou na nona itokani na kanavata ni Lakosivia. Eratou vakananuma kina na ka e cakava na Kalou ena nona sereki ira na nodra qase ena nodra vakabobulataki e Ijipita. Ia eratou na vakarau vakila na tisaipeli yalodina i Jisu na ‘veisereki tawamudu’ ena kena ivakatagedegede e levu sara. Ena siga tarava, era sa na lewa na meca me vakamatei na nodratou iliuliu uasivi. Ia na ivakarau vakaloloma qo ena kauta mai na veivakalougatataki. Na vakadavei ni dra i Jisu ena sereki ira na kawatamata mai na veivakabobulataki ni ivalavala ca kei na mate.—Iper. 9:12-14.
2 Me rawa ni dei tiko ena noda vakasama na ituvatuva vakayalololoma qori, a tauyavutaka kina o Jisu e dua na soqo ni ivakananumi me vakayacori e veiyabaki me sosomitaka na kanavata ni Lakosivia. A cakava qori ena nona tikica na madrai sega ni vakaleveni qai solia vei ratou na 11 na nona tisaipeli yalodina, e qai tukuna: “Qo e vakaibalebaletaka na yagoqu ena soli ena vukumudou. Dou dau cakava qo mo dou vakananumi au kina.” A vakayacora tale ga qori ena bilo waini damudamu, qai tukuna: “Na bilo qo e vakaibalebaletaka na veiyalayalati vou e vakadeitaki ena noqu dra, ena vakadavei ena vukumudou.”—Luke 22:19, 20.
3. (a) Na veisau levu cava a yaco ni mate oti ga o Jisu? (b) Na taro cava meda dui taroga nida dikeva na masu e volatukutukutaki ena Joni wase 17?
3 Sa voleka ni mai cava na veiyalayalati makawa ni Lawa erau veiyalayalati kina na Kalou kei Isireli. Sa na sosomitaka e dua na veiyalayalati vou, e veiyalayalati kina o Jiova kei ira na imuri lumuti i Jisu. Dua na ka nona kauaitaka vakalevu o Jisu na ituvaki vakayalo ni matanitu vou qori. Era sega mada ga ni duavata na Isireli vakayago mera sokalou vei Jiova, e vakarogorogocataki kina na yacana tabu. (Joni 7:45-49; Caka. 23:6-9) Ena yasana adua, e vinakata o Jisu mera duavata tiko ga na nona imuri me rawa nira cakacaka vata me vakalagilagi kina na yaca ni Kalou. Na cava gona sa qai cakava? A cabora na masu rogorogo vinaka duadua me bau wilika rawa e dua na tamata. (Joni 17:1-26; raica na iyaloyalo e cake.) Nida dikeva tiko na masu qori, e vinaka meda vakasamataka na taro qo, “Sa sauma na Kalou na masu i Jisu?” E dodonu tale ga meda dikevi keda da qai taroga, “E salavata kei na noqu bula na qaqanimasu qori?”
VEIKA E VAKABIBITAKA O JISU
4, 5. (a) Na cava eda vulica ena itekitekivu ni masu i Jisu? (b) E sauma vakacava o Jiova na veika e kerea o Jisu?
4 A vakavulici ratou nona tisaipeli o Jisu ena kilaka talei mai vua na Kalou, e yaco sara qori ena lomaloma ni bogi. Sa qai tacake i lomalagi me masu: “Tamaqu, sa yaco mai na gauna. Moni vakalagilagi luvemuni me rawa tale ga ni vakalagilagi kemuni na luvemuni, me vaka na nomuni solia vua me lewa na tamata kece, me na solia tale ga o koya na bula tawamudu vei ira kece oni solia vua. . . . Au sa vakalagilagi kemuni e vuravura ena noqu vakaotia na cakacaka oni lesia meu cakava. O koya gona Tamaqu, ni vakalagilagi au e yasamuni ena lagilagi a tu vei au niu se tiko e yasamuni ni bera o vuravura.”—Joni 17:1-5.
5 Raica mada na veika e vakabibitaka o Jisu ena itekitekivu ni nona masu. E kauaitaka vakabibi na nona vakalagilagi na Tamana vakalomalagi, qo e salavata vinaka kei na imatai ni ka e cavuta ena ivakarau ni masu a vakavulica vei ratou nona tisaipeli: “Tamai keimami, me dokai na yacamuni.” (Luke 11:2) Na ikarua ni ka e kauaitaka, oya na veika e baleti ratou nona tisaipeli, ‘me solia na Kalou vei ratou na bula tawamudu.’ Ni oti qori, a kerea o Jisu: “Tamaqu, ni vakalagilagi au e yasamuni ena lagilagi a tu vei au niu se tiko e yasamuni ni bera o vuravura.” O Jiova e qai vakaicovitaki Luvena yalodina, a sega ni solia wale ga na ka e kerea, ia e solia sara ga vua na “yaca e vinaka sara” e uasivi ira na agilosi kece.—Iper. 1:4.
‘KILAI KOYA NA KALOU DINA DUADUA GA’
6. Na cava e dodonu me ratou cakava na yapositolo me nodratou kina na bula tawamudu? Eda kila vakacava ni ratou qai rawata?
6 A masulaka tale ga o Jisu na ka e dodonu meda cakava na tamata ivalavala ca me noda kina na iloloma soliwale ni bula tawamudu. (Wilika Joni 17:3.) E kaya ni dodonu meda “vulica tiko ga” na veika me baleti koya na Kalou kei Karisito. Dua na sala eda na vakayacora kina qori, oya na noda vakayagataka na matada kei na daligada meda vulica e levu tale na ka me baleti Jiova kei na Luvena. Na ikarua ni ikalawa bibi oya meda marautaka ni muria na ka eda vulica me baleti koya. Eratou muria vinaka na yapositolo na rua na ikalawa qori, e cavuta kina o Jisu ena nona masu: “Au sa solia vei iratou na vosa oni a solia vei au, eratou sa ciqoma.” (Joni 17:8) Ia me rawati na bula tawamudu, e dodonu me ratou vakasamataka tiko ga vakatitobu na vosa ni Kalou ratou qai bulataka. Vakacava eratou vakayacora vinaka qori na yapositolo yalodina me yacova ni ratou sa vakacavara na nodratou bula e vuravura? Io. Eda kila qori baleta ni a volai na yacadratou ena 12 na vatu e yavu ni koro o Jerusalemi Vou e Lomalagi.—Vkta. 21:14.
7. Na cava e kena ibalebale meda “kila” na Kalou, cava e bibi kina qori?
7 Era tukuna na dauvakadikeva na vosa vaKirisi, ni vosa vaKirisi e vakadewataki me “vulica tiko ga” e rawa ni tale ga ni vakadewataki me “kila tiko ga” se “meda kua ni cegu noda kila.” E tautauvata na ibalebale ni vosa ruarua qori, rau bibi tale ga. Na ivakamacala e ra ni Joni 17:3 ena Reference Bible e vakayagataka e dua tale na ivakadewa, me “nodra kilai iko tiko ga.” Koya gona na noda “vulica tiko ga,” e dusia na kena tomani tiko ga na noda vulica e levu tale na ka me baleti koya na Kalou. Ia e sega wale ga ni okati e keri na noda mai kila na nona itovo kei na nona inaki. E okati kina na noda veivolekati sara ga kei Jiova kei ira eda vakabauta vata. E kaya na iVolatabu: “O koya e sega ni dau loloma e sega ni kila na Kalou.” (1 Joni 4:8) Koya gona, noda mai kila na Kalou e okati kina noda talairawarawa vua. (Wilika 1 Joni 2:3-5.) Dua dina na itavi dokai meda okati meda kilai Jiova! Ia e rawa nida vakayalia na veiwekani talei qori, me vaka a yaco vei Jutasa Isikarioti. Koya gona, meda saga tiko ga me vinaka na veiwekani qori. Sa na qai rawa ni noda na iloloma soliwale ni bula tawamudu.—Maciu 24:13.
“ENA VUKU NI YACAMUNI”
8, 9. Na cava e bibi duadua vei Jisu ena nona cakacaka vakaitalatala e vuravura, kei na ivakarau vakalotu cava e cata o koya?
8 Nida wilika na masu i Jisu e volatukutukutaki ena Joni wase 17, eda nuidei ni o Jisu e lomani ira nona yapositolo ena gauna oya, e lomani ira tale ga nona tisaipeli ena veigauna se bera mai. (Joni 17:20) Ia meda nanuma tiko ni sega ni bibi duadua vei Jisu na noda vakabulai. Me tekivu mai nona bula me yacova nona mate, e bibi duadua ena nona cakacaka vakaitalatala e vuravura me vakalagilagia qai vakacerecerea na yaca i Tamana. Kena ivakaraitaki, ni tukuna tiko nona ilesilesi ena valenilotu e Nasareci, a wilika sara o Jisu na ivolavivigi nei Aisea: “Sa tu vei au na yalo i Jiova, e lumuti au meu vunautaka na itukutuku vinaka vei ira na dravudravua.” Sega ni vakabekataki ni a cavuta sara ga vakamatata o Jisu na yaca ni Kalou ena gauna e wilika kina na tikinivolatabu qori.—Luke 4:16-21.
9 Ni bera ni gole mai vuravura o Jisu, e dau nodrau ivakarau na iliuliu ni lotu Jiu mera uqeti ira na lewenivanua mera kua ni vakayagataka na yaca ni Kalou. Eda kila ni a cata sara ga o Jisu na ivakavuvuli qori e sega ni yavutaki vakaivolatabu. E kaya vei ira na dauveitusaqati: “Au lako mai ena yaca i Tamaqu, ia oni sega ni vakabauti au; ke lako mai e dua tale ena yacana ga, oni na vakabauti koya.” (Joni 5:43) Ni vo e vica na siga me mate, a vakaraitaka o Jisu na veika e bibi ena nona bula ena nona masuta: “Tamaqu, moni vakalagilagia na yacamuni.” (Joni 12:28) Nida veivosakitaka tiko qo na qaqanimasu i Jisu, meda kua ni kurabuitaka nona kauaitaka vakabibi na yaca i Tamana.
10, 11. (a) Na cava e okati ena nona vakatakila o Jisu na yaca i Tamana? (b) Na cava mera sasagataka na tisaipeli i Jisu?
10 A masuta o Jisu: “Au sa vakatakila na yacamuni vei iratou oni solia vei au e vuravura. Eratou a nomuni, ia oni soli iratou vei au, eratou sa mai muria tale ga na nomuni vosa. Au sa sega tale ni tiko e vuravura, eratou se tiko e vuravura, ia o yau au sa lako yani vei kemuni. Tamaqu yalosavasava, ni taqomaki iratou ena vuku ni yacamuni oni a vakatokai au kina, me ratou duavata me vaka na nodaru duavata.”—Joni 17:6, 11.
11 Na nona vakatakila na yaca i Tamana vei ratou na nona tisaipeli e sega ni okati ga kina na nona vakayagataka na yaca qori. E vukei ratou sara ga me ratou kila na ibalebale ni yaca ni Kalou, vakabibi na nona itovo totoka kei na ka e cakava vei keda. (Lako 34:5-7) Kena ikuri, ena nona itutu lagilagi e lomalagi, e vukei ira tiko ga na nona tisaipeli o Jisu mera vakatakila na yaca i Jiova e vuravura taucoko. Na cava e kena inaki? Mera kumuni e levu na tisaipeli ni bera na icavacava ni ituvaki ca qo. Sa na qai vakacerecerea o Jiova na yacana ena nona vakabulai ira na nona ivakadinadina yalodina!—Isik. 36:23.
“ME KILA O VURAVURA”
12. Na cava e tolu na ka bibi e dodonu meda vakayacora me rawa nida qarava vinaka kina na cakacaka ni veivakabulai?
12 Ni se bula voli e vuravura o Jisu, dua na ka nona saga me vukei ratou nona tisaipeli me ratou valuta na nodratou malumalumu. E bibi dina qori baleta ni rawa ni ratou vakaotia kina na cakacaka a tekivutaka o Jisu. E masuta o Jisu: “Me vaka ga nomuni talai au i vuravura, au sa talai iratou tale ga i vuravura.” E vakabibitaka o Jisu e tolu na ka me ratou cakava nona tisaipeli me rawa ni ratou vakayacora vinaka na cakacaka ni veivakabulai qo. Kena imatai, a masulaka me ratou kua ni tiki ni vuravura tawasavasava i Setani. Kena ikarua, a masulaka me ratou vakasavasavataki se me ratou vakatabui tiko ga, qori nodratou bulataka na ka dina mai na Vosa ni Kalou. Kena ikatolu, a kerea vakavica o Jisu me vakaduavatataki ratou na nona tisaipeli na ivau ni loloma, me vaka ga na ivau ni loloma e vauci koya kei Tamana. E vinaka gona meda dui dikevi keda da qai taroga: ‘Vakacava e salavata kei na noqu bula na tolu na ka e kerea o Jisu?’ Nida cakava qori, e nuidei o Jisu ni na ‘kila o vuravura ni talai koya mai na Kalou.’—Wilika Joni 17:15-21.
13. A saumi vakacava na masu i Jisu ena imatai ni senitiuri S.K.?
13 Nida vulica na ivola na Cakacaka, eda raica kina ni a sauma o Jiova na masu i Jisu. Vakasamataka mada na ka e rawa ni vakavuna na nodra veisei na lotu vaKarisito taumada, nira lewena na ivavakoso na Jiu kei ira na kai veimatanitu, ira na vutuniyau kei ira na dravudravua, ira na bobula kei ira na turaga. Ia era mai cakacaka vakavoleka sara, era vaka na veitikiniyago era cakacaka vata qai uludra o Jisu. (Efeso 4:15, 16) Qori e dua dina na ka vakatubuqoroqoro, vakabibi nira bula tu ena vuravura i Setani e kune kina na veisei! Na veika kece qo e lagiti ga kina o Jiova, ni vakayagataka na kaukaua ni yalona tabu me vakayacora kina qori.—1 Kor. 3:5-7.
14. E saumi vakacava na masu i Jisu ena noda gauna?
14 E ka ni rarawa ni gauna eratou takali kina na yapositolo, sa mai cava tale ga e keri na duavata qori. Me vaka ga e sa parofisaitaki tu, a basika ena kedra maliwa na vukitani, vakavuna me tauyavutaki kina na matalotu ribatani ena Lotu ni Veivanua Vakarisito, ra qai sega ni dau duavata. (Caka. 20:29, 30) Ia ena 1919, e sereki ira na nona imuri lumuti o Jisu mai na veivakabobulataki ni lotu lasu qai kumuni ira ena “ivau vinaka duadua ni duavata.” (Kolo. 3:14) E tarai ira vakacava na lewe i vuravura na nodra cakacaka vakavunau? Sa sivia qo e vitu na milioni na nodra itokani era ‘so tale na sipi’ mai na “veimatanitu, veiyavusa, veimatatamata, kei na duivosavosa” era sa mai duavata kei ira na lumuti ni Kalou. (Joni 10:16; Vkta. 7:9) Sa bau vakatubuqoroqoro dina na kena saumi na masu i Jisu, “me kila o vuravura ni oni [Jiova] talai au mai, oni lomani ira tale ga me vaka nomuni lomani au”!—Joni 17:23.
IOTIOTI NI VAKAMAMASU E VURAVURA
15. Na cava a kerea o Jisu ena vukudra na nona tisaipeli lumuti?
15 Ena yakavi bogi ena ika14 ni Naisani, a vakalagilagi ratou se rokovi ratou nona yapositolo o Jisu ena nona cakava e dua na veiyalayalati me ratou veiliutaki kei koya ena nona Matanitu. (Luke 22:28-30; Joni 17:22) A masuta gona o Jisu me baleti ira kece era na qai mai nona imuri lumuti: “Tamaqu, au vinakata mera tiko tale ga ena vanua au tiko kina o ira oni solia mai vei au, mera raica na nomuni vakalagilagi au, ni oni lomani au ni bera na ivakatekivu kei vuravura.” (Joni 17:24) Era sega ni vuvutaka qori na so tale na sipi i Jisu, ia era marautaka ga. Qori e vakadinadinataka vakalevu na duavata e kune ena keda maliwa na lotu vaKarisito dina e vuravura nikua.
16, 17. (a) Ena itinitini ni masu i Jisu, na cava e vakadeitaka ni na cakava tiko ga? (b) Na cava meda vakadeitaka meda cakava?
16 Ena nodra veivakamuai na iliuliu ni lotu, e dua na wase levu ni tamata e vuravura era vakalecalecava na ivakadinadina matata ni tiko na tamata i Jiova era kilai koya vinaka ra qai duavata. Qori tale ga na ka e yaco ena gauna i Jisu. A tinia na nona masu ena nona kaya: “Tamaqu yalododonu, e sega sara ni kilai kemuni o vuravura, ia au kilai kemuni, o iratou tale ga qo eratou sa kila ni oni talai au mai. Au sa vakatakila vei iratou na yacamuni au na vakatakila tiko ga, me rawa ni ratou veilomani ena loloma vata ga oni lomani au kina, meu duavata tale ga kei iratou.”—Joni 17:25, 26.
17 Eda sega ni vakabekataka ni salavata kei na ivakarau ni bula i Jisu na veika e masulaka. Ni Ulu ni ivavakoso, e tomana tiko ga na nona vakatakila na Yaca i Tamana kei na nona inaki. Koya gona, meda vakamalumalumu tiko ga ena nona veiliutaki, ena noda gumatua ni muria nona ivakasala meda vunau da qai veivakatisaipelitaki. (Maciu 28:19, 20; Caka. 10:42) Meda sasagataka tale ga meda duavata tiko ga. Nida vakayacora qori, sa na salavata kei na noda bula na qaqanimasu i Jisu, ena vakalagilagi kina na yaca i Jiova da qai marau tawamudu.