E Sega ni iTinitini ni Ka Kece o Mate!

Na koro lailai o Pecani e rauta ni 3 na kilomita mai Jerusalemi. (Joni 11:18) Ni vo ga e vica na macawa me mate o Jisu, a tauvimate bibi o Lasarusa na nona itokani voleka, mani mate sara.

Ni rogoca o Jisu na ka e yaco, e tukuna sara vei ratou na nona tisaipeli ni sa moce o Lasarusa, ena lako me lai vakayadrati koya. (Joni 11:11) Ia ratou sega ni kila na tisaipeli na ibalebale ni ka e tukuna, mani kaya vei ratou: “Sa mate o Lasarusa.”​​—⁠Joni 11:⁠14.

E yaco yani i Pecani o Jisu ni oti e va na siga na nona mate o Lasarusa. A lako sara me lai vakacegui Marica na ganei Lasarusa. E kaya o Marica: “Turaga, ke oni a tiko eke, ke a sega ni mate o ganequ.” (Joni 11:​17, 21) E kaya vua o Jisu, “O yau na tucake tale kei na bula. O koya e vakabauti au, ke mani mate, ena bula tale.”​​—⁠Joni 11:⁠25.

A vakadeitaka sara ga o Jisu na ka e tukuna qori ena nona lako ina ibulubulu qai kaci vakadomoilevu: “Lasarusa, lako mai tuba!” (Joni 11:43) Dua na ka na nodra kurabui na tu e kea ni sa lako mai tuba o Lasarusa.

Ni bera ni vakaturi Lasarusa o Jisu, sa vakaturi rau oti e le rua. E dua vei rau na luvei Jairo yalewa. E tukuna tale ga o Jisu ena gauna e vakarau vakaturi koya kina ni moce ga.​​—⁠Luke 8:​52.

Ena rua na veivakaturi qori e tukuna o Jisu ni mate e vaka ga na moce. E veiganiti dina na nona vakatauvatana na mate kei na moce. Na cava na vuna? Nida moce eda sega ni vakila e dua na ka, qori e vakaibalebaletaka vinaka na kedra ituvaki na mate nira sa sega ni vakila na mosi kei na rarawa. (Dauvunau 9:5; raica na kato, “Na Mate e Vaka na Moce.”) Era kila vinaka na tisaipeli taumada i Jisu na kedra ituvaki dina na mate. E kaya na ivola na Encyclopedia of Religion and Ethics (ivola ni lotu kei na kena itovo): “Vei ira na imuri i Jisu na mate e vaka ga na moce, na ibulubulu e vanua ni vakacegu . . . vei ira na mate ena vakabauta.”a

E veivakacegui dina nida kila ni o ira na mate era moce tu ena ibulubulu, era sega ni vakararawataki tiko ena dua tale na vanua. Nida kila na kedra ituvaki dina na mate, e sega ni dodonu meda rerevaki ira tale tiko.

“KEVAKA SA CIBA NA TAMATA, ENA BULA TALE?”

Eda taleitaka meda moce vinaka ena bogi, ia eda sega ga ni vinakata meda moce vakadua. Eda na kila vakacava nira na vakaturi tale na tu ena ibulubulu, me vakataki Lasarusa kei na luvei Jairo yalewa?

E taroga tale ga qori na peteriaki o Jope ni sa vakarau mate. E kaya: “Kevaka sa ciba na tamata, ena bula tale?”​—Jope 14:14.

A vosa tiko vua na Kalou Kaukaua Duadua o Jope, ia e sauma tale na nona taro qai kaya: “Ko ni na kaci mai, ka’u na rogo yani vei kemuni: Ko ni na vinakata na cakacaka ni ligamuni.” (Jope 14:15) A nuidei o Jope ni vinakata sara ga o Jiova me vakaturi ira na nona tamata yalodina. E tatadrataka beka ga o Jope na ka kece qori? Sega.

Na nona veivakaturi o Jisu e ivakadinadina matata ni a solia vua na Kalou na kaukaua me vakaotia na mate. Na iVolatabu mada ga e vakaraitaka ni sa tu vei Jisu ena gauna qo na “ki ni mate.” (Vakatakila 1:18) Na ki qori ena dolava kina o Jisu na matamata ni ibulubulu, me vaka ga na nona vakarota me kau tani na vatu ena ibulubulu i Lasarusa.

E tukuni vakavica ena iVolatabu na yalayala ni veivakaturi. E dua na agilosi a tukuna vua na parofita o Taniela: “Ko na vakacegu, ka tu e na nomui votavota ni sa yaco na kenai otioti [“se icavacava ni gauna,” NW].” (Taniela 12:13) A tukuna o Jisu vei ira na Setoki, ira na iliuliu Jiu era sega ni vakabauta na yalayala ni veivakaturi: “E cala na nomuni rai, oni sega ni kila na iVolatabu se na kaukaua ni Kalou.” (Maciu 22:23, 29) E tukuna na yapositolo o Paula: “Au nuitaka na Kalou . . . nira na vakaturi mai na mate na yalododonu kei ira na sega ni yalododonu.”​—Cakacaka 24:15.

ERA NA VAKATURI E NAICA NA MATE?

Era na vakaturi ena gauna cava na yalododonu kei ira na sega ni yalododonu? E tukuna na agilosi vua na turaga yalodina o Taniela ni na vakaturi tale ena “icavacava ni gauna.” A vakabauta tale ga o Marica ni na “tucake . . . ena gauna ni veivakaturi ena iotioti ni siga” na ganena o Lasarusa.​—Joni 11:24.

Na iVolatabu e dusia ni “iotioti ni siga” e vakaibalebaletaka na gauna ena veiliutaki kina na Matanitu i Karisito. A vola o Paula: “Ni dodonu me veiliutaki tiko vakatui [o Karisito] me yacova nira sa vakamalumalumutaki kece na meca e ruku ni yavana. Na iotioti ni meca me vakamalumalumutaki o mate.” (1 Korinica 15:25, 26) Qori na vuna e bibi kina meda masuta me yaco mai na Matanitu ni Kalou, me caka tale ga na lomana e vuravura.b

A kila vinaka tu o Jope ni vinakata na Kalou me vakaturi ira na mate. Ena gauna qori, sa na oti vakadua o mate. Sa na sega tale ni dua e taroga, ‘E itinitini ni ka kece o mate?’