Na Cava sa Cakava na Kalou ena Vukumu?

Qori na tikinivolatabu kilai levu ena iVolatabu taucoko, e vakayagataki tale ga vakawasoma. Na tikinivolatabu qo e “vakaraitaka sara ga na sala me rawati kina na bula kei na noda veiwekani kei na Kalou.” Ena so gona na vanua, na tikinivolatabu qo se na “Joni 3:16” e dau vakayagataki ena soqo, kabi ena motoka, lalaga kei na so tale na vanua.

Kena irairai ni o ira era cakava qori era vakabauta ni nona loloma na Kalou era sa na rawata kina na bula. Vakacava mada o iko? Na cava na nomu nanuma me baleta na loloma ni Kalou? Na cava sa cakava na Kalou me ivakaraitaki ni nona lomani iko?

“SA LOMANI IRA NA KAI VURAVURA . . . NA KALOU”

E levu era via vakavinavinakataka na Kalou ni bulia na vuravura, veikabula, kei na tamata. Na maqosa ni nodra buli na veikabula, e dusia ni dua na dauveibuli vuku e buli ira. E dua na iwiliwili levu era vakavinavinakataka na Kalou e veisiga me baleta na isolisoli ni bula. Eda kila ni Kalou ga e vakarautaka na ka kece e gadrevi meda bula kina, me vaka na cagi, wai, kakana, kei na italetale ena noda vuravura, meda marautaka tale ga na ka eda cakava.

Meda vakavinavinakataka gona na Kalou ena veika qori, ni o koya ga e buli keda e vakarautaka tale ga na veika me baleta na noda bula. (Same 104:10-28; 145:15, 16; Cakacaka 4:24) E rawa nida vakavinavinakataka tale ga na nona lomani keda nida vakasamataka na ka kece e cakava. E tukuna kina na yapositolo o Paula: “[Na Kalou] e solia vei keda na bula, na icegu, kei na ka kece ga. Ni o koya ga a buli keda, e vakatau tale ga vua na noda bula tiko kei na noda yavala.”—Cakacaka 17:25, 28.

Ia e sega ni vakavotui ga na nona lomani keda na Kalou ena veika vakayago e vakarautaka. Eda a buli meda kauaitaka na veika vakayalo qai vukei keda meda rawata qori, oya na vuna eda duidui kina vei ira na manumanu. (Maciu 5:3) Qo na sala ena rawa kina vei ira na kawatamata talairawarawa mera wili ena vuvale ni Kalou mera “luvena.”—Roma 8:19-21.

E tomana na Joni 3:16, na nona lomani keda na Kalou e tala kina na Luvena o Jisu i vuravura me vakavulica vei keda na veika me baleta na nona Kalou, e Tamana, me mai mate tale ga ena vukuda. Ia e levu era na tukuna nira sega ni kila na vuna me mate kina o Jisu ena vukuda, kei na nona mate e ivakaraitaki vakacava ni nona loloma na Kalou. Meda raica mada na ka e tukuna na iVolatabu na vuna e mate kina o Jisu kei na kena yaga.

“[E] SOLIA . . . NA LUVENA E DUA BAUGA SA VAKATUBURA”

E sega ni dua ena galala mai na tauvimate, bula vaqase kei na mate. Qo a sega ni nona inaki taumada na Kalou o Jiova. A nona inaki vei rau na imatai ni tamata me rau bula tawamudu ena parataisi e vuravura. Ia e dua na ka me rau cakava: Me rau talairawarawa, ke sega e tukuna na Kalou ni rau na mate. (Vakatekivu 2:17) Erau mani talaidredre ena veiliutaki ni Kalou, e vakavuna me rau mate, wili tale ga kina o ira na nodrau kawa. E vakamacalataka na yapositolo o Paula: “Ena vuku ni dua ga na tamata e curu kina i vuravura na ivalavala ca kei na mate ena vuku ni ivalavala ca, mani dewa na mate vei ira na tamata kece ga ni sa valavala ca na tamata kece ga.”—Roma 5:12.

Ia na Kalou e “vinakata na ka [se “lewa,” NW] dodonu.” (Same 37:28) A sega ni vakalecalecava na nodrau nakita na imatai ni tamata na nodrau talaidredre, e sega tale ga ni vakalaiva me rarawa se me tawamudu na nodra mate tiko na kawatamata ena vuku ni nona talaidredre e le dua. Kena veibasai e vakarautaka na sala mera rawata na bula tawamudu o ira era talairawarawa vua qai yavutaki ena lewadodonu me isau ni “mate na mate.” (Lako Yani 21:23) Na taro: Ena vakalesui mai vakacava na bula uasivi a vakayalia o Atama? Kena isau: E dua me solia se cabora na nona bula uasivi e veirauti kei na bula uasivi a vakayalia o Atama.

E macala ni sega ni dua na kawa i Atama ivalavala ca e rawa ni cakava qori, ia o Jisu ga. (Same 49:6-9) O koya e uasivi me vakataki Atama na gauna a buli kina. Ena nona solia o Jisu na nona bula, sa voli keda kina na kawatamata mai na noda vakabobulataki ena ivalavala ca. Na ka e cakava o Jisu e rawa kina meda marautaka na bula uasivi vata ga a vakayalia o Atama. (Roma 3:23, 24; 6:23) Na cava meda cakava me yaga vei keda na iloloma uasivi qo?

“KO IRA YADUA ERA SA VAKABAUTI KOYA”

Nida raica tale na Joni 3:16, e tukuna “me kakua ni rusa ko ira yadua era sa vakabauti koya [Jisu], me ra rawata ga na bula tawa mudu.” Kena ibalebale ni tiko na ka meda cakava. Meda ‘rawata na bula tawamudu,’ ena vinakati meda vakabauti Jisu, meda talairawarawa tale ga vua.

De o na lomatarotarotaka: ‘Na cava e vinakati kina na talairawarawa? A sega beka ni tukuna o Jisu, ni “ko ira yadua era sa vakabauti koya” ‘era na rawata na bula tawamudu?’ Io, e bibi na vakabauta. Ia e bibi tale ga meda nanuma ni so tale na ka e okati ena noda vakabauta ni bula tiko o Jisu. Ena ivola na Vine’s Expository Dictionary of Old and New Testament Words, na vosa e vakayagataka o Joni ena vosa taumada e tiko kina na vakasama “ni veinuitaki, sega ni vakabauta wale ga.” Me vakadonui keda na Kalou eda na sega ni vakasamataka wale tu ga ni o Jisu na iVakabula. Eda na yalomalumalumu meda bulataka na ka a vakavulica. Ke sega ni cakacakataki ena maumau wale na noda vakabauta. E tukuna na iVolatabu: “Ena mate . . . na vakabauta e sega ni cakacakataki.” (Jemesa 2:26) E rawa ni tukuni ni o koya e vakabauti Jisu me laurai ena nona bula na ka e vakabauta.

E vakamacalataka kina o Paula na tikina qori: “Ni uqeti keitou na loloma i Karisito, e va kina qo na neitou lewa, e mate e le dua ena vukuda kece; baleta nida mate kece . . . E mate ena vukuda kece mera kua kina ni bula ena vukudra ga o ira era bula tiko, mera bula ga ena vuku i koya e mate ena vukudra, qai vakaturi.” (2 Korinica 5:14, 15) Na noda vakavinavinakataka na isoro a cabora o Jisu ena uqeti keda meda veisautaka na ivakarau ni noda bula—meda bula ena vukui koya a mate ena vukuda, o Jisu. Meda raica ni bibi meda bulataka na ka a vakavulica. Na veisau eda cakava ena tara na noda bula kece, wili kina na noda itovo, vakatulewa kei na ka kece eda cakava. Na cava na nodra icovi o ira era vakabauti Jisu ra qai cakacakataka na ka era vakabauta?

“ME KAKUA NI RUSA . . . , ME RA RAWATA GA NA BULA TAWA MUDU”

Na iotioti ni tikina ena Joni 3:16 e vakaraitaka na yalayala ni Kalou me baleti ira era vakabauta na ivoli qai salavata na nodra bula kei na ivakatagedegede ni Kalou. E inaki ni Kalou mera “kakua ni rusa . . . , me ra rawata ga na bula tawa mudu” na tamata yalodina va qori. Ia o ira era vakalougatataki ena nona loloma na Kalou e sega ni tautauvata na nodra inuinui.

E yalataka o Jisu ina dua na ilawalawa na bula tawamudu i lomalagi. A vakamatatataka vei ratou na nona tisaipeli yalodina ni na lai vakarautaka e dua na tikina me nodratou me ratou na veiliutaki vata ena nona Matanitu. (Joni 14:2, 3; Filipai 3:20, 21) O ira na vakaturi mera bula i lomalagi era “na bete ni Kalou kei Karisito, era na veiliutaki vakatui vata kei koya me duanaudolu na yabaki.”—Vakatakila 20:6.

E dua ga na iwiliwili lailai ni imuri i Karisito ena soli vei ira na itavi dokai qori. A kaya kina o Jisu: “Dou kua ni rere na qelenisipi lailai, ni sa vakadonuya na Tamamudou me solia vei kemudou na matanitu.” (Luke 12:32) Era le vica mada na “qelenisipi lailai”? E kaya na Vakatakila 14:1, 4: “Niu rai yani, au raica sara na Lami [Jisu Karisito sa vakaturi oti] ni tucake tu ena ulunivanua o Saioni, era tucake vata tu kei koya e duanadrau vasagavulukava na udolu, e volai e yadredra na yacana kei na yaca i Tamana. . . . Era voli mai ena kedra maliwa na kawatamata mera isevu vua na Kalou kei na Lami.” Ni vakatauvatani kei ira na bilioni era bula tu e vuravura, o ira na “qelenisipi lailai” e 144,000 ga na kedra iwiliwili. E tukuni ni o ira qo era tui, ia o cei ena vakarurugi ena nodra veiliutaki?

E vakamacalataka o Jisu na ikarua ni ilawalawa yalodina era na vakalougatataki ena veiliutaki ni Matanitu vakalomalagi. Ena Joni 10:16, e tukuna o Jisu: “Eso tale noqu sipi era sega ni tiko ena bai qo au na kauti ira tale ga mai, era na rogoca na domoqu, ena qai dua ga na qelenisipi, dua ga na kena ivakatawa.” Era vakanamata na ‘so tale na sipi’ qori ena bula tawamudu e vuravura, na bula rau a marautaka taumada o Atama kei Ivi. Eda kila vakacava nira na bula ga e vuravura?

E levu na ituvaki e tukuni ena iVolatabu e baleta na Parataisi e vuravura. Mo vakadinadinataka qori, o rawa ni wilika ena nomu iVolatabu na tikinivolatabu qo: Same 37:9-11; 46:8, 9; 72:7, 8, 16; Aisea 35:5, 6; 65:21-23; Maciu 5:5; Joni 5:28, 29; Vakatakila 21:4. E parofisaitaki ena tikinivolatabu qori ni na muduki na ivalu, dausiga, tauvimate, kei na mate. E tukuna tale ga na gauna sa na rawa kina vei ira na tamata talairawarawa mera tara na nodra vale, teivaka na nodra qele, ra susugi luvedra ena itikotiko e sega kina na leqa.a O taleitaka mo bula ena ituvaki ya? E tiko na vuna vinaka meda vakabauta kina ni sa voleka sara me vakayacori na yalayala qori.

LEVU NA KA SA CAKAVA NA KALOU

Ke o vakasamataka na ka kece sa cakava vei iko na Kalou kei na vo ni kawatamata, e macala ni levu sara na ka sa cakava oti. E solia vei keda na bula, vuku, kei na veika e gadrevi meda bula kina. Sega ni koya ga qori, na ivoli a vakarautaka na Kalou ena nona mate o Jisu ena vukuda, ena rawa nida vakalougatataki kina me vaka eda vulica ena Joni 3:16.

Na bula tawamudu ena vuravura ni vakacegu sa na sega ni leqataki kina na tauvimate, ivalu, dausiga, se mate, e dusia na veivakalougatataki kei na marau e tawamudu. Mo rawa ni bula kina ena vakatau sara ga vei iko. Ia e dua na taro qo, Na cava o sa cakava tiko vua na Kalou?