Na Cava Meda “Tukuna Vua na Tamata Yadua”?

1, 2. (a) Tukuna na ivakaraitaki e laurai kina na bibi ni kena digitaki vinaka na taro. (Raica na imatai ni iyaloyalo.) (b) Na cava meda kua kina ni lomaleqataka eso na ulutaga dredre?

ENA vica na yabaki sa oti, rau veivosakitaka tiko na iVolatabu e dua na tacida yalewa kei na watina e sega ni tiko ena dina. A lewena tu o tagane e dua na lotu ni Veivanua Vakarisito. Ni rau veivosaki tiko, a tukuna sara o tagane ni vakabauta na Le Tolu Vakalou. Nona kila na tacida yalewa ni rairai sega ni kila kece o watina na ivakavuvuli ni Le Tolu Vakalou, a taroga sara vakamatau, “O vakabauta ni Kalou na Kalou, Kalou o Jisu, e Kalou tale ga na yalo tabu; ia me qai dua ga na Kalou, sega ni tolu?” E kidroa sara ga o watina, mani kaya, “Sega, au sega ni vakabauta qori!” A mani yaco me veitalanoataki vinaka sara kina na ka dina me baleta na Kalou.

² E laurai mai na ivakaraitaki qori ni bibi meda vakayagataka vakamaqosa na taro, me qai digitaki vinaka. Qo tale ga na ka eda vulica kina: E sega ni dodonu meda lomaleqataka na ulutaga dredre me vaka na Le Tolu Vakalou, na kama i eli, se noda vakabauta ni bula tiko na Dauveibuli. Ke da nuitaki Jiova kei na nona veivakavulici, ena rawa ni veirawai na ka eda tukuna, na kena e rawa ni uqeta na lomadra na vakarorogo. (Kolo. 4:6) Meda dikeva mada qo na ka era dau cakava na dautukutuku maqosa nira veivosakitaka na ulutaga va qori. Eda na veivosakitaka na sala (1) meda vakayagataka kina na taro me rawa nida takiva kina na ka e tu ena lomana e dua, (2) vakamacalataka na ka e tukuna na iVolatabu, (3) vakayagataka na vosa vakatautauvata me vakabibitaka e dua na vakasama.

TARO MO TAKIVA NA KA E TU E LOMADRA

3, 4. Na cava e bibi kina na taro meda kila kina na nona vakabauta e dua? Tukuna na kena ivakaraitaki.

³ Ena vukei keda na taro meda kila kina na nona vakabauta e dua. Na cava e bibi kina qori? E kaya na Vosa Vakaibalebale 18:13: ‘O koya sa vosa e na ka ni sa bera ni rogoca na ka dina, sa ka lialia vua ka sa ka me madua kina.’ Io, ni bera nida lai veivosakitaka na rai vakaivolatabu me baleta e dua na ulutaga, e bibi meda kila na ka era vakabauta dina na vakarorogo. Ke sega, eda na rawa ni vakalusi gauna wale tu ga ena noda vakalasuya e dua na ka era sega dina ni vakabauta!—1 Kor. 9:26.

⁴ Kaya mada nida veivosakitaka tiko na ivakavuvuli me baleti eli. Eso era sega ni vakabauta ni o eli e vanua ni veivakararawataki e tu kina na bukawaqa. E levu era vakabauta ni qo na ituvaki e sotava e dua ni yawaka na Kalou. Koya gona, de dua eda rawa ni kaya: “E duidui na noda rai me baleti eli, ia cava beka nomuni nanuma me baleta na tikina qo?” Nida sa kila na nona isaunitaro, eda na qai rawa ni vukei koya vinaka me kila na ka e kaya na iVolatabu me baleta na ulutaga qori.

5. E yaga vakacava na taro meda kila kina na vuna e duatani kina nona vakabauta e dua?

⁵ Nida vakayagataka tale ga vakamaqosa na taro, eda na kila kina na vuna e va kina ya nona vakabauta. Kena ivakaraitaki, vakacava ke da sotava e dua ena cakacaka vakaitalatala e sega ni vakabauta na Kalou? De dua ena totolo ga noda nanuma ni sa vakamuai koya tu na rai vakatamata, me vaka na ivakavuvuli ni bula vakaidewadewa. (Same 10:4) Ia eso era sega ni vakabauta na Kalou ena levu ni veika rarawa era raica se ra vakila. De dua qori na vuna era sega ni ciqoma rawa kina ni bula dina tiko na Dauveibuli yalololoma. Ke lomatarotarotaka gona na itaukeinivale nona bula dina tiko na Kalou, eda rawa ni taroga, “Vakacava e dau va tu ga qori nomuni rai?” Ke kaya sega, eda rawa ni taroga ke tiko e dua na ka e vakavuna nona lomatarotaro. Nona isaunitaro eda na kila kina na sala vinaka duadua meda vukei koya kina vakayalo.—Wilika Vosa Vakaibalebale 20:5.

6. Na cava meda cakava nida sa taroga oti e dua na taro?

⁶ Ni sa tarogi oti na taro, e bibi meda vakarogoca vinaka na nona isaunitaro da qai doka na nona rai. Kena ivakaraitaki, ena rairai tukuna ni lomatarotarotaka nona bula dina tiko na Dauveibuli yalololoma ena vuku ni ka vakaloloma e sotava. Ni bera nida vakadinadinataka ni bula dina tiko na Kalou, eda na duavata kei koya ena ka e rarawataka da qai tukuna vua ni sega ni cala ke da lomatarotarotaka na vuna e yaco kina qori. (Apak. 1:2, 3) Noda vosovoso kei na noda loloma ena rawa ni uqeti koya me via kila e levu tale na ka.a

VAKAMACALATAKA NA IVOLATABU

7. E vakatau vakalevu ena cava na vuavuaivinaka ni noda cakacaka vakaitalatala?

⁷ Meda dikeva mada qo na sala eda rawa ni vakamacalataka kina na ka e kaya na iVolatabu. Na iVolatabu e noda iyaragi bibi duadua ena cakacaka vakaitalatala. E ‘vakarautaki keda vinaka meda tu vakarau, meda vakayacora na cakacaka vinaka kece.’ (2 Tim. 3:16, 17) Na vuavuaivinaka ni noda cakacaka vakaitalatala e sega ni vakatau ena levu ni tikinivolatabu eda wilika, ia e vakatau ena noda vakamacalataka vakavinaka na tikinivolatabu e wiliki. (Wilika Cakacaka 17:2, 3.) Meda dikeva mada qo e tolu na ituvaki.

8, 9. (a) Na cava e dua na sala eda rawa ni vakamacala kina vua e dua e vakabauta ni tautauvata o Jisu kei na Kalou? (b) Na cava eso tale na ivakamacala me baleta na ulutaga qo o raica ni laulau?

⁸ Kena imatai: Eda sotava e dua ena cakacaka vakaitalatala e vakabauta ni tautauvata o Jisu kei na Kalou. Na tikinivolatabu cava eda rawa ni vakayagataka? De dua eda na sureti koya me wilika na Joni 6:38, e tukuna kina o Jisu: “Au sega ni lako sobu mai lomalagi meu cakava ga na lomaqu, na loma i koya ga e talai au mai.” Nida veivosakitaka oti na tikinivolatabu qori, eda rawa ni taroga sara: “Ke Kalou o Jisu, o cei e tiko mai lomalagi e talai koya sobu mai vuravura? Vakacava ena sega ni kaukaua cake vei Jisu o koya e talai koya mai vuravura? E macala ga ni cecere o koya e veitalai.”

⁹ Eda rawa ni wilika tale ga na Filipai 2:9, e vakamacalataka kina na yapositolo o Paula na ka e cakava na Kalou ni sa mate o Jisu kei na nona vakaturi. E tukuni ena tikinivolatabu qori: “E vakacerecerei koya [Jisu] kina na Kalou ena dua na itutu cecere qai solia vakayalololoma vua na yaca e uasivia na vo tale ni yaca.” Me rawa ni vakavure vakasama vua na tikinivolatabu ya, eda rawa ni taroga: “Ke tautauvata kei na Kalou o Jisu ni bera ni mate, oti qai vakacerecerei koya na Kalou ena dua na itutu cecere, sega beka ni dusia qori ni cecere cake o Jisu vua na Kalou? Ia e rawa vakacava ni dua e cecere cake vua na Kalou?” Ke doka na Vosa ni Kalou qai yalomalumalumu, ena rawa ni uqeti koya me dikeva tale na ulutaga qori.—Caka. 17:11.

10. (a) Na cava eda rawa ni tukuna vua e dua e vakabauta na kama i eli? (b) Na iwalewale cava o raica ni yaga ni o veivosakitaka na ulutaga me baleta na kama i eli?

¹⁰ Kena ikarua: E dredre vua e dua na itaukeinivale daulotu me vakabauta nira na sega ni vakamai tawamudu i eli na tamata ca. Nona vakabauta na kama i eli, e rawa ni vu mai na nona vinakata mera totogitaki o ira na caka ca. Na cava eda rawa ni tukuna vua e dua e va ya nona rai? Kena imatai, meda vakadeitaka vua nira na totogitaki na daucaka ca. (2 Ces. 1:9) Oti eda rawa ni tukuna vua me wilika na Vakatekivu 2:16, 17, e vakaraitaki kina ni itotogi ni ivalavala ca na mate. E rawa nida qai vakamacalataka ni nona ivalavala ca o Atama e vakavuna meda sucu ivalavala ca kece na kawatamata. (Roma 5:12) Eda rawa ni kuria ni sega ni bau cavuta na Kalou na itotogi ni kama i eli. Eda rawa ni qai taroga, “Na cava rau sega ni vakasalataki kina o Atama kei Ivi ke nanumi ni rau na lai vakararawataki tawamudu?” Eda rawa ni qai wilika na Vakatekivu 3:19, e cavuti kina na kedrau itotogi ni oti nodrau valavala ca, ia a sega ni tukuni e dua na ka me baleta na kama i eli. A tukuni ga vei Atama ni na suka tale me kuvu ni qele. Eda rawa ni taroga, “Ke lai kama dina i eli o Atama, ena veiganiti me tukuni vua ni na suka tale ina qele?” Ke yalorawarawa na itaukeinivale, na taro va qori ena rawa ni uqeti koya me vakasamataka vakatitobu na ivakavuvuli qo.

11. (a) Na cava eda rawa ni kaya vua e dua e vakabauta ni tamata vinaka kece era na bula e lomalagi? (b) Na iwalewale cava o raica ni yaga ni o veivosakitaka na ulutaga me baleta na bula e lomalagi?

¹¹ Kena ikatolu: Eda sotava e dua e vakabauta ni tamata vinaka kece era na bula e lomalagi. Na vakabauta va qori ena rawa ni veisautaka nona rai me baleta na iVolatabu. Kena ivakaraitaki, kaya mada ke da dikeva vata kei koya na Vakatakila 21:4. (Wilika.) De dua ena kaya na itaukeinivale qori ni veivakalougatataki e vakamacalataki ena tikinivolatabu qori e baleta na bula e lomalagi. Eda na vakamacala vakacava vua? Kua ni wilika tale e vica na tikinivolatabu, eda rawa ni vakayagataka sara ga e dua na vakasama e tiko ena tikinivolatabu ya. E tukuni kina ni “na sega tale na mate.” Eda rawa ni tukuna vua, ke vinakati me sega tale e dua na ka, ena vinakati taumada me tiko sara ga na ka qori. Ena rairai duavata kei iko o koya. Oti meda tukuna ni se bera ni dua e mate e lomalagi; na mate e dau yaco ga e vuravura. Macala ga ni Vakatakila 21:4 e dusia tiko na veivakalougatataki e vuravura ena veigauna se bera mai.—Same 37:29.

VAKAYAGATAKI NA VOSA VAKATAUTAUVATA ME VAKABIBITAKA E DUA NA VAKASAMA

12. Na cava e dau vakayagataka kina o Jisu na vosa vakatautauvata?

¹² E sega ni dau vakayagataka ga o Jisu na taro, e dau vakayagataka tale ga na vosa vakatautauvata ena cakacaka vakavunau. (Wilika Maciu 13:34, 35.) Na vosa vakatautauvata i Jisu e vakavotui kina na inaki ni lomadra na vakarogoci koya. (Maciu 13:10-15) E taleitaki tale ga kina na nona ivakavuvuli qai guilecavi dredre. Eda rawa ni vakayagataka vakacava na vosa vakatautauvata nida veivakavulici?

13. Na vosa vakatautauvata cava o rawa ni vakayagataka me dusia ni cecere na Kalou vei Jisu?

¹³ E vinaka ga me dau vakayagataki na vosa vakatautauvata rawarawa. Kena ivakaraitaki, nida vakamacalataka nona cecere na Kalou vei Jisu, de dua eda rawa ni tovolea na iwalewale qo. Eda rawa ni tukuna ni rau dau vakayagataka na Kalou kei Jisu na ikacivi vakavuvale me rau vakamacalataka kina na nodrau veiwekani. E vakatokai Jisu na Kalou me Luvena, o Jisu tale ga e vakatoka na Kalou me Tamana. (Luke 3:21, 22; Joni 14:28) Oti qori eda rawa ni taroga vua na itaukeinivale: “Ke o via vakavulici au ni rau tautauvata e le rua, na veiwekani vakavuvale cava o na vakayagataka mo vakamacalataka kina na tikina qori?” De dua ena cavuti ira na veitacini, me vakataki ira na drua. Ke vaka kina, eda rawa ni tukuna ni qori ga na ivakaraitaki eda na rairai vakasamataka. Eda rawa ni qai taroga sara: “Ke rawarawa na nodaru vakasamataka na vosa vakatautauvata qori, sega beka ni na vakasamataka tale ga qori o Jisu na Qasenivuli Levu? Ia a tukuna ga o Jisu ni Kalou o Tamana. Qori e dusia ni dede sara nona bula na Kalou vei Jisu, e levu tale ga nona lewa ni vakatauvatani kei koya.”

14. Na vosa vakatautauvata cava e dusia ni ka vakalialia vua na Kalou me vakayagataka na Tevoro me veivakararawataki i eli?

¹⁴ Dikeva tale mada e dua na ivakaraitaki. Era vakabauta eso ni lesi o Setani me lewa na veivakamai i eli. Ena rawa ni vukea e dua na itubutubu na vosa vakatautauvata me raica kina ni ka vakalialia vua na Kalou me laivi koya na Tevoro me vakararawataki ira na tamata ena kama i eli. De dua eda rawa ni tukuna: “Kaya mada ni sa rui vakadrecike sara ga o luvemu qai cakava tiko e levu na ka ca. Na cava o na cakava?” De dua ena kaya ni na vakadodonutaki luvena. Ena rairai saga vakavica me vukei luvena me tinia na ka ca e cakava tiko. (Vkai. 22:15) Oti eda rawa ni qai tarogi itubutubu se cava ena cakava ke sega ni muria o gone na ka kece e caka me vukei kina. E levu na itubutubu era na kaya ni sa sega tale ni dua na ka e rawa ni caka, me sa totogitaki ga o gone. Eda rawa ni taroga sara, “Vakacava ke o qai kila ni dua na tamata ca e vakamuai luvemu tiko me vakadrecike vakalevu?” Sega ni vakabekataki ni na katakatataki koya sara ga na tamata ca qori na itubutubu. Nida via vakabibitaka na vakasama e tiko ena vosa vakatautauvata, eda rawa ni taroga, “Ni o kila ni vakamuai luvemu tiko e dua na tamata ca, vakacava o na kerea tale vua na tamata qori me totogitaki luvemu ena vukumu?” E macala ga ni na sega ni duavata kina. E matata gona ni na sega tale ga ni vakalaivi Setani na Kalou me totogitaki ira na tamata a vakamua na Tevoro mera caka ca!

ME DONU TIKO GA NOMU RAI

15, 16. (a) Na cava meda kua kina ni nanuma nira na ciqoma kece na tamata na itukutuku ni Matanitu ni Kalou? (b) Ena vinakati meda kenadau ena vosa me laulau kina noda veivakavulici? Vakamacalataka. (Raica tale ga na kato “iVukevuke ena ka Meda Tukuna.”)

¹⁵ Ke donu mada ga na taro eda taroga, se vinaka vakacava na noda ivakamacala kei na noda vosa vakatautauvata, eso era na sega ga ni ciqoma na itukutuku ni Matanitu ni Kalou eda vunautaka. (Maciu 10:11-14) O Jisu mada ga e Qasenivuli levu duadua me bau bula e vuravura, ia era le vica ga era ciqoma na nona veivakavulici!—Joni 6:66; 7:45-48.

¹⁶ Ena yasana kadua, ke da nanuma nida sega ni kenadau ena vosa, e se rawa ga nida laulau ena cakacaka vakaitalatala. (Wilika Cakacaka 4:13.) Eda vakadeitaka ena Vosa ni Kalou nira na ciqoma na itukutuku vinaka ‘o ira na yalomalumalumu era via muria na sala ni bula tawamudu.’ (Caka. 13:48) Koya gona me donu mada ga noda rai me baleti keda kei ira eda vinakata meda wasea vei ira na itukutuku vinaka ni Matanitu ni Kalou. Meda vakayagataka vinaka sara na veivakavulici e vakarautaka o Jiova, da qai nuidei ni na yaga vei keda kei ira na vakarogoci keda. (1 Tim. 4:16) E rawa ni vukei keda o Jiova ena ka meda “tukuna vua na tamata yadua.” Eda na qai vulica ena ulutaga tarava na sala e rawa ni vuavuaivinaka kina noda cakacaka vakaitalatala, oya noda muria na Vunau Koula.