SAUMI NA TARO VAKAIVOLATABU
Era Doka na Kalou na Lotu Kece?
Ni o rogoca na veika e yaco tiko e veiyasa i vuravura, o na dikeva ni so na gauna e dau vakayacori eso na ka ca ena yaca ni lotu. Ia e sega ni lotu kece e vu mai vua na Kalou dina. (Maciu 7:15) Sa rauta mera vakacalai e levu na kawatamata nikua.—Wilika 1 Joni 5:19.
Ia na Kalou e kauaitaki ira na tamata yalomalumalumu era taleitaka na ka e dodonu kei na ka dina. (Joni 4:23) Koya gona e sureti ira qori mera mai vulica na ka dina ena nona vosa na iVolatabu.—Wilika 1 Timoci 2:3-5.
O na kila vakacava na lotu dina?
Na Kalou o Jiova e sa vakaduavatataki ira tiko na susugi tu mai na duidui na lotu me vakavulici ira ena ka dina, mera veilomani tale ga. (Maika 4:2, 3) O na kilai ira gona era lotu dina ena nodra dau veilomani.—Wilika Joni 13:35.
Na Kalou o Jiova e sa vakaduavatataki ira tiko na veimatatamata ina sokalou dina.—Same 133:1
O ira era lotu dina era yavutaka na nodra vakabauta kei na nodra ivakarau ni bula ena iVolatabu. (2 Timoci 3:16) Era doka tale ga na yaca ni Kalou. (Same 83:18) Era vunautaka ni Matanitu ni Kalou e inuinui duadua ga ni kawatamata. (Taniela 2:44) Era vakatotomuri Jisu me ‘serau nodra cina’ nira dau caka vinaka. (Maciu 5:16) Eda na raici ira gona na lotu vaKarisito dina nira gole yani mera tukuna na itukutuku vinaka ni Matanitu ni Kalou vei ira na wekadra.—Wilika Maciu 24:14; Cakacaka 5:42; 20:20.