SAUMI NA TARO VAKAIVOLATABU
Rawa nira vukei keda na agilosi?
A vukei Taniela na dauveiqaravi yalodina ni Kalou ena gauna makawa na agilosi, ena vukei ira tale ga na tamata nikua me yaga vei ira na itukutuku vinaka
A buli ira e liu e vica vata na milioni na agilosi na Kalou o Jiova ni bera ni bulia na tamata. (Jope 38:4, 7) Era dauveiqaravi ni Kalou na kabula vakayalo kaukaua qo. Era dau lesi ena so na gauna mera dusimaki qai taqomaki ira na dauveiqaravi ni Kalou e vuravura. (Same 91:10, 11) Nikua era vukei ira tale ga na tamata me yaga vei ira na itukutuku vinaka era vunautaka tiko na imuri i Jisu.—Wilika Vakatakila 14:6, 7.
E dodonu meda masuti ira na agilosi mera vukei keda? Sega. Ni masu e ivakarau ni sokalou qai dodonu me vagolei vakatabakidua ga vua na Kalou. (Vakatakila 19:10) Nira dauveiqaravi ni Kalou na agilosi, era na rogoca ga na veidusimaki ni Kalou, sega ni tamata. Koya gona, e dodonu meda masu ga vua na Kalou ena vuku i Jisu.—Wilika Same 103:20, 21; Maciu 26:53.
Era tiko na agilosi ca?
Me vakataki keda ga, e soli tale ga vei ira na agilosi na galala ni vakatulewa, qai rawa nira vakatulewataka na ka e dodonu kei na ka e cala. Ia ka ni rarawa ni levu na agilosi era talaidredre vua na Kalou. (2 Pita 2:4) E liu sara ga o Setani qai tomani koya e so tale era vakatokai mera timoni. Ena dua na gauna lekaleka sa oti, a vakasavi mai lomalagi o Setani kei na nona timoni ra qai kolotaki sobu mai vuravura.—Wilika Vakatakila 12:7-9.
Na levu ni itovo voravora kei na ivalavala tawadodonu mai na 1914 me yacova mai qo e vakatakilakilataka ni sa voleka me yavala na Kalou me vakarusai Setani kei na nona timoni. Ena qai vakalesuya tale na Kalou na vuravura ena ituvaki a nakita taumada.—Wilika Vakatakila 12:12; 21:3, 4.