Gauna Cava e Tekivu Veiliutaki Kina na Matanitu ni Kalou?​—WASE 2

TADRA I NEPUKANESA​—RAILESUVI

Kelepi: Marau ni daru sota tale Jona. Dau taleitaka nodaru veitalanoa vakaivolatabu e veimacawa.a Vakacava tiko?

Jona: Io au bula vinaka tiko.

Kelepi: Oi vinaka. Na iotioti ni gauna daru veitalanoa kina, daru a raica vata nodra tukuna tiko na iVakadinadina i Jiova ni tekivu veiliutaki na Matanitu ni Kalou ena 1914.b Daru raica kina e dua na ivakadinadina ni parofisai ena wase 4 ni Taniela. Se nanuma tiko?

Jona: Io na tadra i Nepukanesa me baleta e dua na vunikau levu.

Kelepi: Koya sara ga qori. A raica o Nepukanesa ena nona tadra e dua vunikau levu, ni yaco sara i lomalagi na kena balavu. E qai rogoca ni vakarota e dua na italai ni Kalou me lauta na vunikau qori, ia me vo na vuna kei na wakana. Ena tubu tale ni oti e “vitu na gauna.”c Daru a veitalanoataka tale ga na kena vakayacori vakarua na parofisai qori. Se nanuma tiko na kena imatai?

Jona: A vakayacori sara ga vei Nepukanesa. Yabaki vitu nona lialia tu.

Kelepi: Donu vinaka. Nona lialia tu qori e qai muduki kina vakalekaleka nona veiliutaki. Ia na kena ikarua e sema ina veiliutaki ni Kalou, ni na mai mudu tale tu ga me vitu na gauna. Me vaka daru sa vakadinadinataka, a tekivu na vitu na gauna ena 607 B.G.V. ni vakarusai o Jerusalemi. Mai na gauna qori sa sega tale ni qai tiko e vuravura e dua na tui me matataka na Kalou o Jiova ena nona veiliutaki. Ia ni mai cava na vitu na gauna ena digia mai lomalagi na Kalou e dua na iLiuliu vou. Kena ibalebale qo ni gauna e cava kina na vitu na gauna, ena tekivu veiliutaki kina na ni Matanitu vakalomalagi ni Kalou. Daru sa kila na gauna e tekivu kina na vitu na gauna. Ia ke daru cakacakataka na balavu ni gauna qori, daru na kila na gauna e tekivu veiliutaki kina na Matanitu ni Kalou. Matata tiko vei iko na ka kece qori?

Jona: Io, vinaka sara ga nodaru railesuva qo niu nanuma kina na ka daru sa veitalanoataka oti.

Kelepi: Vinaka. Daru raica sara mada na balavu ni vitu na gauna qori. Au se qai vakawilika oti ga na ulutaga qori meu nanuma kina eso na tikina bibi. Au na saga meu vakamacalataka sara vakavinaka.

Jona: Sa donu.

CAVA NA VITU NA GAUNA​—TEKIVU NA IOTIOTI NI VEISIGA

Kelepi: Ena imatai ni parofisai me baleti Nepukanesa, na vitu na gauna e vakaibalebaletaki ina vitu na yabaki. Ia ni vakayacori na parofisai me baleta na Matanitu ni Kalou, na vitu na gauna e rairai balavu sara mai na vitu na yabaki.

Jona: Baleta?

Kelepi: Dua na vuna qo, nanuma tiko ni a tekivu na vitu na gauna qori ni vakarusai o Jerusalemi ena 607 B.G.V. Ke da tekivu wilika na vitu na yabaki mai na gauna qori, ena yaco ina 600 B.G.V. Ia a sega ni dua na ka vakairogorogo e yaco ena gauna qori me baleta na veiliutaki ni Kalou. Me vaka daru sa kila ena nodaru veitalanoa mai liu ni mai bula e vuravura o Jisu ni oti tale e vica vata na senitiuri mai na gauna qori, qai kaya ni se bera ni cava na vitu na gauna.

Jona: Io, au se nanuma tiko qori.

Kelepi: Ena sega gona ni vitu dina na yabaki, na vitu na gauna e dusia tiko e dua na gauna balavu.

Jona: Ena vakacava na kena balavu?

Kelepi: Na Vakatakila e sema ina Taniela, qai dusia na balavu ni vitu na gauna. E tukuni kina ni tolu veimama na gauna e tautauvata kei na 1,260 na siga.d Kena ibalebale na vitu na gauna e vakaruataki na tolu veimama na gauna, kena isoqoni gona e 2,520 na siga. Matata tiko vei iko qori?

Jona: Io, sa matata tiko vei au. Ia e kilai vakacava kina ni tekivu veiliutaki na Matanitu ni Kalou ena 1914?

Kelepi: Vinaka, meu vakamacalataka mada. So na gauna na parofisai vakaivolatabu, e dua na siga ena vakaibalebaletaka e dua na yabaki.e Ke dua na siga e tautauvata kei na dua na yabaki, na vitu na gauna ena 2,520 na yabaki. Nida tekivu wilika na 2,520 na yabaki mai na 607 B.G.V., eda na yacova na 1914.f Na yabaki 1914 gona e mai cava kina na vitu na gauna, tekivu veiliutaki o Jisu me Tui ni Matanitu ni Kalou. Na 1914 tale ga e yaco kina eso na ka vakairogorogo e vuravura, na ka sara ga e parofisaitaka tu na iVolatabu ni na yaco ena iotioti ni veisiga.

Jona: Na ka vakairogorogo cava soti?

Kelepi: Vakasamataka na ka e kaya o Jisu ena Maciu 24:7. Ni tekivu veiliutaki mai lomalagi o Jisu e kaya: “Era na veivaluvaluti na veivanua kei na veimatanitu, ena vakilai na leqa ni kakana qai yaco tale ga na uneune ena levu na vanua.” E kaya o Jisu ni na leqa na kakana, ena yaco tale ga na uneune ena gauna qori. Levu sara na leqa va qori e yaco tiko e vuravura ena veisenitiuri sa oti, se vakaevei?

Jona: Dina taucoko.

Kelepi: E parofisaitaka tale ga o Jisu ni na yaco na veivaluvaluti ena gauna e Tui tiko kina ni Matanitu ni Kalou. E sega ni parofisaitaka ga na Vakatakila ni na yaco na ivalu ena vanua ga eda tiko kina, ia ena vakilai e vuravura taucoko ena gauna ni ivakataotioti.g Se nanuma tiko na yabaki cava a cabolo kina na imatai ni ivalu levu?

Jona: Io na 1914, na yabaki tale ga o tukuna ni tekivu veiliutaki kina o Jisu! Au sa qai taura rawa.

Kelepi: Sa qai matata ni daru dikeva na veitikina kece qori, na parofisai baleta na vitu na gauna kei na so tale na parofisai vakaivolatabu me baleta na iotioti ni veisiga. Keimami vakadeitaka gona na iVakadinadina i Jiova ni tekivu veiliutaki o Jisu ena 1914 me Tui ni Matanitu ni Kalou, e tekivu tale ga ena yabaki qori na iotioti ni veisiga.h

Jona: Sa matata vei au, meu na vakasamataka tale vakavinaka.

Kelepi: Io, vaka ga au sa tukuna oti, dua toka na gauna noqu saga meu kila tale ga vakavinaka. Ia au vakabauta nodaru veitalanoa qo o na raica kina ni keimami dau yavutaka na neimami vakabauta ena iVolatabu me baleta na 1914, dina ni sega ni cavuti vakadodonu ena iVolatabu na yabaki qori.

Jona: Au dau qoroya na nomuni dau yavutaka nomuni vakamacala kece ena iVolatabu, sega ena nomuni rai ga. Ia au vakasamataka tiko, se cava e vakadredretaki kina noda kila. Cava e sega ni tukuna ga kina na Kalou ena iVolatabu ni na tekivu veiliutaki o Jisu mai lomalagi ena 1914?

Kelepi: Taro vinaka qori Jona. Levu na ka e sega ni voci vakavudi ena iVolatabu. Cava e vola kina va qori na Kalou na iVolatabu qai vinakati meda saga meda kila na veika e volai tiko kina? Daru na mai veitalanoa kina ena dua tale na gauna.

Jona: Sa donu.