Vuna Meda Savasava Kina

1. Ena uqeti keda vakacava na ivola na Vunau ni Soro?

E TUKUNI vakalevu na savasava ena ivola na Vunau ni Soro ni vakatauvatani kei na vo ni ivola ena iVolatabu. E vinakati na itovo qo vei ira kece na dausokalou yalodina i Jiova. Nida kila da qai taleitaka na Vunau ni Soro, ena uqeti keda meda savasava.

2. Na cava eso na ka e laurai ena Vunau ni Soro?

² E vola na parofita o Mosese na ivola na Vunau ni Soro, e tiki ni “iVolatabu kece,” e yaga me veivakavulici. (2 Tim. 3:16) E voleka ni basika vakatini na yaca i Jiova ena wase yadua. Nida kila vinaka na Vunau ni Soro eda na sega ni cakava e dua na ka ena vosavakacacataki kina na yaca ni Kalou. (Vunau 22:32) Ni basika wasoma na vosa “Koi au ko Jiova,” ena uqeti keda meda talairawarawa vua na Kalou. Meda marautaka mada ga ena ulutaga qo kei na kena e tarava eso na iyau talei e laurai ena Vunau ni Soro, na iloloma ni Kalou eda na tokona kina na sokalou savasava.

VINAKATI NA SAVASAVA

3, 4. Na cava e vakatayaloyalotaka na vakasilimi nei Eroni kei ratou na luvena tagane? (Raica na imatai ni iyaloyalo.)

³ Wilika Vunau ni Soro 8:5, 6. E digitaki Eroni o Jiova me bete levu e Isireli, o ratou na luvena tagane me ratou bete ena vuku ni matanitu. O Eroni e vakatayaloyalotaki Jisu Karisito, o ratou na luvena tagane eratou vakatayaloyalotaki ira na imuri lumuti i Jisu. Kena ibalebale nona vakasilimi o Eroni e vakatayaloyalotaka nona vakasavasavataki o Jisu? Sega. E sega ni vakasavasavataki o Jisu ni “sega na nona cala,” e sega ni ivalavala ca. (Iper. 7:26; 9:14) Ia e dusia na savasava kei na yalododonu i Jisu na nona vakasilimi oti o Eroni. Na cava ga e dusia nodratou vakasilimi na luvei Eroni?

⁴ Nodratou vakasilimi na luvei Eroni e vakatayaloyalotaka nodra vakasavasavataki na digitaki mera lewe ni matabete vakalomalagi. Vakacava, e veisemati nodra papitaisotaki na lumuti kei na nodratou vakasavasavataki na luvei Eroni? Sega, ni sega ni kauta tani na ivalavala ca na papitaiso, e dusia ga nira sa yalataka nodra bula vua na Kalou o Jiova. Era vakasavasavataki na lumuti ena “vosa ni Kalou,” ena vinakati gona mera muria mai vu ni lomadra na ivakavuvuli i Karisito. (Efeso 5:25-27) Koya gona, era sa vakatabui ra qai vakasavasavataki. Ia vakacava o ira na ‘so tale na sipi’?—Joni 10:16.

5. Na cava e tukuni kina nira vakasavasavataki ena Vosa ni Kalou na so tale na sipi?

⁵ Eratou sega ni vakatayaloyalotaki ira na so tale na sipi i Jisu se na “isoqosoqo levu” na luvei Eroni. (Vkta. 7:9) Vakacava o ira na so tale na sipi era sa papitaiso, era vakasavasavataki tale ga ena Vosa ni Kalou? Io! Nira wilika ena iVolatabu o ira na nuitaka na bula e vuravura na bibi kei na yaga ni dra vakadavei i Jisu, era vakabauta ra qai “qaravi koya tiko ena siga kei na bogi.” (Vkta. 7:13-15) Ni toso tiko nodra vakasavasavataki na lumuti kei na so tale na sipi e laurai ni ‘vinaka tiko ga na nodra itovo.’ (1 Pita 2:12) Sa na marau mada ga o Jiova ni raica nodra savasava kei na nodra duavata na lumuti kei na so tale na sipi, era rogoca ra qai muria ena yalodina na nodra iVakatawa o Jisu!

6. E yaga vakacava noda dikevi keda?

⁶ E yaga vei keda na dauveiqaravi i Jiova nikua na nodra savasava vakayago na matabete e Isireli. O ira na vulica tiko na iVolatabu era raica na savasava ni noda vanua ni sokalou, na rakorako kei na savasava ni noda isulusulu. Eda kila mai na savasava ni matabete ni o koya e cabe cake me sokalou ena ulunivanua i Jiova me “yalosavasava.” (Wilika Same 24:3, 4; Aisea 2:2, 3.) Nida qarava na Kalou e dodonu me savasava noda vakasama, lomada kei na yagoda. Ena bibi gona meda dikevi keda wasoma, da qai vakayacora na veisau e vinakati meda savasava kina. (2 Kor. 13:5) Kena ivakaraitaki, e vinaka me taroga o koya sa papitaiso qai dau nakita me sara iyaloyalo vakasisila, ‘Au vakaraitaka tiko niu savasava?’ E dodonu me qara na veivuke me tinia kina na itovo torosobu qori.—Jeme. 5:14.

ERA SAVASAVA NA TALAIRAWARAWA

7. Na ivakaraitaki cava e biuta o Jisu me salavata kei na Vunau ni Soro 8:22-24?

⁷ Ni buli na matabete e Isireli, e boro na dra ni sipi tagane ena vuso ni daligadratou imatau na Bete Levu o Eroni kei ratou na luvena tagane, ena idovidovinikakana ni ligadratou imatau, kei na iqaqalo levu ni yavadratou imatau. (Wilika Vunau ni Soro 8:22-24.) Na vakayagataki ni dra e dusia ni ratou na talairawarawa na bete me ratou qarava na nodratou itavi ena kena vinaka duadua. E ivakaraitaki uasivi tale ga na Bete Levu o Jisu vei ira na lumuti kei ira na so tale na sipi. E vakatudaliga ina veidusimaki ni Kalou. Na ligana e cakava na loma i Jiova, na yavana e sega ni gole tani mai na sala savasava.—Joni 4:31-34.

8. Na cava mera cakava na dauveiqaravi kece i Jiova?

⁸ Ena vinakati vei ira na lotu vaKarisito lumuti kei na so tale na sipi i Jisu mera vakatotomuria nona yalodina nodra Bete Levu. Mera talairawarawa na dauveiqaravi kece i Jiova ena ivakaro ena Vosa ni Kalou mera kua kina ni vakararawataka na yalona tabu. (Efeso 4:30) Mera ‘vakadodonutaka tiko ga na sala e muria na yavadra.’—Iper. 12:13.

9. Na cava eratou kaya e tolu na tacida eratou cakacaka veivolekati kei ratou na lewe ni iLawalawa Dauvakatulewa? O na savasava tiko ga vakacava ni o vakasamataka na ka eratou kaya?

⁹ Rogoca mada na ka eratou tukuna mai vu ni lomadratou e tolu na tacida eratou nuitaka na bula e vuravura, sa vakayabaki nodratou cakacaka veivolekati kei ratou na lewe ni iLawalawa Dauvakatulewa. E kaya e dua: “E duatani toka na ilesilesi dokai qo, neitou cakacaka veivolekati ena levu na gauna e vakaraitaka nira se ivalavala ca tiko ga na tacida qo, dina nira lumuti ena yalo tabu. Ia e noqu isausau ena veiyabaki meu talairawarawa vei ira na veiliutaki.” E kaya na ikarua ni tacida: “E uqeti au na tikinivolatabu me vaka na 2 Korinica 10:5, me baleta na ‘vakamalumalumu vei Karisito’ meu talairawarawa qai tokoni ira na veiliutaki. Qo na talairawarawa mai vu ni lomaqu.” E kaya na ikatolu ni tacida: “Niu taleitaka na ka e taleitaka o Jiova au cata na ka e cata, au qara tiko ga nona veidusimaki qai cakava na ka e vakamarautaki koya, e vakaraitaka niu talairawarawa ina nona isoqosoqo kei ira e lesia mera vakayacora na lomana e vuravura.” E kila na tacida qo ni ciqoma o Nathan Knorr, e lewe ni iLawalawa Dauvakatulewa, na veitikina era lomatarotarotaka eso ena ulutaga ni Vale ni Vakatawa ni 1925 “Sucu e Dua na Matanitu” (“Birth of the Nation”). E qoroya na tacida qori nona talairawarawa. Ni o vakasamataka vakabibi na ka eratou tukuna na tolu na tacida qori ena uqeti iko mo savasava ni o talairawarawa.

TALAIRAWARAWA INA LAWA NI KALOU ME BALETA NA DRA

10. Na cava e bibi kina meda talairawarawa ena lawa ni Kalou me baleta na dra?

¹⁰ Wilika Vunau ni Soro 17:10. E vakaroti ira na Isireli o Jiova mera kua ni kania e “dua na dra.” E bibi tale ga vei keda na lotu vaKarisito meda vakatabui keda mai na dra ni manumanu se tamata. (Caka. 15:28, 29) Eda rere nida vakasamataka me ‘duatani na mata’ ni Kalou vei keda me qai muduki keda tani mai na nona ivavakoso. Eda lomani koya da qai vinakata meda talairawarawa vua. Nida sotava na ituvaki e leqataki kina noda bula, eda vakadeitaka meda kua ni muria na ka era vakamasuti keda kina se tukuna o ira na sega ni kilai Jiova, nira sega ni via talairawarawa vua. Io, eda namaka meda vakasewasewani nida vakatabui keda mai na dra, ia eda digia meda talairawarawa vua na Kalou. (Juta 17, 18) Ena uqeti keda vakacava na ulutaga qo meda “raica vinaka,” meda kua ni kania se taura na dra?—Vkru. 12:23.

11. Na cava eda kaya kina ni sega ni ka wale na ka e dau vakayacori ena Siga ni Veibuluti?

¹¹ Nona vakayagataka na dra ni manumanu na bete levu e Isireli ena Siga ni Veibuluti eda na kila kina na rai ni Kalou me baleta na dra. E tiko ga na gauna me qai vakayagataki kina. E buluti kina nodra ivalavala ca o ira na kerea me vosoti ira o Jiova. Me kureitaki na dra ni bulumakau kei na me ena dela kei na mata ni isogo ni kato ni veiyalayalati. (Vunau 16:14, 15, 19) E vakayacori qori me vosoti kina nodra ivalavala ca na Isireli. E vakarota tale ga o Jiova ke dua e vakamatea na manumanu me kakana, me livia na kena dra qai ubia ena soso, “ni sa kena bula ni yago kecega na dra.” (Vunau 17:11-14) Vakacava, e ka wale na ka kece qo? Sega. Na vakayagataki ni dra ena Siga ni Veibuluti, kei na kena livi ina qele, e salavata kei na ivakaro i Jiova vei Noa kei ira nona kawa me baleta na dra. (Vkte. 9:3-6) E vakatabuya na Kalou o Jiova na kena laukana na dra me rawa kina na bula. Na cava e kena ibalebale qo vei keda na lotu vaKarisito?

12. E sema vakacava o Paula na dra kei na veivosoti ena nona ivola vei ira na lotu vaKarisito Iperiu?

¹² Ni vola na yapositolo o Paula na yaga ni veivakasavasavataki ni dra vei ira na lotu vaKarisito Iperiu, e vakamacalataka: “Voleka ni ka kece ga e vakasavasavataki ena dra me vaka e vakaroti ena Lawa. Ke sega ni vakadavei na dra ena sega na veivosoti.” (Iper. 9:22) E tukuna tale ga o Paula ni yaga toka na isoro manumanu, ia e vakaraitaka ga vei ira na Isireli nira ivalavala ca qai vinakati na ka e uasivia qori me kauta tani vakadua na ivalavala ca. Io, na Lawa e “iyaloyalo ga ni ka vinaka ena yaco mai, e sega ni vatukana dina.” (Iper. 10:1-4) Ia e vosoti rawa vakacava na ivalavala ca?

13. E tarai iko vakacava nona cabora o Jisu na yaga ni nona dra vei Jiova?

¹³ Wilika Efeso 1:7. E yaga na mate vakaisoro i Jisu Karisito vei ira kece na lomani koya kei Tamana ni a ‘solia nona bula ena vukuda.’ (Kala. 2:20) Ia e sereki keda na ka e cakava o Jisu ni mate oti qai vakaturi, me vosoti rawa kina noda ivalavala ca. E vakayacora o Jisu na ka e vakatayaloyalotaki ena Lawa e soli vei Mosese ena Siga ni Veibuluti. Ena siga qori, e kauta na bete levu eso na dra ni manumanu e cabori ina Loqi Tabu Sara ni valeniveitavaki, vaka kina ena valenisoro e tara o Solomoni, qai cabora ena mata ni Kalou, me vaka ga ni tu dina e matana. (Vunau 16:11-15) E va tale ga qori na ka e cakava o Jisu, ni curu i lomalagi kei na yaga ni nona dra qai cabora vei Jiova. (Iper. 9:6, 7, 11-14, 24-28) Dua na ka noda marau ni vosoti na noda ivalavala ca qai savasava noda lewaeloma nida vakabauta na dra i Jisu!

14, 15. Na cava e bibi kina meda kila da qai talairawarawa ina lawa i Jiova me baleta na dra?

¹⁴ Vakacava, o sa qai kila na vuna e vakaroti keda kina o Jiova meda kua ni kania e “dua na dra”? (Vunau 17:10) O kila na vuna e raica kina o Jiova ni ka tabu na dra? E raica ni tautauvata kei na bula. (Vkte. 9:4) O duavata kei na rai ni Kalou me baleta na dra o qai talairawarawa kina? Eda na veiyaloni ga kei na Kalou ke da vakabauta na isoro ni veivoli i Jisu da qai kila ni talei vua na Dauveibuli na dra qori.—Kolo. 1:19, 20.

¹⁵ E rawa nida sotava kece vakidacala eso na ituvaki e vauca na dra. Se dua na ituvaki tawanamaki e sotava e dua noda lewe ni vuvale se itokani, qai vinakati me vakatulewataka me taura na dra se kua. Ena gauna qori, ena vinakati tale ga me vakatulewataki na iwasewase ni dra kei na veiqaravi vakavuniwai. E bibi gona meda vakekeli da qai vakarautaki keda ena leqa tubukoso. Ena yaga vei keda qori ke salavata kei na masu, nida na tudei kina da qai sega ni soro. E macala nida sega ni via vakararawataka na loma i Jiova nida vakayacora na ka e vakacala nona Vosa! Levu na vuniwai kei ira na tokona na tauri dra era vakamasuti ira na lewenivanua mera soli dra nira nanuma ni veivakabulai. Ia eda kila na tamata savasava i Jiova ni tiko vua na Dauveibuli na dodonu me lewa na ivakavakayagataki ni dra. E raica ni ka tabu e “dua na dra.” Meda vakadeitaka nida talairawarawa ina nona lawa me baleta na dra. E bibi gona meda vakaraitaka ena noda itovo savasava nida marautaka vakalevu na kaukaua ni veivakabulai ni dra i Jisu, na dra duadua ga e vosoti rawa kina na ivalavala ca qai rawati kina na bula tawamudu.—Joni 3:16.

VINAKATA O JIOVA MEDA SAVASAVA

16. Na cava meda savasava kina na dauveiqaravi i Jiova?

¹⁶ Ni vakabulai ira na Isireli na Kalou nira vakabobulataki tu mai Ijipita, e kaya vei ira: “Sai au ko Jiova, sa kauti kemuni cake mai na vanua ko Ijipita, me’u nomuni Kalou: ia mo ni savasava kina, ni’u sa savasava koi au.” (Vunau 11:45) E vinakati mera savasava na Isireli, ni savasava o Jiova. Nida nona iVakadinadina, e bibi tale ga meda savasava. E vakamatatataki qori ena ivola na Vunau ni Soro.

17. O raica vakacava na ivola na Vunau ni Soro?

¹⁷ E yaga dina nida veivosakitaka eso na tikina ena Vunau ni Soro. Na vuli qo e vakatitobutaka noda kila na ivola e vakavuna na Kalou na kena volai. E macala ga ni sa qai matata tiko ga vei keda na vuna meda savasava kina nida vakasamataka vakatitobu eso na itukutuku talei ena Vunau ni Soro. Ia na cava eso tale na iyau talei eda na raica ena wase ni ivola qo? Na cava eda na vulica me baleta noda qaravi Jiova ena savasava? Qori ena veivosakitaki ena ulutaga e tarava.