O Kila na Yaca ni Kalou, O Dau Vakayagataka?

Ke dua nomu itokani voleka, sega ni vakabekataki o na kila na yacana, se vakaevei? E tukuna e dua na marama ni Bulgaria, “o sega ni rawa ni toro voleka vua na Kalou ke o sega ni kila na yacana.” Me vaka ga e vakamacalataki ena imatai ni ulutaga, eda marau ni vinakata na Kalou meda volekati koya. Eda rawa gona ni kaya ni vakayagataka na iVolatabu meda veikilai kina kei koya, e kaya: “Koi au ko Jiova; sai koya oqo na yacaqu.”—Aisea 42:8.

Vakacava e kauai na Kalou ke o kila na yacana o qai vakayagataka? Vakasamataka mada: Na yaca ni Kalou e volai ena va na matuavosa vakaIperiu e vakatokai na Tetragrammaton, e rauta ni 7,000 na kena volai ena ilavelave taumada ni iVolatabu vakaIperiu. Qo na yaca e cavuti vakalevu ena iVolatabu ni vakatauvatani kei na kena vo. Kena ibalebale, e vinakata o Jiova meda kila na yacana, meda vakayagataka tale ga.a

Era nanuma e levu ni sega ni ivakaraitaki ni veidokai ke da vakayagataka na yaca ni Kalou, ni savasava qai cecere. E dina nida na sega ni vakayagataka vakatani na yaca ni Kalou me vaka ga noda sega ni vakatanitaka na yaca ni noda itokani voleka. Ia e inaki i Jiova mera vakatakila na yacana o ira na lomani koya kei ira na doka na yacana. (Same 69:30, 31; 96:2, 8) O Jisu mada ga a vakavulici ira nona imuri mera masuta: “Tamai keimami mai lomalagi, me dokai na yacamuni.” Eda rawa ni doka na yaca ni Kalou ena noda vakaraitaka vei ira e so tale. Qori eda na volekati koya kina.—Maciu 6:9.

E tukuna na iVolatabu ni kauaitaki ira era “vakananuma na yacana” na Kalou se vakamareqeta. (Malakai 3:16) E yalataka o Jiova vei ira: “Au na vakaceceretaki koya sara ni sa kila na yacaqu. Ena tagi vei au, ia ka’u na vakarorogo vua: au na tiko vata kaya ni sa yacovi koya na rarawa.” (Same 91:14, 15) Ke da vinakata meda volekati Jiova e bibi meda kila na yacana da qai vakayagataka.