O Dau Veivosaki kei na Kalou?

Era dau veivosaki vakalevu na veitokani voleka, era dau veivolavolai, veiqiriti ena talevoni, vakauitukutuku se veivosaki ena Internet. Nida via veivolekati tale ga kei na Kalou, e bibi meda dau veivosaki. Ena sala cava?

Eda rawa ni veivosaki kei Jiova ena masu. Ia ena via duidui toka mai na veivosaki kei na dua na noda itokani se icaba. E bibi meda nanuma nida masu tiko vua na Dauveibuli, e Cecere Duadua e lomalagi kei vuravura. Koya gona, eda na masu ena veidokai. Ke da vinakata me rogoci noda masu, e tiko e tolu na ka meda cakava.

Kena imatai, noda masu e dodonu me vakatabakidua ga vua na Kalou o Jiova, sega ni o Jisu, sanito se dua na ivakatakarakara. (Lako Yani 20:4, 5) E vakamatatataka na iVolatabu: “Na ka kece me vakaraitaki vua na Kalou ena masu kei na kerekere salavata kei na vakavinavinaka.” (Filipai 4:6) Kena ikarua, eda masu ena vuku i Jisu Karisito na Luve ni Kalou. E kaya o Jisu: “Ena vukuqu ga ena qai torovi Tamaqu rawa kina e dua.” (Joni 14:6) Kena ikatolu, noda masu e dodonu me salavata kei na loma ni Kalou. E kaya na iVolatabu: “Eda kila se cava ga eda kerea me salavata kei na nona inaki, ena rogoci keda o koya.”a—1 Joni 5:14.

Eda kila ni na sega ni dei na veitokani ke vosa tu ga e dua. Me vaka ga na nodrau dauveivosaki na veitokani, e dodonu tale ga meda solia na gauna vua na Kalou me vosa vei keda da qai vakarorogo. O kila na sala e vosa kina vei keda na Kalou?

E vosa vei keda na Kalou nikua ni vakayagataka nona “vosa” volai na iVolatabu. (2 Timoci 3:16, 17) Eda kila vakacava? Kena ivakaraitaki, kaya mada ke o taura na nona ivola na nomu itokani voleka. Ni o wilika oti, e vaka ga e vosa tiko vei iko, dina ni o sega ni raici koya. E tautauvata qori kei na nomu wili iVolatabu, o sa vakalaiva sara tiko ga me vosa vei iko o Jiova. E tukuna o Gina, sa cavuti oti mai, “Au kila keu vinakata me noqu itokani o Jiova, e dodonu meu dikeva nona ‘ivola’ vei keda—na iVolatabu” E tomana, “Noqu wilika e veisiga na iVolatabu keirau veivolekati kina kei na Kalou.” Vakacava, o vakalaiva me vosa vei iko e veisiga o Jiova ena nomu wilika nona vosa, na iVolatabu? Ni o cakava qori o na veivolekati kina kei na Kalou.