Dodonu Meda Masu Vei Jisu?
A TAROGA e 800 vakacaca na itabagone mai na veimatalotu e dua na dau vakadidike ke ra vakabauta ni dau sauma na masu o Jisu. Sivia na 60 na pasede era vakabauta ni dau sauma na masu o koya. E dua ga e bokoca na yaca i Jisu qai vola “Kalou.”
Cava nomu nanuma? Dodonu meda masu vei Jisu se vua na Kalou?a Me saumi na taro qori, meda dikeva mada na nona vakavulici iratou na nona tisaipeli o Jisu ena masu.
O CEI E TUKUNA O JISU MEDA MASUTA?
E vakavulica qai vakatakila o Jisu o cei meda masuta.
E biuta e dua na ivakaraitaki o Jisu meda muria ni masuta na Tamana vakalomalagi
NONA IVAKAVUVULI: Ni kerei Jisu e dua nona tisaipeli, “Turaga, vakavulici keitou mada me keitou kila na ivakarau ni masu,” e kaya o Jisu: “Ni dou masu, dou kaya, ‘Tamai keimami.’” (Luke 11:1, 2) E uqeti ira tale ga na vakarorogo tiko ena nona iVunau ena Ulunivanua mera dau masu. E kaya: “Masu vua na Tamamu.” E veivakadeitaki tale ga vei ira ena nona kaya: “Ni kila na Tamamuni na ka oni vinakata ni bera mada ga ni oni kerea.” (Maciu 6:6, 8) Ena iotioti ni nona bogi me bula kina vakatamata, e kaya vei ratou nona tisaipeli: “Na ka ga dou kerea vei Tamaqu, ena solia vei kemudou ena yacaqu.” (Joni 16:23) E vakavulica gona o Jisu meda masu vei Tamana, e Tamada tale ga o Jiova na Kalou.—Joni 20:17.
NONA IVAKARAITAKI: Sega wale ga ni veivakavulici o Jisu ena masu, e dau masu tale ga: “Au vakavinavinaka vei kemuni, Tamaqu, na Turaga ni lomalagi kei na vuravura.” (Luke 10:21) Dua tale na gauna, “E tacake i lomalagi o Jisu qai kaya: ‘Tamaqu, au vakavinavinakataki kemuni ni oni rogoci au.’” (Joni 11:41) E masuta ena gauna tale ga e vakarau mate kina: “Tamaqu, au sa solia na noqu bula ina ligamuni.” (Luke 23:46) Ni masu tiko vua na Tamana vakalomalagi na “Turaga ni lomalagi kei na vuravura”—e ivakaraitaki vinaka duadua kina o Jisu meda vakatotomuria. (Maciu 11:25; 26:41, 42; 1 Joni 2:6) Vakacava, era taura rawa na ka e vakavulica tiko qori na nona tisaipeli taumada?
ERA MASU VEI CEI NA LOTU VAKARISITO TAUMADA?
Oti ga e vica na macawa nona lesu i lomalagi o Jisu, era vakacacani ra qai vakarerei ira nona tisaipeli na dauveitusaqati. (Cakacaka 4:18) Sega ni bera nodra masu, ia era masu vei cei? “Era duavata ena nodra masu vua na Kalou,” ra masuta me tokoni ira tiko ga “ena yaca i koya na [nona] dauveiqaravi yalosavasava, o Jisu.” (Cakacaka 4:24, 30) Era muria gona na tisaipeli na ivakarau ni nona dau masu o Jisu. Era masuta na Kalou, sega ni o Jisu.
Vica tale na yabaki e muri, e vakamacalataka o Paula na nona dau masu kei ira na nona itokani. E vola vei ira na itokani lotu vaKarisito: “Keitou dau vakavinavinaka vua na Kalou na Tama ni noda Turaga o Jisu Karisito ena gauna kece keitou masulaki kemuni kina.” (Kolosa 1:3) E vola tale ga o Paula vei ira na nona itokani vakabauta me baleta na noda dau ‘vakavinavinakataka tiko ga na ka kece vua na Kalou na Tamada ena yaca ni noda Turaga o Jisu Karisito.’ (Efeso 5:20) Eda kila ena malanivosa qori ni dau veiuqeti o Paula me masuti na “ka kece” vua na nona “Kalou na Tamada”—ia ena vuku ni yaca i Jisu.—Kolosa 3:17.
Eda rawa tale ga ni vakataki ira na lotu vaKarisito taumada meda vakaraitaka noda lomani Jisu nida muria nona ivakavuvuli me baleta na masu. (Joni 14:15) Nida masuta na Tamada vakalomalagi, da qai masu duadua ga vua, ena vakainaki vei keda na Same 116:1, 2: “Au sa lomani Jiova, ni sa rogoca ko koya na domo ni noqu masu . . . ka’u na masu tiko kina vua ni ka’u sa bula.”b
a E kaya na iVolatabu ni rau sega ni tautauvata na Kalou kei Jisu.
b Me vakadonuya na Kalou na noda masu, e dodonu meda gumatua ni muria na ka e vinakata. Me ikuri ni vakamacala, raica na wase 17 ni ivola Na Cava Sara Mada e Kaya na iVolatabu?