Saumi na Taro Vakaivolatabu
Cava e uqeti ira e levu mera vakabauta ni bula tiko na Dauveibuli?
E vakatubuqoroqoro na keda ibulibuli?
E vola ena rauta na 3,000 na yabaki sa oti e dua na dauniserekali: E “vakatubuqoroqoro qai veivakurabuitaki na noqu buli.” (Same 139:14, NW) Sega ni dau vakatubuqoroqoro vei iko nomu vakasamataka nona kunekunetaki e dua na gone mai na dua ga na sela lailai? Levu era tukuna ni veika kece e buli ena tiko e dua e bulia.—Wilika na Same 139:13-17; Iperiu 3:4.
O koya e bulia na lomalagi qai vakatawana na vuravura e ivurevure ni bula. (Same 36:9) E vosa vei keda qai vakatakilai koya.—Wilika Aisea 45:18.
Eda vu mai vei ira na manumanu?
Levu na ka eda tautauvata kina kei ira na manumanu. Eda tautauvata ga ni nona inaki na Dauveibuli meda bula e vuravura. A sega ni bulia na imatai ni tamata mai na manumanu, ia mai na kuvuniqele.—Wilika Vakatekivu 1:24; 2:7.
Rua mada ga na sala qo eda duidui kina vei ira na manumanu. Kena imatai, eda rawa ni vakasama, loloma, rawa tale ga nida doka na Dauveibuli. Kena ikarua, era sega ni buli na manumanu mera bula tawamudu, o keda ga. Ia eda mate tiko ena gauna qo ni a sega ni muria na veidusimaki ni Kalou na imatai ni tagane.—Wilika Vakatekivu 1:27; 2:15-17.