Vuli iVolatabu Baleti Keda Kece

Kilai levu nodra cakacaka vakavunau na iVakadinadina i Jiova e vuravura. Oni kila ni keimami dau veivakavulici tale ga ena iVolatabu?

Laurai ena 2014 nira veivakavulici e sivia na 8 na milioni na iVakadinadina ena 240 na vanua. Era vakavulica e rauta ni 9 na milioni 500 na udolu na vuli iVolatabu e veivula.a Io na levu ni vuli iVolatabu qori e sivia na kedra iwiliwili eso na lewenivanua ena 140 na vanua!

Era tabaka e veiyabaki na iVakadinadina i Jiova e rauta ni 1 veimama na bilioni na iVolatabu, ivola, mekesini kei na ivoladusidusi vakaivolatabu ena rauta na 700 na vosa mera veivakavulici kina! Ni tabaki ena duivosa, era na digia ga na vosa era via vuli kina.

TARO ME BALETA NA VULI

E vakacava na iwalewale ni vuli?

Duidui na ulutaga vakaivolatabu e digi, qai dikevi na tikinivolatabu era sema kina. Kena ivakaraitaki na ulutaga me baleta na Kalou. Saumi ena iVolatabu na taro qo: O cei na Kalou? Cava e kilai kina? E tiko na yacana? E tiko e vei? Rawa nida veivolekati? Meda qai qara na kedra isau ena iVolatabu.

Mera kila e levu na isaunitaro qori keimami dau vakayagataka na ivola Na Cava Sara Mada e Kaya na iVolatabu?b e 224 na tabana. iNaki ni vola qo mera kilai kina eso na ivakavuvuli rawarawa me baleta na iVolatabu. E vulici kina na veika me baleta na Kalou, me baleti Jisu Karisito, noda vakararawataki tu, na veivakaturi, masu kei na levu tale na ulutaga.

Vanua kei na gauna cava me vakayacori kina na vuli?

Rawa ni vakayacori na vuli ena vanua kei na gauna e ganiti iko.

Vakacava na balavu ni dua na vuli?

Levu era lokuca me dua na aua e veimacawa, ia rawa ni veisau. Ena vakayacori ga ena gauna e ganiti iko. So era vuli me 10 se 15 ga na miniti e veimacawa.

E saumi?

Sega. E salavata qo kei na ivakasala i Jisu vei ratou nona tisaipeli: “E soli wale vei kemudou, dou solia wale tale ga.”—Maciu 10:8.

Vakacava na dede ni vuli?

Ena vakatau sara ga vei iko. E 19 taucoko na wase ni ivola qo. Digia ga na wase o vinakata, se o rawa ni vulica kece, ia me veiganiti kei na kemu ituvaki.

Ena vinakati kina meu iVakadinadina i Jiova?

Sega. Keimami doka na dodonu ni nona vakatulewataka e dua na nona vakabauta. Ena vakatulewa ga o koya ena ka sa kila mai na iVolatabu.

Cava meu cakava keu via kila eso tale na ka?

Mo rai ena neimami Web site na jw.org. Era tu kina na itukutuku me baleta nodra vakabauta na iVakadinadina i Jiova kei na nodra cakacaka.

Keu via vuli iVolatabu?

• 

  Kerekere ena www.pr2711.com.

• Volavola ina itikotiko voleka duadua vei iko ena tabana e rua ni mekesini qo.

• Veitaratara kei na dua na iVakadinadina i Jiova e volekati iko, rai ga ena “Jehovah’s Witnesses” ena ivola ni talevoni.