Nodra iNuinui na Mate​—O na Vakadeitaka Vakacava?

E ka vakalialia ke da nanuma nira rawa ni bula tale na mate? E sega ni va qori nona rai na yapositolo o Paula. E uqeti vakalou me vola: “Ke da vakanuinui tiko vei Karisito ena bula ga qo, eda sa tamata vakaloloma dina. Ia qo sa vakaturi mai na mate na Karisito me kedra isevu na moce tu, oya o ira na mate.” (1 Korinica 15:19, 20) E nuidei o Paula ni na yaco na veivakaturi. Na nona vakaturi tale ga o Jisu e vakadeitaka na tikina qori.a (Cakacaka 17:31) Qori na vuna e vakatokai Jisu kina o Paula me “kedra isevu”—e imatai vei ira na vakaturi ina bula tawamate. Ke kena imatai o Jisu, macala ga nira na tiko eso tale.

Qo e dua tale na vuna eda rawa ni vakadeitaka kina ni na yaco dina na veivakaturi. E Kalou daudina o Jiova. “Na Kalou . . . e sega ni lasu rawa.” (Taito 1:2) E se sega vakadua ni lasu o Jiova, ena sega tale ga ni lasu. Vakacava, e rawa vua me yalataka na veivakaturi, bau vakaraitaka sara ga, oti me qai sega ni vakayacora dina? Sa sega tu ga ni rawa qori!

Na cava e tuvanaka kina o Jiova na veivakaturi ena dua na gauna se bera mai? Ni lomani keda. “Ke mate e dua na tamata, ena bula tale?” e taroga o Jope. “Oni na kaci mai, au na rogo yani. Oni na vinakata vakalevu na cakacaka ni ligamuni.” (Jope 14:14, 15) E vakadeitaka o Jope ni diva na Tamana yalololoma vakalomalagi me vakaturi koya. Sa veisau na Kalou? “O yau o Jiova, au sega ni veisau.” (Malakai 3:6) E se vinakata tiko ga na Kalou me vakabulai ira na mate, mera bulabula ra mamarau tale ga. Qo na ka sara ga era dau vinakata na itubutubu yalololoma ni mate e dua na luvedra. Ia e sega vei ira na kaukaua e tiko vei Jiova mera vakayacora kina na ka era vinakata.—Same 135:6.

Ena solia na kaukaua o Jiova vua na Luvena me vakamarautaki ira kece na lolositaka voli na takali ni nodra itokani se wekadra voleka. Na cava na rai i Jisu me baleta na veivakaturi? Ni bera ni vakaturi Lasarusa e “tagi” ni raica nodrau rarawa na ganei Lasarusa kei ira na nona itokani. (Joni 11:35) Dua tale na gauna a sotava na yada ni Neini, e se qai takali ga na luvena e dua bau. E “lomani koya dina” o Jisu “qai tukuna vua na yada: ‘Kua ni tagi.’” Sega ni bera nona vakaturi luvena. (Luke 7:13) E dau kauai sara vakalevu o Jisu ena gauna ni lolosi se ni takali e dua. Sa na dua mada ga na ka nona reki ni sa vukica na rarawa e vuravura taucoko me marau!

O sa bau lolositaka nona takali e dua? De dua o na nanuma ni sega na iwali ni mate. Ia e tiko—qo na veivakaturi e vakayagataki Luvena kina na Kalou. Mo nanuma tiko ni vinakata na Kalou mo raica sara ga na kena vakayacori. E vinakata mo tiko ena gauna qori, mo sotavi ira tale ena marau na wekamu se nomu itokani. Vakasamataka mada nomu sa na veitalanoataka kei ira na bula tawamudu, ena sega tale kina na veitalatala!

E vakasamataka lesu o Lionel, a cavuti taumada: “Au sa qai vulica na veivakaturi. Au a sega mada ni vakabauta, au sega tale ga ni nuitaki koya e tukuna vei au. Ia niu rai ena iVolatabu, e tu dina kina! Au sa vakanamata sara tu ga ena gauna ena vakaturi kina o tukaqu.”

O via kila e levu tale na ka? Era marau na iVakadinadina i Jiova mera vakaraitaka sara ga ena nomu iVolatabu na vuna era vakadeitaka kina ni na yaco na veivakaturi ena dua na gauna se bera mai.b