Vuna e Sega ni Kawaboko Kina na iVolatabu

Ni maroroi vinaka tu ga na iVolatabu, sa rawa nida yadua nikua na kena ilavelave. E bibi mo digia e dua na ivakadewa nuitaki ni iVolatabu, na kena e vakadewataka vakadodonu na vakasama ena iVolatabu taumada.a Ia na cava e sega ni vuca rawa kina na ivolavivigi ni iVolatabu? Na cava e guce kina nodra sasaga na meca mera vakawabokotaka na iVolatabu se vakatanitaka na kena itukutuku? Na cava e duatani duadua kina na iVolatabu?

Levu era sa vulica na iVolatabu era duavata kei na ka e vola na yapositolo o Paula: “E vakavuna na Kalou na iVolatabu kece.” (2 Timoci 3:16) Era vakabauta o ira qori ni Vosa ni Kalou na iVolatabu, oya na vuna e sega ni kawaboko kina. Na Kalou tale ga e vu ni kena maroroi voli na iVolatabu me yacova mai nikua. E levu na ka e lomatarotarotaka me baleta na iVolatabu o Faizal a cavuti ena imatai ni ulutaga. A mani nanuma me vulica na iVolatabu, qai kurabuitaka na veika e raica kina. Kena ivakaraitaki, sa qai kila ni sega ni yavutaki vakaivolatabu e levu na ivakavuvuli era vakabauta tu na veimatalotu nikua. E vakacegui koya tale ga na ka e kaya na iVolatabu ena inaki ni Kalou me baleta na vuravura.

E kaya o Faizal: “Au sa qai vakadeitaka qo ni isolisoli ni Kalou na iVolatabu. Ke sa rawa ni bulia na lomalagi kei na vuravura, ena sega sara ga ni dredre me vakarautaka qai maroroya voli mai na ivola eda sa yadua sara tu nikua. Keu vakatitiqataka qori, sa vaka ga au tukuna tiko ni vakaiyalayala na kaukaua ni Kalou Cecere Duadua! Ia o cei o yau meu tukuna qori?”—Aisea 40:8.