Veidutaitaka na ka o Vakabauta kei na ka e Kaya na iVolatabu

ME VAKATAKI ira ga na le rua vakacaca na bilioni e veiyasa i vuravura, o na rairai kaya tale ga ni o dua na imuri i Karisito se dua na lotu vaKarisito. E vica vata na udolu na lotu nikua era kaya nira lotu vaKarisito. Ia e laurai ena veimatalotu qori na duiyaloyalo ni duidui nodra rai se ra sega ni duavata ena so na ivakavuvuli ni nodra lotu. De dua e duidui mai na lotu tale eso na ka o vakabauta. E bibi mo dikeva na ka o vakabauta, mo raica ke salasalavata kei na ivakavuvuli vaKarisito ena iVolatabu.

Era vakatokai mera “lotu vaKarisito” na imuri taumada i Jisu Karisito. (Cakacaka 11:26) A sega ni gadrevi mera vakatokayacataki ena dua tale na yaca, ni a dua ga na ilawalawa ena gauna ya e kilai me lotu vaKarisito. O ira qori era muria kece na ivakavuvuli i Jisu, a tauyavutaka na lotu vaKarisito. Vakacava na lotu o lewena, e vakavulici kina na ka e vakavulica o Karisito kei na ka era vakabauta na nona imuri taumada? Na sala duadua ga o na kila kina qori, oya mo veidutaitaka kei na ka e kaya na iVolatabu.

Vakasamataka mada na ivakaraitaki i Jisu. A doka vakalevu na iVolatabu ni vakabauta e Vosa ni Kalou. E sega ni taleitaki ira era beca na ivakavuvuli vakaivolatabu ra qai vakabibitaka ga na ivakavuvuli vakatamata. (Marika 7:9-13) O ira na imuri dina i Jisu era na yavutaka ena iVolatabu na ka era vakabauta. E bibi kina me taroga o koya e kaya ni lotu vaKarisito, ‘E yavutaki ena iVolatabu na ivakavuvuli ni noqu lotu?’ O rawa ga ni kila qori ke o veidutaitaka na ivakavuvuli ni nomu lotu kei na ka e kaya na iVolatabu.

A kaya o Jisu me yavutaki ena ka dina ena iVolatabu na noda qaravi Kalou. (Joni 4:24; 17:17) E kaya tale ga na yapositolo o Paula ni vakatau na noda vakabulai ena noda “kila vinaka na ka dina.” (1 Timoci 2:4) E bibi gona me yavutaki ena ka dina ena iVolatabu na ka eda vakabauta, ni vakatau sara ga kina na noda bula!

VEIDUTAITAKA KEI NA IVOLATABU

Raica mada e ono na taro e toka e ra kei na kena isau vakaivolatabu. Cega na veitikinivolatabu, vakasamataka na ka e kaya, qai veidutaitaka kei na ivakavuvuli ni nomu lotu.

O na kurabuitaka na ka o raica ena kilakila mada qo. Ke o nanuma mo veidutaitaka na ivakavuvuli ni nomu lotu kei na ka dina ena iVolatabu, era tu vakarau na iVakadinadina i Jiova mera vukei iko. O rawa ni kerea mo vulica wale na iVolatabu se raica na neimami website na jw.org.

1 TARO: O cei na Kalou?

KENA ISAU: O Jiova na Tama i Jisu, e Kalou tawamudu, e Dauveibuli cecere tale ga.

KA E KAYA NA IVOLATABU:

“Keitou dau vakavinavinakataka na Kalou, na Tama ni noda Turaga o Jisu Karisito, ni keitou dau masulaki kemuni.”—Kolosa 1:3.

“E ganiti kemuni Jiova, na neimami Kalou, me nomuni na lagilagi, na vakarokoroko, kei na kaukaua, ni oni bulia na ka kece.”—Vakatakila 4:11.

Raica tale ga na Roma 10:13; 1 Timoci 1:17.

2 TARO: O cei o Jisu Karisito?

KENA ISAU: O Jisu e Luve ulumatua ni Kalou. E tiko na nona itekitekivu ni a buli. E vakarorogo o Jisu vua na Kalou, qai cakava na lomana.

KA E KAYA NA IVOLATABU:

‘E cecere sara vei au o Tamaqu.’—Joni 14:28.

“O [Jisu] na iyaloyalo ni Kalou tawaraici, na ulumatua ni kabuli kece.”—Kolosa 1:15.

Raica tale ga na Maciu 26:39; 1 Korinica 15:28.

3 TARO: Na cava na yalo tabu?

KENA ISAU: Na yalo tabu na igu e vakayacora kina na Kalou na nona inaki. E sega ni Kalou na yalo tabu, ia e rawa ni sobuti keda se vakaukauataki keda na tamata.

KA E KAYA NA IVOLATABU:

“Ni rogoca na vakabula i Meri o Ilisapeci, e lade na gone e ketena, e sobuti koya tale ga na yalo tabu.”—Luke 1:41.

“Dou na rawata na kaukaua ni sobuti kemudou na yalo tabu.”—Cakacaka 1:8.

Raica tale ga na Vakatekivu 1:2; Cakacaka 2:1-4; 10:38.

4 TARO: Na cava na Matanitu ni Kalou?

KENA ISAU: Na Matanitu ni Kalou e matanitu vakalomalagi, qai kena Tui o Jisu. Sa vakarau vakayacora na Matanitu qori na loma ni Kalou e vuravura taucoko.

KA E KAYA NA IVOLATABU:

“E uvuca na nona biukila na ikavitu ni agilosi. E qai rogo levu mai lomalagi eso na domo, era kaya: ‘Na matanitu kei vuravura sa mai Matanitu ni noda Turaga kei na nona Karisito, ena veiliutaki vakatui me tawamudu.’”—Vakatakila 11:15.

Raica tale ga na Taniela 2:44; Maciu 6:9, 10.

5 TARO: Era na lako kece i lomalagi na tamata vinaka?

KENA ISAU: Sega. Dua ga na ilawalawa e vakatokai me “qelenisipi lailai,” e digitaki ira na Kalou mera lako i lomalagi. Era na liutaka na vuravura kei Jisu.

KA E KAYA NA IVOLATABU:

“Dou kua ni rere na qelenisipi lailai, ni sa vakadonuya na Tamamudou me solia vei kemudou na Matanitu.”—Luke 12:32.

“Era na bete ni Kalou kei Karisito, era na veiliutaki vakatui vata kei koya.”—Vakatakila 20:6.

Raica tale ga na Vakatakila 14:1, 3.

6 TARO: Na cava na inaki ni Kalou me baleta na vuravura kei na kawatamata?

KENA ISAU: Ena vukica na vuravura me parataisi na Matanitu ni Kalou. Era na marautaka tawamudu kina na kawatamata yalodina na bula uasivi kei na bula vakacegu.

KA E KAYA NA IVOLATABU:

“Era na taukena na vuravura na yalomalumalumu, era na kunea na marau vakasakiti ena levu ni vakacegu.”—Same 37:10, 11.

“Ena qusia tani tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”—Vakatakila 21:3, 4.

Raica tale ga na Same 37:29; 2 Pita 3:13.