O se Nanuma Tiko?

O bau wilika vinaka na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

Na ivakadinadina cava vakaivolatabu e dusia ni dau nanumi keda na Kalou?

Nira vakabobulataki na Isireli e Ijipita, e kila na Kalou na nodra rarawa, e vakila tale ga na nodra mosi. (Lako 3:7; Aisea 63:9) Eda dau veinanumi tale ga nida buli meda ucuya na Kalou. E dau nanumi keda ena gauna eda nanuma kina ni sega ni ganiti keda na nona loloma.—wp18.3, t. 8-9.

E uqeti ira vakacava na lewenivanua na ivakavuvuli i Jisu mera kua ni veivakaduiduitaki?

Levu na Jiu ena gauna i Jisu era dau veivakaduiduitaki. E vakabibitaka o Karisito meda yalomalumalumu, e cata tale ga meda dokadokataka na matatamata eda lewena. E uqeti ira gona na nona imuri mera vaka ga na veitacini.—w18.06, t. 9-10.

Na cava eda vulica ena nona sega ni vakatara o Jiova me butuka na Vanua Yalataki o Mosese?

E dei nona veiwekani o Mosese kei Jiova. (Vkru. 34:10) Ni sa voleka ni cava na 40 na yabaki ena vanua talasiga, era kudruvaka ena ikarua ni gauna na Isireli ni sa sega na medra wai. E tukuna vei Mosese o Jiova me vosa ina vatu, ia e qai samuta na vatu o Mosese. A rairai cudru sara ga o Jiova ni sega ni muria o Mosese na nona veidusimaki, se nona sega ni vakalagilagia na Kalou. (Tiko 20:6-12) Eda vulica eke na bibi ni noda talairawarawa vei Jiova da qai vakalagilagi koya.—w18.07, t. 13-14.

Na cava ena rairai cala kina noda vakatulewa nida raica ga na ka e sau?

E tolu na ka eda dau raica: na matatamata, ituvaki vakailavo, kei na yabaki. E bibi meda raici ira eso tale mai na rai ni Kalou, ya ni sega ni dau veivakaduiduitaki! (Caka. 10:34, 35)—w18.08, t. 8-12.

Na cava eso na sala era veivuke kina na tacida itabaqase?

Ni veisau nodra ilesilesi na itabaqase, era se talei tiko ga vei Jiova. E rawa nira vukei ira na isa ni vakawati era sega ni tiko ena dina, vukei ira na malumu tu vakayalo, veivakavulici ena iVolatabu, vakarabailevutaka tale ga na nodra cakacaka vakaitalatala.—w18.09, t. 8-11.

Na cava e tiko ena iVukevuke ni Veivakavulici?

E tiko kina na ivola ni veisureti kei na jw card. E tiko tale ga kina e walu na tikidua vakarautaki vakavinaka, na Vale ni Vakatawa kei na Yadra! E vica na brochure, rua na ivola ni vuli, va na vidio yaga, wili kina na Vuna Mo Vulica Kina na iVolatabu.—w18.10, t. 16.

Me vaka e cavuti ena Vosa Vakaibalebale 23:23, ena volia vakacava na “ka dina” na lotu vaKarisito?

Eda sega ni volia na ka dina ena ilavo. Ia e vinakati na gauna kei na sasaga meda rawata kina.—w18.11, t. 4.

Na cava eda vulica ena nona ciqomi Komera tale o Osea?

E veibutakoci vakavica o Komera, ia e vosoti koya o Osea, e yalodina tiko ga vua. Ke veiyacovi tawadodonu na isa ni vakawati, e rawa ni vosoti koya na kena isa e yalodina tiko. Ia ni veiyacovi tale kei na kena isa e cala, sa na sega na yavu vakaivolatabu me sereki koya kina.—w18.12, t. 13.