O Cei na Kalou?

E levu era kaya nira vakabauta na Kalou, ia ni o taroga o cei na Kalou, ena duidui nodra ivakarau ni rai. Era kaya eso ni turaganilewa cudrucudru, e dau totolo ni vakatauitotogi vei ira na cakacala. Eso tale era kaya se mani vakacava na levu ni ka era cakava, ena lomani ira qai vosoti ira tu ga na Kalou. Ia eso tale era nanuma ni sa rui yawaki ira na Kalou qai sega ni dau veikauaitaki. Ni duidui va qori na rai, levu era na nanuma kina ni sa na dredre tu ga me kilai na Kalou.

E bibi mo kila na Kalou? Io. Nomu kila vinaka na Kalou ena vakainaki kina nomu bula. (Cakacaka 17:26-28) Ni o volekati koya tiko ga, ena lomani iko qai tokoni iko vakalevu. (Jemesa 4:8) E bibi gona na kilaka dodonu me baleta na Kalou ni na rawati kina na bula tawamudu.—Joni 17:3.

O na kila vakacava na Kalou? Vakasamataka mada e dua o kila vinaka, me vaka na nomu itokani voleka. E tekivu vakacava nomudrau veitokani? De dua o saga mo kila na yacana, nona itovo, ka e taleitaka se cata, ka sa cakava, nona isausau kei na so tale. Qori sara ga na ka e vakavolekati iko vua, na nomu kila na veika me baleti koya.

O na kila vinaka talega na Kalou ni o dikeva e vica na taro qo:

• O CEI NA YACA NI KALOU?

• NA CAVA E KILAI ME BALETA NONA ITOVO?

• NA CAVA SA CAKAVA OTI NA KALOU?

• NA CAVA ENA VAKARAU CAKAVA NA KALOU?

• ENA YAGA VAKACAVA NOMU KILA NA KALOU?

Na inaki ni mekesini qo me saumi kina vakaivolatabu na taro kece qori. Ena vukei iko mo kila vinaka na Kalou, o na vulica tale ga na yaga ni nomu saga mo drau veivolekati.