Raica Vakayalomatua na Gauna e Vakayagataki Ena Marau
1 Ena gauna dredre oqo, o keda kece eda gadreva meda dau vakacegu ena so na gauna. Me vakarauta gona na gauna eda vakayagataka ena marau. Ia, ke levu na gauna e vakayagataki ena marau, veivakalasai, kei na veigadivi, sa na lailai kina na gauna ena veika vakayalo. Meda yalomatuataka gona na gauna eda vakayagataka ena marau. (Maciu 5:3) Ena rawa vakacava? Ena noda muria na ivakasala ena Efeso 5:15-17, VV.
2 Vakarauta Ga: E vola o Paula ni o ira na lotu Vakarisito mera “qarauna matua sara” na nodra vakayagataka na nodra bula. E gadrevi meda lewai keda vakavinaka, da lewa matau tale ga na gauna e vakayagataki ena marau. E vinaka meda dau vakasamataka vakabibi na ka eda cakava ena noda gauna galala. Me yaga na inaki ni noda veivakamarautaki, me kua nida vakaoti gauna ga kina se me vakawawaletaki keda ga. Ke da cakava oti e dua na ka da qai vakila ni sega ni yaga, da sega ni lomavakacegu, qai ca vei keda, e vakaraitaka ni gadrevi meda vakalewa vinaka tale mada na ka eda cakava ena noda gauna galala.
3 Kua ni Yalowai: E veivakasalataki o Paula meda “vakayagataka vinaka na gauna” ena ka e bibi ena noda bula, da qai “kakua ni yalowai.” O keda na lotu Vakarisito yalayala oti e sega ni usutu ni noda bula na qarai ni marau. E dina ni noda gauna ni vakacegu e rawa ni vakabulabulataki keda vakayago, ia na ivurevure ni kaukaua vakayalo na igu ni Kalou. (Aisea 40:29-31) E vakaukauataki keda na yalona ena noda itavi vakalou—noda vulica na iVolatabu, tiko ena veisoqoni vakaivavakoso, cakacaka vakavunau—sega ena ka ni veivakamarautaki.
4 Navuca na Ka me Vakaliuci: E vakasalataki ira na lotu Vakarisito o Paula mera ‘vaqara na ka e vinakata na Turaga mera cakava.’ E vakavulica o Jisu ni ka eda cakava me yavutaki ena Matanitu ni Kalou da qai vakaliuca ena noda bula. (Maciu 6:33) E bibi meda vakaliuca na veika ena rawa kina vei keda meda bulataka tiko ga na noda yalayala vei Jiova. Ena qai vakayagataki vinaka na gauna nida yalomatuataka na ka ni marau eda cakava. Nida cakava oya, ena yaga vei keda, da qai marautaka tale ga vakalevu.—Dauv. 5:12.