Uqeti Keda na Vakabauta ina Cakacaka Vinaka
1 E yavalati Noa, Mosese kei Reapi na vakabauta me ratou cakava na ka. O Noa a taya na waqa. O Mosese a vakanadakuya na veika vakayago e rawa ni taukena vakalekaleka ga ena vale vakatui i Fero. O Reapi a vunitaki rau na yamata qai muria na nodrau ivakasala, eratou vakabulai kina vakavuvale. (Iper. 11:7, 24-26, 31) Na cakacaka vinaka cava ena uqeti keda kina na vakabauta meda cakava ena gauna oqo?
2 Na Vunau: E uqeti keda na vakabauta meda tukuni koya na noda Kalou vinaka kei na ituvatuva e vakarautaka me na rawa kina na marau tawamudu. (2 Kor. 4:13) E so na gauna eda na via lomalomarua beka ni vunau. Ia kevaka ‘e tu e matada ena veisiga o Jiova,’ eda na vakaukauataki, ena seavu tale ga yani na noda rere. (Same 16:8) Ena uqeti keda na vakabauta meda wasea na itukutuku vinaka ena gauna veiganiti vei ira na wekada, o ira eda tiko veivolekati, itokani e valenicakacaka, e koronivuli kei na vuqa tale.—Roma 1:14-16.
3 Na Tiko ena Soqoni: Noda tiko wasoma ena soqoni e dua tale na cakacaka vinaka e vu mai ena vakabauta. E dina vakacava oya? Noda tiko ena soqoni e dusia nida vakadinata ni o Jisu e tiko vata kei keda ena vuku ni yalo tabu ni Kalou. (Maciu 18:20) Eda vakaraitaka nida vinakata meda “rogoca sara na ka sa tukuna na Yalo Tabu vei ira na veisoqosoqo lewe ni lotu.” (Vkta. 3:6) Eda taura vakabibi na ivakasala e cauraki mai kina, nida raica ena mata ni vakabauta ni o koya e vakavulici keda tiko, o Jiova na Dauniveivakavulici Levu.—Aisea 30:20, NW.
4 Na Noda Vakatulewa: Na noda vakabauta dei na veika eda sega ni raica e rawa ni uqeti keda meda vakaliuca na veika vakayalo ena noda bula. (Iper. 11:1, VV) Kena ibalebale oqo, ni na vinakati meda vakuai keda mai na so na ka vakayago. Kena ivakaraitaki, e dua na qase ni ivavakoso a sega ni ciqoma e dua na cakacaka saulevu, ni na calata kina na soqoni, levu na gauna ena sega ni tiko kei iratou na nona vuvale, ena vakataotaka tale ga na nona cakacaka vakapainia. Meda nuitaka vakatabakidua na ka e kaya na iVolatabu ni o Jiova ena vukei ira era “vakasaqara taumada na matanitu ni Kalou, kei na nona yalododonu.”—Maciu 6:33.
5 Na vakayacoka ni vakabauta ena noda bula era vakila tale ga na tani. E dina oqo, ni noda vakabauta e kilai e vuravura taucoko. (Roma 1:8) Meda vakaraitaka kece mada ga ni bula tiko na noda vakabauta ena cakacaka vinaka.—Jeme. 2:26.