Vukei Ira Mera Vakarokorokotaki Jiova
1 Na itukutuku bibi oqo sa vakarogoi tiko vei ira na tamata kece: “Dou rerevaka na Kalou, ka vakarokoroko vei koya; ni sa yaco na nona gauna me lewa: ia dou vakarokoroko vei koya ka buli lomalagi, kei vuravura, kei na wasawasa, kei na veivurevure-ni-wai.” (Vkta. 14:6, 7) Sa noda itavi dokai meda vakarogoya tale ga yani. Na cava mera kila na tamata mera na rerevaki Jiova kina ra qai qaravi koya?
2 Na Yacana: E bibi mera kila na yaca ni Kalou dina mera na vakaduiduitaki koya mai na veikalou lasu era qaravi tu nikua. (Vkru. 4:35; 1 Kor. 8:5, 6) O ira mada ga na vola na iVolatabu era vola vaka7,000 vakacaca na yaca lagilagi i Jiova. Dina ni na gadrevi ena so na gauna meda lewa vinaka na gauna eda kauta cake mai kina na yaca ni Kalou, ia meda kua vakadua ga ni tabonaka na yacana se madua ni cavuta. E loma ni Kalou mera kila na yacana na tamata kece.—Same 83:18.
3 Nona iTovo: Era na qai mai vakarokorokotaki Jiova ga na tamata ke ra kila mada e liu se Kalou vakacava o koya. Meda vakatakila gona vei ira na nona loloma uasivi, vuku levu e tu vua, nona lewadodonu e tawavakamelei, kei na nona kaukaua levu, vaka kina na nona dau veivosoti, yalololoma, kei na so tale na itovo totoka. (Lako 34:6, 7) Bibi tale ga mera vulica mera rerevaka na Kalou, mera dokai koya mai vu ni lomadra, ra qai vakadinata ni nodra bula ena vakatau sara ga ena veivakadonui i Jiova.—Same 89:7.
4 Toro Voleka Vua na Kalou: O koya e via bula ena siga ni cudru ni Kalou e dodonu me masuti Jiova ena vakabauta. (Roma 10:13, 14; 2 Ces. 1:8) Oqo e sega ni yala wale ga ena kena kilai na yaca ni Kalou kei na nona itovo. Bibi meda vukei ira na tamata mera mai veivolekati sara kei Jiova, mera nuitaki koya mai vu ni lomadra. (Vakai. 3:5, 6) Nira sa vakaitovotaka na ka era vulica, ra masuta vagumatua na Kalou, ra qai vakila sara ga na nona cakacaka ena nodra bula, ena qaqaco cake na nodra vakabauta, qai vakavuna oqori mera toro volekati Jiova.—Same 34:8.
5 Meda kacivaka mada ga vagumatua na yaca ni Kalou da qai vukea e so tale mera mai nuitaki koya vakaoti, mera rerevaki koya tale ga. Nida cakava oqori, eda na vukea e levu tale mera mai kilai Jiova ra qai vakarokorokotaki koya me ‘Kalou e nodra ivakabula.’—Same 25:5.