Kacivaka na iTukutuku ni Matanitu ni Kalou
1 “Sa dodonu me’u lako me’u tukuna nai tukutuku-vinaka ni matanitu ni Kalou . . . ni sa ka oqo ka’u sa talai mai kina.” (Luke 4:43) Ena veivosa oya a vakatakila kina o Jisu na usutu ni nona cakacaka vakaitalatala—na Matanitu ni Kalou. Oqo e usutu tale tiko ga ni itukutuku eda kacivaka tiko nikua, me vaka e tukuni tu mai vakailiu ena Maciu 24:14: “Ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco emuri nai vakataotioti.” Na ka dina cava me baleta na Matanitu ni Kalou e gadrevi mera rogoca na tamata?
2 E sa veiliutaki tiko mai lomalagi ena gauna oqo na Matanitu ni Kalou, ena vakarau sosomitaka tale ga na veiliutaki vakatamata. Sa kolotaki mai lomalagi na Tevoro, sa donuya tu oqo na iotioti ni veisiga na ivakarau ni veika ca nikua. (Vkta. 12:10, 12) Ena vakarusai vakadua na ivakarau ni veika ca oqo i Setani, ia na Matanitu ni Kalou ena sega vakadua ni yavalati rawa. Ena tu ga me tawamudu.—Tani. 2:44; Iper. 12:28.
3 Na Matanitu ni Kalou ena vakaceguya na nodra gagadre uasivi era talairawarawa ena kena veiliutaki. Ena kauta laivi na rarawa e vu mai na ivalu, basulawa, veivakasaurarataki kei na dravudravua. (Same 46:8, 9; 72:12-14) Era na sautu ena kakana na tamata kece ga. (Same 72:16; Aisea 25:6) E sa na ka ga ni gauna makawa na tauvimate kei na leqa ni yago. (Aisea 33:24; 35:5, 6) Ni toso na bula ni tamata me uasivi, sa na veisau na vuravura me parataisi, ra qai veisaututaki na tamata kece ga.—Aisea 11:6-9.
4 Eda vakaraitaka nida via vakarurugi ina veiliutaki ni Matanitu ni Kalou ena ivakarau ni noda bula ena gauna oqo. Me tara na basoga ni noda bula kece na itukutuku ni Matanitu ni Kalou, okati kina noda isausau kei na ka eda vakaliuca. Kena ivakaraitaki, kevaka e noda itavi meda vakarautaka na veika me bula kina noda vuvale, meda kua ni vakalaiva na veika vakayago me vakaruguta na kena vakaliuci tiko ga na veika e vauca na Matanitu ni Kalou. (Maciu 13:22; 1 Tim. 5:8) Ia, meda muria ga na veivakadreti i Jisu: “Dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo [na veika vakayago].”—Maciu 6:33.
5 E gadrevi kina vakatotolo mera rogoca na tamata na itukutuku ni Matanitu ni Kalou ra qai cakava kina e dua na ka ni se vo tiko na gauna. Meda vukei ira mada ga ena noda “vakauqeti ira na tamata me baleta na matanitu ni Kalou.”—Caka. 19:8, VV.