‘Cila me Vaka na Veicina’
1 Ni sa qai torosobu tiko ga na ituvaki vakayalo kei na itovo ni vuravura oqo, era ‘cila me vaka na veicina’ ena 234 na veivanua e rauta na ononamilioni era qarava na Kalou dina, o Jiova. (Fpai. 2:15) Oqo eda kilaitani kina. Eda vakaraitaka vakacava na rarama talei ni ka dina e lako mai vei Jiova?—2 Kor. 3:18.
2 Noda iTovo: Era dau raica totolo na tamata na noda itovo. (1 Pita 2:12) A raica rawa e dua na marama na nona itovo e dua na iVakadinadina erau cakacaka vata, e dau loloma, dau veivukei qai sega ni dau tauca na vosa ca se me dredrevaka na veiwali vakasisila. Nira saga mera vakacudrui koya e so tale nira vosa ca e matana, e malumu tu ga qai dei ena ka e vinaka. E tarai koya vakacava na marama oya na ka oqo? E kaya: “Au kurabuitaka na nona itovo, au mani vakataroga kina na veika vakaivolatabu. Au vulica sara kina na Vosa ni Kalou, au qai papitaiso e muri.” E tomana: “E uqeti au na nona itovo meu dikeva kina na nodra vakabauta na iVakadinadina i Jiova.”
3 Na noda rai me baleta na veiliutaki, na itovo vakavuravura kei na noda vosa savasava e vakavuna meda kilaitani kina na iVakadinadina i Jiova nida dau bulataka na ivakatagedegede cecere vakaivolatabu. Na itovo savasava vaka oqori e rawa ni vakacaucautaki kina o Jiova qai dreti ira e so tale mera mai sokaloutaki koya.
4 Veika Eda Tukuna: Era na rairai sega ni kila o ira na dau dikeva na noda itovo vinaka na vuna eda duidui kina vakavo wale ga ke da tukuna vei ira na noda vakabauta. Vakacava o ira oni cakacaka vata se vuli vata, era kila tiko ni o dua vei ira na iVakadinadina i Jiova? O dau saga beka mo vakamacalataka na ka dina ni o dau veitalanoa wale tu kei ira na so? E nomu inakinaki beka mo ‘vakacila na nomu rarama e matadra na tamata’ ena gauna veiganiti kece ga?—Maciu 5:14-16, VV.
5 E gadrevi na lomasoli nida vakayacora na noda itavi ni vakacila rarama. Ke vu mai yaloda, ena uqeti keda meda kua so ni kauai ena veika e sega ni bibi, me rawa nida solia kina noda igu ena cakacaka ni veivakabulai oqo ena kena vunautaki na itukutuku vinaka ni Matanitu ni Kalou kei na vakayaco tisaipeli.—2 Kor. 12:15.
6 Meda vakacila rarama tiko mada ga ena noda itovo kei na ka eda tukuna. Kevaka eda cakava oqori, era na uqeti tale e so mera mai tomani keda ena vakacaucautaki Jiova.