E Ka Dina na Vosa ni Kalou
1. Na itukutuku bibi cava e tiko ena iVolatabu?
1 “Sa ka dina mailiu sara na nomuni vosa,” e vola na daunisame. (Same 119:160) Levu sara na taro bibi me baleta na bula ni tamata e sauma o Jiova ena nona Vosa. E vakarautaka tu vei keda na vakacegu kei na inuinui kevaka eda lomanuiqawaqawa. Qai vakaraitaka na ka meda cakava meda toro volekati koya kina. E kaya e dua na yalewa e tataleitaki: “Noqu vulica na ka dina mai na iVolatabu e vaka ga niu tu ena dua na rumu buto, oti, au qai curuma yani e dua tale na rumu e rarama vinaka tu.” O dau tovolea mo vakamacalataka na ka dina mai na Vosa ni Kalou ena gauna kece o rawata?
2. E vakavinakataka vakacava na bula ni tamata na iVolatabu?
2 Vosa Mana Qai Taleitaki e Veivanua Kece: Na ka dina e rawa ni uqeta na yalo ni dua na tamata qai veisautaka na nona bula. (Iper. 4:12) O Rosa e dua na goneyalewa a dau volitaki koya tu e liu, vakayagataka na wainimate gaga qai gunuva vakasivia na yaqona ni valagi. E kaya: “Dua na siga niu sa sega tale ni qai kila na ka meu cakava, rau basika e noqu matanivale e dua na veiwatini iVakadinadina i Jiova. Erau vakamacalataka ni rawa ni walia na noqu leqa na iVolatabu. Au tekivu vulica na Vosa ni Kalou qai vakatubuqoroqoro dina na ka au vulica kina. Loma ga ni dua na vula, au sa veisau. Ia oqo ni sa vakainaki na noqu bula, sa oti tale ga e kea noqu dau vakararavi ena gunu se na wainimate gaga. Kena ikuri, e gu na yaloqu meu muria na ivakavuvuli i Jiova baleta ni lomaqu dina me keirau veitokani. Ke a sega na ivakasala momona ni Vosa ni Kalou, keu sa tinia koso na noqu bula.”—Same 119:92.
3. Na cava meda kua ni lomalomarua kina ni wasea na itukutuku ni iVolatabu?
3 Na iVolatabu e uasivia e levu na ivola nikua baleta ni dreta na yalodra na tamata kece ga mai na “veivanua kece, kei na veimataqali, kei na veimatanitu, kei na duivosavosa.” (Vkta. 7:9) E loma ni Kalou “me bula na tamata kecega, ka mai kila sara nai vakavuvuli dina.” (1 Tim. 2:4) O koya gona, meda kua sara ni nanuma cala ni na sega ni taleitaka na itukutuku vinaka e dua baleta beka na bula e susu mai kina. Na ka meda cakava oya meda wasea na itukutuku me baleta na Matanitu ni Kalou vei ira na tamata kece ga, da qai wilika sara ga vei ira na iVolatabu, kevaka e rawa.
4. Eda na vakayagataka vakacava na iVolatabu meda vakadinadina kina?
4 Vakabibitaka na Ka e Kaya na iVolatabu: Dau basika e levu na gauna veiganiti meda vakayagataka kina na iVolatabu ena cakacaka vakavunau. Ni o sa solia na ivoladraudrau ena nomu vakayagataka na vakatutu e vakarautaki ena Cakacaka Vakaitalatala, tovolea mo vakamacalataka na tikinivolatabu e volai tiko ena vakatutu oqori. Ke kau tiko ena cakacaka vakavunau na ivola me na soli ena vula oya, era kunea e so ni yaga na kena dau wiliki ena itekivu ni nodra ivakamacala e dua na tikinivolatabu veiganiti sa raici oti mai. Ni o sa sikovi koya lesu na itaukeinivale, wasea vua e dua se rua na tikinivolatabu ni na yaga oqori ena kena toroi cake nona kilaka vakaivolatabu. Ni o sa vuli iVolatabu tiko kei na dua, vakamua tiko ga nomudrau vuli ena vica na tikinivolatabu bibi. Ia ke o sega ni cakacaka voli vakavunau, saga mo kauta tiko ga na nomu iVolatabu, ni na rawa ni basika na ituvaki veiganiti mo na vakayagataka kina.—2 Tim. 2:15.
5. Na cava meda saga meda vakayagataka kina na iVolatabu ena noda cakacaka vakaitalatala?
5 Meda vukea mada ga e so tale mera vakila na igu dau veivakayavalati ni Vosa ni Kalou ena noda vakayagataka na iVolatabu ena gauna veiganiti kece ga.—1 Ces. 2:13.