Vakatakila na Yaca ni Kalou
1. Na cava e yacovi ira e so nira sa mai kila na yaca ni Kalou?
1 Vakacava mada ni o se qai rogoca vakadua na yaca ni Kalou? E levu ena via tautauvata na ka era tukuna me vakataki koya na marama oqo: “Au tagi sara ga ena imatai ni gauna au raica kina na yaca ni Kalou ena iVolatabu. Lauti au dina na noqu mai kila na yaca ni Kalou kei na noqu rawa ni cavuta.” Na nona mai kila na yaca ni Kalou e itekitekivu bibi dina ena nona veikilai kei na nona veiwekani vakavoleka kei Jiova.
2. Na cava e bibi kina meda vakatavuvulitaki Jiova vei ira tale e so?
2 Na Cava me Vakatakilai Kina? Na yaca ni Kalou e vakavotuya na nona itovo, inaki, kei na veika e cakava. E vakavotuya tale ga na nona veivakabulai. E vola na yapositolo o Paula ni “na bula ko ira vakaaduaga era sa masuta na yaca i Jiova.” Ia e taroga o Paula, “era na qai masu vakacava vua” na Kalou o Jiova na tamata kevaka era lecavi koya tu ra qai sega ni vakabauti koya? Oqori na vuna e bibi kina vei ira na lotu Vakarisito mera vakatakila na yaca ni Kalou kei na ka ena cakava ena vuku ni yacana. (Roma 10:13, 14) E tiko ga e dua na vuna levu cake e kilikili me vakatakilai kina na yaca ni Kalou.
3. Na cava na vuna levu eda vunau tiko kina?
3 Ena veiyabaki ni 1920, era taura rawa na tamata ni Kalou mai na nodra dikeva na iVolatabu ni tiko e dua na ile bibi, oya ni a tarogi na dodonu ni nona veiliutaki cecere na Kalou qai beci na yacana tabu. Ia ni se bera ni vakarusai ira na ca o Jiova ena nodra buturaka sobu na yacana, ena vinakati me ‘kilai e vuravura taucoko’ na itukutuku dina me baleti koya. (Aisea 12:4, 5; Isik. 38:23) O koya gona, na vuna levu eda vunau kina oya meda vakacaucautaki Jiova e matadra na tamata kece ga da qai vakacerecerea na yacana. (Iper. 13:15) Eda na via vakaitavi ena kena levu duadua eda rawata ena cakacaka lesi vakalou oqo baleta ga nida lomana na Kalou kei ira na tamata kece ga.
4. Era mai kilai vakacava na iVakadinadina i Jiova nira dau vakayagataka na yaca ni Kalou?
4 ‘Na Tamata me Tiko Vei Ira na Yacana’: Eda ciqoma ena 1931 na yaca iVakadinadina i Jiova. (Aisea 43:10) Era bau vakatakila dina vakalevu na yaca ni Kalou na nona tamata mai na gauna oya me yacova nikua. Sa rauta me kaya kina oqo na ivola na Proclaimers, ena tabana e 124: “Nikua, se yasa i vuravura cava ga e cavuta kina na yaca i Jiova e dua, ena kilai sara ni o koya e dua na iVakadinadina i Jiova.” Vakaevei, o kilai tale ga vaka oqori o iko? E dodonu me tosoi keda na noda marautaka na vinaka i Jiova ena vukuda meda “vakavinavinaka ki na yacana,” meda tukuni koya ena gauna veiganiti kece ga.—Same 20:7; 145:1, 2, 7.
5. Erau vauci vakacava na noda ivalavala kei na noda vakatokayacataki ena yaca ni Kalou?
5 Nida ‘tamata e tiko vei keda na yaca ni Kalou,’ sa dodonu ga meda tutaka na nona ivakatagedegede cecere. (Caka. 15:14; 2 Tim. 2:19) Na imatai ni ka era dau liaca na tamata me baleti ira na iVakadinadina i Jiova na nodra itovo vinaka. (1 Pita 2:12) Meda kua sara ni vakarogorogocataka na yacana ena noda beca na ivakavuvuli vakaivolatabu se da biuta me ikarua ni ka ena noda bula na nona qaravi. (Vunau 22:31, 32; Mala. 1:6-8, 12-14) Meda vakadinadinataka mada ga ena noda ivakarau ni bula nida vakamareqeta na yacana dokai eda vakatokayacataki kina.
6. Na itavi dokai cava e rawa ni noda ena gauna oqo me sega ni mudu?
6 Nikua, eda sa raica na dina ni ka a kaya o Jiova: “Mai nai cadracadra ni mata-ni-siga ka yacova na kenai dromudromu ena vakalevulevui na yacaqu vei ira na lewe ni veivanua.” (Mala. 1:11) Meda vakatakila tiko mada ga na ka dina me baleti Jiova da qai ‘vakavinavinakataka na yacana tabu me sega ni mudu.’—Same 145:21.