Dau Vakavinavinaka
1 E dina nida sa bula donuya tu na “veigauna dredre,” ia e se tiko ga e levu na ka meda vakavinavinakataki Jiova kina. (2 Tim. 3:1, VV) E dua na vuna levu meda vakavinavinakataki koya kina, oya na isolisoli talei i Luvena me baleti keda. (Joni 3:16) Kena ikuri, nira walokai tu vakayalo na lotu lasu, e sega ni tukuni rawa na levu ni kakana vakayalo eda vakamamautaki tu kina. (Aisea 65:13) Eda lewe sara tale ga ni dua na mataveitacini e vuravura raraba, da qai kalougata nida vakaitavi ena kena vakatetei na sokalou dina. (Aisea 2:3, 4; 60:4-10, 22) Eda na vakavinavinakataki Jiova vakacava ena nona vakalougatataki keda tiko?—Kolo. 3:15, 17.
2 Marautaka Noda Veiqaravi Mai Vu ni Lomada: Ni vakamacalataka tiko na yapositolo o Paula na yalo ni soli ka, e vola: “Ko koya sa solia e na marau sa vinakata na Kalou.” (2 Kor. 9:7) E okati tale ga ena ivakavuvuli oqo na noda veiqaravi vua na Kalou. E laurai na noda vakavinavinaka nida guta na ka dina, da marautaka na soqoni vakarisito, da gumatua ena cakacaka vakavunau, kei na noda cakava ena marau na loma ni Kalou.—Same 107:21, 22; 119:14; 122:1; Roma 12:8, 11.
3 Ena Lawa a soli vei Isireli makawa, e so na imadrali a sega ni vakaturi na kena levu ni ka me vakacabori. E kea sara ga, sa na qai vakatau vei ira na dausokalou yadudua na levu ni ka mera solia mera vakaraitaka kina nodra vakavinavinaka, me lako vata ga kei na ‘ka ni veivakalougatataki sa solia vei ira o Jiova.’ (Vkru. 16:16, 17) E vaka tale ga kina nikua, noda dau vakavinavinaka mai vu ni lomada ena uqeti keda meda cakava sara ena kena levu eda rawata na vunautaki ni Matanitu ni Kalou kei na cakacaka ni veivakatisaipelitaki. Ena loma ni dua na yabaki, e levu na gauna veiganiti eda taudonuya e rawa nida vakaraitaka kina na noda vakavinavinaka. E so era cakacaka saumi era vakayagataka vinaka na gauna ni nodra gade, mera vakarabailevutaka kina na nodra cakacaka vakavunau, se ra painia veivuke sara mada ga, e vaka kina e so na gonevuli ena gauna ni sereki. O rawa beka ni vakarabailevutaka na nomu cakacaka vakavunau ni o vakayagataka vinaka e so na gauna veiganiti vaka oqori?
4 Meda Uasivi ena Vakavinavinaka: E dua na sala bibi ni noda vakavinavinaka vei Jiova oya na noda dau masu. (1 Ces. 5:17, 18) E uqeti keda na Vosa ni Kalou meda ‘uasivi ena vakavinavinaka.’ (Kolo. 2:7) Kevaka mada ga eda osooso tu se da lomabibitaka tiko e dua na ka, meda dau vakavinavinaka tiko ga ena noda masu e veisiga. (Fpai. 4:6) Io, na noda cakacaka vakavunau kei na noda masu ena ‘tubu vakalevu kina na noda vakavinavinaka vua na Kalou.’—2 Kor. 9:12.