O Jiova e Vukei Ira na Nuitaki Koya
1 Mera rawaka, e levu era vakararavi ena ilavo, nodra kaukaua kei na nodra taledi. (Same 12:4; 33:16, 17; 49:6) Ia e vakadeitaka na iVolatabu ni o Jiova e ‘nodra ivukevuke qai nodra isasabai’ o ira na rerevaki koya ra qai nuitaki koya. (Same 115:11) Meda raica mada e rua na sala eda na nuitaki Jiova kina.
2 Nida iTalatala Lotu Vakarisito: E dodonu meda vakararavi vua na Kalou nida veivakavulici ena ivavakoso se ena cakacaka vakavunau. Raica mada na ivakaraitaki i Jisu. Dina ga ni Luve ni Kalou, ia e sega ni nuitaka nona vuku se na ka e rawata, e vakararavi vakatabakidua vua na Tamana vakalomalagi. (Joni 12:49; 14:10) Sa qai wacava sara o keda! (Vkai. 3:5-7) Ni vakalougatataki keda o Jiova ena qai rawa nida vakalagilagi koya, qai yaga tale ga noda vukei ira e so.—Same 127:1, 2.
3 Eda vakaraitaka noda nuitaki Jiova nida kerea nona veidusimaki ena masu, kei na veivuke ni yalo tabu. (Same 105:4; Luke 11:13) Eda vakaraitaka tale ga noda nuitaka na Kalou nida vakayagataka nona Vosa na iVolatabu me yavu ni ka eda vakavuvulitaka. Na itukutuku e tu kina e dau veiuqeti, qai veisautaka na bula. (Iper. 4:12) Nida ‘veiqaravi gona ena kaukaua e solia mai na Kalou,’ e vakalagilagi ga kina o Jiova.—1 Pita 4:11, VV.
4 Nida Sotava na Leqa: E dodonu tale ga meda kere veivuke vei Jiova nida sotava na leqa se ni tarabi na bula. (Same 46:1) Kena ivakaraitaki, ena sega beka ni vakatara nomu boso ni cakacaka mo tiko ena soqo ni tabacakacaka, se dua beka nomu leqa vakavuvale. Ena ituvaki vaka oqo eda na vakaraitaka kina noda nuitaki Jiova ena noda masuti koya vagumatua, kei na noda muria sara ga na ivakasala e tu ena nona Vosa, vaka kina na nona isoqosoqo. (Same 62:8; 119:143, 173) Nida cakava oqori eda na vakila kina na veitaqomaki i Jiova.—Same 37:5; 118:13, 16.
5 E vakadeitaka vei keda o Jiova: “Sa kalougata na tamata sa vakararavi vei Jiova, ka sa nuitaki Jiova ga.” (Jere. 17:7) Meda nuitaki koya mada ga ena veika kece eda cakava!—Same 146:5.