Vakavinavinakataka na Yalololoma i Jiova

Ena Vakananumi na Mate i Karisito ena 24 Maji

1. E vakaraitaka vakacava vei keda o Jiova na nona yalololoma?

¹ E lagata na daunisame: “Me ra ia mada na vakavinavinaka vei Jiova e na vuku ni nona yalololoma, kei na nona cakacaka mana vei ira na luve ni tamata!” (Same 107:⁠8) Na loloma ni Kalou e sega wale ga ni nona yalovinaka qai dau kauaitaki ira na tamata. E kilai oqo ena vosa uqeti ni veivakalagilagi: “Sa qai tokoni au, Jiova, na nomuni loloma [se yalololoma].” (Same 94:18) Sa dua dina na ivakaraitaki uasivi ni yalololoma i Jiova na nona soli Luvena duabauga ena vukuda!​​—⁠1 Joni 4:​9, 10.

2. Eda na vakavinavinakataki Jiova vakacava?

² Ni sa voleka tiko na iVakananumi ni Mate i Karisito, eda na vakaraitaka vakacava noda vakavinavinakataka na “Kalou dauyalololoma”? (Same 59:17) E dodonu vei keda yadudua meda vakatikitikitaka na gauna meda vakananuma kina vakatitobu na iotioti ni vica na siga i Jisu e vuravura. (Same 143:⁠5) Ena yaga tale ga ke da vakamuria na ituvatuva ni wili iVolatabu ena macawa ni iVakananumi, me vaka e tabaki ena Dikeva na iVolatabu e Veisiga​​—⁠2005, ke rawa, meda wilika da qai vakadikeva tale ga na wase 112-​16 ni ivola Tamata Rogo Duadua kei na so tale na ivola vakaivolatabu. Vakananuma na tikina o wilika, qai kauaitaka na ka e tukuni kina. (1 Tim. 4:​15) Na noda vulica na Vosa ni Kalou salavata kei na masu, ena sega wale ga ni vakaukauataka na lomada, e vakaraitaka tale ga na noda lomani Jiova.​​—⁠Maciu 22:⁠37.

3, 4. (a) E rawa vakacava nida vakatotomuria na nodra ivakaraitaki na tacida e Liberia? (b) O cei o sa nakita tiko mo na sureta ena iVakananumi?

³ Uqeti Ira e So Mera Vakavinavinakataka na Kalou: Era tiko ena iVakananumi e vuravura raraba ena yabaki sa oti e 16,760,607. Ena dua na koro e Liberia, era vola e dua na ivola o ira na tacida e kea vua na turaganikoro, ra vakamacalataka kina nira na vakananuma tiko na iVakayakavi ni Turaga. A vakadonuya na turaganikoro mera vakayagataka na raraniqito, qai kacivaka tale ga vei ira na tiko ena yasayasa oya mera gole yani ina soqo ni iVakananumi oqori. Dina ni lima ga na dautukutuku ena koro oya, ia era a tiko ena iVakananumi e 636!

⁴ E vakatale ga kina o keda, eda vinakata mera mai tiko ena iVakananumi e levu. Vakacava meda vola na yacadra o ira eda na via sureta? Rawa nida vakayagataka na tabana sara e muri ni Vale ni Vakatawa, 15 Maji, meda veisureti kina. Me vakayagataki tale ga na tikidua ni veisureti. Taipataka se vola vakamatata ena tikidua ni veisureti na gauna kei na vanua ena caka kina na iVakananumi, qai solia vei ira kece o sureta. Ni sa voleka na 24 Maji, meda lesuvi ira tale o ira eda sureta, da qai vakadeitaka.

5. Eda na uqeti ira vakacava na vuli iVolatabu mera tiko ena iVakananumi?

⁵ E rawa vakacava nida vukei ira na vuli iVolatabu era se bera ni lako ina soqoni mera tiko ena iVakananumi, me yaga tale ga vei ira? Vakayagataka e vica na miniti ena gauna kece ni vuli mo vakaraitaka kina na bibi ni noda tiko ena iVakananumi. E tiko na ivakamacala yaga ena itabataba ni Vale ni Vakatawa, 15 Maji, 2004, tabana 3-7, kei na ivola Reasoning, tabana 266-9.

6. Na cava e bibi kina meda kidavaki ira na vulagi ena iVakananumi?

⁶ Kidavaki Ira na Vulagi: Meda kidavaki ira na vulagi era tiko ena iVakananumi. (Roma 12:13) Meda dabe vata kei ira eda sureta mai, da raica me tiko nodra iVolatabu kei na ivolanisere. Meda vakaliuliu sara ga noda kidavaki ira kece na tacida era sa malumalumu tu vakayalo era sasaga mera mai tiko ena iVakananumi. Na noda kauaitaki ira vakayalololoma ena rawa ni uqeti ira mera tomani keda tale ena soqoni vakaivavakoso. (Luke 15:​3-7) Meda saga mada ga ena siga bibi oqo, meda uqeti ira e so mera tomani keda nida vakavinavinakataki Jiova ena “nona loloma vakaidina.”​​—⁠Same 31:⁠21.