Solia na iVoladraudrau ni O Cakacaka Vakavunau

1, 2. E uqeti ira vakacava e so Na Vale ni Vakatawa kei na Yadra!?

¹ “E taleitaki, veiganiti, qai veiuqeti.” “Bau dua na ivola au wilika e veivakayaloqaqataki dina.” Oqo na nodra rai na dau wilika Na Vale ni Vakatawa kei na Yadra! e vuravura taucoko. Io, e sa vakadinadinataki na kena yaga vakalevu na noda ivoladraudrau ena noda vunautaka na itukutuku vinaka vei ira na “tamata kecega.”​​—⁠1 Tim. 2:⁠4.

² A taura na Yadra! e dua na daunibisinisi ni taleitaka e dua na kena ulutaga. A wilika tale ga Na Vale ni Vakatawa erau soli vata, e tiko kina e dua na ulutaga e uqeti koya me vakasamataka tale kina na ivakavuvuli a vakabauta tu mai vakabalavu, na Letoluvakalou. E vakavuna sara ga me tataleitaki. Ni oti ga e ono na vula sa papitaiso. E dua tale na turaga e dau taura vakalevu na noda ivoladraudrau, ia e sega ga ni dau wilika. Ia o nona marama e dau wilika na ivoladraudrau, dina ga ni sega ni dau via vosa vei ira na iVakadinadina. E mani uqeta sara ga na lomana na ka e yalataka tu na iVolatabu me baleta na parataisi e vuravura era na tawana na yalododonu. Ni toso na gauna sa qai mai dauveiqaravi i Jiova na marama oqo, o luvenatagane, kei na tacina.

3. Na cava e vinaka kina meda solia ruarua na ivoladraudrau?

³ Solia Ruarua: Eda raica ena ivakaraitaki mai cake, nida sega ni kila se o cei ena wilika na noda ivoladraudrau, se na cava ena uqeti koya. (Dauv. 11:⁠6) E vinaka gona meda solia ruarua Na Vale ni Vakatawa kei na Yadra!, dina nida dau vakamacalataka ga e dua ena gauna eda solia kina. Ia ena so na ituvaki, e rawa tale ga nida solia e vica na ilavelave ena noda cakacaka vakavunau.

4. Meda navuca vakacava na siga ni noda soli ivoladraudrau?

⁴ E vinaka meda navuca e dua na siga ena dua na macawa meda soli ivoladraudrau kina. Ena ivolanivula na 2005 Calendar of Jehovah’s Witnesses, e tuvanaki kina na veisiga Vakarauwai kece me siga ni soli ivoladraudrau. Ia ni duidui na ituvaki eda sotava, e so era dau tuvanaka e so tale na siga mera soli ivoladraudrau kina. Oqo beka e tiki ni nomu ituvatuva ena veimacawa?

5. Na gauna cava soti meda soli ivoladraudrau kina? Na cava ena vukei keda meda cakava vaka kina?

⁵ Me Dua Noda iSausau: Ke tiko e dua noda isausau me baleta na levu ni ivoladraudrau meda solia ena dua na vula, eda na kauaitaka tiko ga na soli ivoladraudrau. Era tiko beka e so eda dau solia tiko vei ira na ilavelave kece ni ivoladraudrau? Eda dau soli ivoladraudrau beka ena cakacaka vakavunau? Eda dau soli ivoladraudrau beka ena salatu, ena yalava ni bisinisi, kei na vanua dau lakovi wasoma? Eda dau kauta tu na ivoladraudrau nida gade, volivoli, se nida waraka tiko e dua? Meda vakayagataka vinaka na veigauna kece meda vukei ira kina e so me yaga vei ira Na Vale ni Vakatawa kei na Yadra!

6. Eda na vakayagataka vinaka vakacava na ilavelave ni ivoladraudrau makawa?

⁶ Meda saga tale ga meda solia na ilavelave makawa ni ivoladraudrau e tu vei keda. E se yaga tiko ga na ivakamacala ena ivoladraudrau e tu vei keda e sa sivia e dua se rua na vula mai na tikinisiga e tabaki kina. Meda solia gona vei ira na tataleitaki. Na Vale ni Vakatawa kei na Yadra! e vaka na “ka sa vosataki taudonu” vei ira e milioni vakacaca na tamata. (Vkai. 25:11) Meda veisoliyaka mada ga na ivoladraudrau meda vukei ira kina e milioni vakacaca tale na tamata mera mai qaravi Jiova.