Maroroya

Na Ka me Caka Mera Toso Kina Noda Vuli iVolatabu

Na itoma oqo era biu vata kina na tikina bibi ena vica na ulutaga era sa tabaki oti ena Noda Cakacaka Vakaitalatala me baleta na ka me caka mera toso kina noda vuli iVolatabu. Oni uqeti kece mo ni maroroya na itoma oqo mo ni qai vakayagataka ena gauna ni caka vuli iVolatabu. Na veitikina bibi ena itoma oqo e rawa tale ga ni kau cake mai ena sota ni cakacaka vakavunau, o koya tale ga na ivakatawa ni cakacaka e rawa ni vakayagataka me yavutaka kina nona vosa ena gauna e sikova kina e dua na iwasewase lailai ni vulivola.

Wase 1: Na Cava na Vuli iVolatabu?

Kevaka drau dau veitalanoataka vakawasoma kei na dua na ivakavuvuli vakaivolatabu, dina ga ni lekaleka, ia o vakayagataka tiko na iVolatabu kei na ivola ni vuli e dau vakaturi meda vakayagataka, o sa caka vuli iVolatabu sara tiko ga. Ena ripotetaki na vuli kevaka sa caka vakarua, ni oti na kena vakaraitaki vua na gonevuli na ivakarau ni vuli, kevaka tale ga o kila ni sa dei na vuli oqori.​​—⁠km-FN 7/04 t. 1.

iVola Era Vakaturi

◼ Na Cava e Loma ni Kalou Vei Keda?

◼ Na Ka Mo Kila Mo Bula Tawamudu Kina

◼ Qarava na Kalou Dina

◼ E Rawa Mo iTokani ni Kalou, e rawa ni vakayagataki mera vuli kina na sega ni vuli vinaka se o ira na sega ni kila vinaka na wilivola.

Wase 2: Vakavakarau ena Veivakavulici

E vinakati me na tara na lomadra na gonevuli na noda ivakamacala. Oqo ena gadrevi kina na vakavakarau vinaka nida vakasamataki koya tiko na gonevuli.​​—⁠km-FN 8/04 t. 1.

Meda Vakavakarau Vakacava

◼ Dikeva na ulutaga, ulutaga lalai, kei na iyaloyalo ena wase se lesoni e vulici.

◼ Tovolea mo sauma na taro e tarogi, qai toqarukutaka ga na vosa kei na matavosa bibi.

◼ Digia na tikinivolatabu me wiliki ena gauna ni vuli. Vola ena yasa ni draunipepa ni ivolanivuli e so na ivakamacala leleka ni tikinivolatabu.

◼ Vakarautaka e dua na ivakamacala lekaleka me railesuvi kina na veitikina bibi.

Me Yaga Vua na Gonevuli

◼ Masulaki gonevuli kei na ka e gadreva.

◼ Tovolea mo vakasamataka na tikina ena via dredre me kila se ciqoma o gonevuli.

◼ Tarogi iko: Na cava e gadreva me kila, se me cakacaka kina me rawa ni toso vakayalo? Au na tara vakacava na lomana?

◼ Ke veiganiti, vakarautaka e dua na vosa vakatautauvata, dua na ivakamacala, se so na taro, me rawa ni kila vinaka kina o gonevuli na ibalebale ni ka e vulica tiko, se dua na tikinivolatabu.

Wase 3: Me Laulau Noda Vakayagataka na iVolatabu

Na inaki ni noda caka vuli iVolatabu oya meda ‘veivakatisaipelitaki’ mera kila na tamata na ivakavuvuli ena Vosa ni Kalou, ra ciqoma, ra qai bulataka sara. (Maciu 28:​19, 20, VV; 1 Ces. 2:​13) E bibi kina me yavutaki ga ena iVolatabu na vuli.​​—⁠km-FN 11/04 t. 4.

Veivakavulici ena Vosa ni Kalou

◼ Vakaraitaka vei gonevuli me raica na tikinivolatabu ena nona iVolatabu.

◼ Drau cega qai veivosakitaka na tikinivolatabu e vakamacalataka na yavu ni noda vakabauta.

◼ Mo taro. Mo kua ni vakamacalataka na tikinivolatabu, kerei gonevuli me vakamacalataka vei iko.

◼ Me rawarawa nomu vakamacala. Kua ni vakamacalataka na veika kece e baleta e dua na tikinivolatabu ena gauna ni vuli. Tukuna ga na kena e salavata kei na tikina e veivosakitaki tiko.

◼ Me yaga vua. Vakaraitaka vei gonevuli na sala e yaga kina vua na tikinivolatabu.

Wase 4: Tuberi Gonevuli me Vakavakarau

Na gonevuli e wilika rawa na lesoni, makataka na isaunitaro, qai vakasamataka na sala me sauma kina ena nona vosa ga, ena tubu totolo vakayalo. Ni o sa vakadeitaka ni rawa ni vakayacori wasoma na vuli, vakaraitaka sara vua na sala me vakavakarau kina. Ena veivuke sara vei ira e levu na gonevuli ke drau vakarautaka vata e dua taucoko na wase se lesoni.​​—⁠km-FN 12/04 t. 1.

Makamaka kei na Volai ni Tikina Bibi

◼ Vakaraitaka vua na sala me kunea kina na isaunitaro ena parakaravu.

◼ Vakaraitaka vei gonevuli na nomu ivolanivuli o sa vakavola tu kina na veitikina bibi se matavosa.

◼ Vakaraitaka vei gonevuli ni tikinivolatabu kece e dau lavetaki ena tokona e dua na tikina ena parakaravu, vakaraitaka tale ga se me dau vola vakacava na veitikina bibi ena yasa ni draunipepa ni nona ivolanivuli.

Raica Vakalekaleka, Railesuva Tale Ga

◼ Vakaraitaka vei gonevuli me raica vakalekaleka na ulutaga levu, ulutaga lalai, kei na iyaloyalo ni bera ni vakavakarau.

◼ Uqeti gonevuli me railesuva na veitikina bibi ni oti nona vakavakarau.

Wase 5: Vakadeitaka na Levu ni Ka me Vulici

Na levu ni ka e vulici me vakatau ena ka e rawa ni vulici kei na kedrau ituvaki o gonevuli kei qasenivuli.​​—⁠km-FN 1/05 t. 1.

Bucina na Vakabauta e Kaukaua

◼ Meda kua ni vakatotolotaka tu ga na vuli, e bibi me kila vinaka o gonevuli na ka e vulica tiko ena Vosa ni Kalou.

◼ Vakayagataka na gauna veiganiti me rawa kina ni vukei o gonevuli me kila qai ciqoma na ka e vulica tiko.

◼ Me tiko na gauna me veivosakitaki kina na tikinivolatabu bibi e yavutaki kina na ka e vulici tiko.

Tosoya Tiko ga na Vuli

◼ Ke dau matau vei gonevuli me balavu na nona vakamacalataka na veika e sotava, e vinaka me qai veivosakitaki oqori ni oti na vuli.

◼ Kua ni vakamacala vakalevu ena gauna ni vuli. Kua ni vakamacalataka vakalevu e dua na ivakaraitaki se vakasavuirogorogo ni na rawa ni vakaleqa na nona vulica o gonevuli na veika dina e yavutaki ena iVolatabu.

Wase 6: Ni Taro o Gonevuli

Ni sa toso vinaka na nona vuli iVolatabu e dua, e vinaka me vulici ga na veitaravi ni ivakavuvuli vakaivolatabu, me kua ni veiladeyaki mai na dua na ulutaga ina dua tale. Ena yavutaki vinaka kina na nona kilaka o gonevuli, ena tubu tale ga kina vakayalo.​​—⁠km-FN 2/05 t. 6.

Meda Yalomatua

◼ Na taro e salavata kei na ka e vulici tiko e rawa ni saumi ga ena gauna ni vuli.

◼ Na taro e sega ni salavata kei na ka drau vulica tiko, se gadrevi tale kina na vakekeli, e vinaka mo drau qai veivosakitaka ena dua tale na gauna. Ena veivuke sara ke volai toka na taro.

◼ Ke dredre vei gonevuli me ciqoma e dua na ivakavuvuli, raica tale e so na ikuri ni ivakamacala e vakamatatataka na ulutaga oya.

◼ Ke se sega tiko ga ni lomavakacegu o gonevuli, biuta vakatikitiki me qai veivosakitaki ena dua tale na gauna, drau tomana ga nomudrau vuli.

Meda Yalomalumalumu

◼ Ke o sega ni kila na isau ni dua na taro, kua ni tukuna na nomu nanuma ga.

◼ Vakaraitaka tiko vakamalua vei gonevuli na iwalewale ni vakekeli.

Wase 7: Na Masu ena Gauna ni Vuli

E bibi na veivakalougatataki i Jiova mera toso vinaka kina vakayalo na vuli iVolatabu. Oya na vuna e veiganiti kina me dolavi qai tini tale ga na vuli ena masu.​​—⁠km-FN 3/05 t. 6.

Tekivu ena Masu

◼ Vei ira era dau kauaitaka nodra bula vakayalo, rawa ni masu ena imatai sara ga ni gauna e caka kina na vuli.

◼ Vei ira tale e so na gonevuli de dua eda raica ni veiganiti me qai vakayacori na masu ena dua tale na gauna e muri.

◼ Rawa nida vakayagataka na Same 25:​4, 5 kei na 1 Joni 5:​14 meda vakamacalataka kina na vuna e caka kina na masu.

◼ Rawa ni vakayagataki na Joni 15:16 me vakamacalataki kina na bibi ni masu e caka vei Jiova ena vuku i Jisu Karisito.

Na Ka me Okati ena Masu

◼ E veiganiti meda vakacaucautaki Jiova na iVurevure ni ka e vulici.

◼ Vakaraitaka nida kauaitaki ira dina na gonevuli.

◼ Vakavinavinakataka na isoqosoqo e vakayagataka tiko o Jiova.

◼ Kerea vei Jiova me vakalougatataka na sasaga i gonevuli me bulataka na ka e vulica tiko.

Wase 8: Dusimaki Ira na Gonevuli ina iSoqosoqo

E sega wale ga ni noda isausau ena caka vuli iVolatabu na noda vakavulici ira na gonevuli ena ivakavuvuli vakaivolatabu, ia meda uqeti ira tale ga mera mai lewe ni ivavakoso vakarisito. Ena gauna ni vuli e veimacawa, tikica e vica na miniti mo vakamacalataka kina vei ira na gonevuli na isoqosoqo i Jiova.​​—⁠km-FN 4/05 t. 6.

Soqoni ni iVavakoso

◼ Vakamacalataka yadudua na soqoni kece. Sureti ira ina soqoni ena imatai ga ni vuli.

◼ Talanoataka vei ira na tikina bibi o vulica ena veisoqoni.

◼ Uqeti ira na gonevuli mera taleitaka na tiko ena iVakananumi, soqo ni tabacakacaka, soqo ni tikina, se na nona veisiko na ivakatawa ni tabacakacaka.

◼ Vakayagataka na iyaloyalo ena noda ivola mera raitayaloyalotaka kina na gonevuli na ka e dau caka ena soqoni.

◼ Uqeti ira mera wilika na brochure Na iVakadinadina i Jiova​​—⁠Duavata ni Vakayacora na Loma ni Kalou e Vuravura.

Vakayagataka na Vidio me Bucini Kina Nodra Tataleitaki

◼ Jehovah’s Witnesses​​—⁠The Organization Behind the Name

◼ Our Whole Association of Brothers

◼ United by Divine Teaching

◼ To the Ends of the Earth

Wase 9: Vakarautaki Ira na Gonevuli Mera Vunau Tawalokuci

Na gauna ga era vakabauta kina na noda vuli iVolatabu na ka era sa vulica tiko, ena uqeti ira sara ga mera tukuna yani na veika oya.​​—⁠km-FN 5/05 t. 1.

Uqeti Ira Mera Vunau

◼ Era tiko beka na nona itokani se o ira na lewe ni nona vuvale era rawa ni sureti mera mai veitomani tale ga ena vuli?

◼ E bau taleitaka na itukutuku vinaka e dua erau cakacaka vata, rau vuli vata, se dua tale erau veikilai?

Tuberi Ira Mera Vakamacalataka Nodra Vakabauta

◼ Ena gauna veiganiti ni vakacagau tiko na vuli tarogi gonevuli, “O na taurivaka vakacava na iVolatabu mo vakamacalataka kina na ka dina oqo vei ira na wekamu?”

◼ Vukei gonevuli me veidokai qai vakaitovo ena gauna e vakamacalataka kina na veika e baleta na Kalou kei na nona inaki.

◼ Na brochure iVakadinadina i Jiova ena iKaruasagavulu ni Senitiuri e rawa nira vakayagataka na gonevuli mera vukei ira kina nodra itokani kei na wekadra mera kila na noda vakabauta vakaivolatabu kei na noda cakacaka.

Wase 10: Vakavulici Ira na Vuli iVolatabu ena Vunau e Veivale

Nira sa vakadonuya na qase ni sa rawa vua e dua na vuli iVolatabu me dautukutuku bera ni papitaiso, sa rawa sara ga ni vakaitavi ena cakacaka vakavunau ni ivavakoso.​​—⁠km-FN 6/05 t. 1.

Drau Vakavakarau Vata

◼ Vakaraitaka vei gonevuli na vanua e rawa ni raica kina na vakatutu e dau vakaturi.

◼ Vukei koya me digia e dua na vakatutu e rawarawa qai laulau, e ganita sara ga na yalava.

◼ Uqeti koya me dau vakayagataka na iVolatabu ena cakacaka vakavunau.

◼ Drau vakatovotovo vata. Vakaraitaka vua na sala me tauca kina vakamatau nona ivakamacala ena ituvaki e dau sotavi vakalevu ena yalava.

Drau Vunau Vata

◼ Mo vakamacala e liu me raica o gonevuli na iwalewale ni nomu vakayagataka na ka drau vakarautaka mai.

◼ Vakasamataka tale ga na kena ituvaki kei na ka e rawata o gonevuli. Ena so na gauna, ena vinaka me lailai ga nona itavi o gonevuli.

◼ Tuberi ira na dautukutuku vou mera tuvana e dua na ituvatuva dei ni cakacaka vakavunau.

Wase 11: Vukei Ira na Vuli iVolatabu Mera Veisikovi Lesu

E tekivu sara ga na vakavakarau me baleta na veisikovi lesu ena imatai ni gauna eda vunau kina vei ira na itaukeinivale. Uqeti koya na gonevuli e dautukutuku vou me dau kauaitaki ira dina na tamata e vosa vei ira. Vukei koya me uqeti ira na itaukeinivale mera vosa tale ga, rogoca na ka era kaya, qai nanuma toka na ka era kauaitaka.​​—⁠km-FN 7/05 t. 1.

Vakavakarau ina Veisikovi Lesu

◼ Drau railesuva na veika e yaco ena imatai ni veitalanoa, qai vukei gonevuli me digia e dua na ulutaga ena taleitaka o itaukeinivale.

◼ Vakarautaka e dua na ivakamacala lekaleka e vakayagataki kina e dua na tikinivolatabu kei na dua na parakaravu ena ivola.

◼ Vakarautaka e dua na taro me tarogi ni sa oti na vakamacala.

Gumatua ena Veisikovi Lesu

◼ Uqeti gonevuli me dau totolo nona sikovi ira kece na tataleitaki.

◼ Vukei gonevuli me kila ni na dau siko vakavica me qai kunei ira kina e so na itaukeinivale.

◼ Vakaraitaka vei gonevuli na ivalavala ni kena lokuci na veisiko e tarava, qai vakaraitaka tale ga vua na kena bibi me lesu ena gauna e yalataka.

Wase 12: Vukei Ira na Vuli iVolatabu Mera Veivakavulici Tale Ga

E bibi gona meda vakadamurimuri Jisu ena noda ivakaraitaki vinaka ena cakacaka vakavunau. Ni raica o gonevuli na noda ivakaraitaki ena cakacaka vakavunau, ena kila ni inaki ni veisikovi lesu oya me tekivutaki kina e dua na vuli iVolatabu.​​—⁠km-FN 8/05 t. 1.

Veisureti ena Vuli iVolatabu

◼ Vakamacalataka vei gonevuli ni sega ni gadrevi meda tukuna sara vakamatailalai na veika ena caka ena vuli.

◼ E vinaka meda vakaraitaka ga vei ira na icakacaka ni vuli ena noda vakayagataka e dua se rua na parakaravu ena ivolanivuli.

◼ Railesuva qai vakatovotovotaka e dua na vakatutu mera toso kina na vuli iVolatabu.​​—⁠km-FN 8/05 t. 8; km-FN 1/02 t. 6.

Tuberi Gonevuli me Veivakavulici Tale Ga

◼ Uqeti ira na gonevuli mera curu ena Koronivuli ni Vuli Vunau.

◼ Tuvanaka vei koya na dautukutuku vou mo drau veitomani ena caka vuli iVolatabu me rawa nira vakaitavi tale ga ena veivakavulici.