Eda Veivuke Vakacava?

¹ Na taro oqo “Eda Veivuke Vakacava?” era dau taroga e levu na iVakadinadina i Jiova ena gauna era rogoca kina ni yaco e dua na leqa tubukoso ena dua na vanua. A volatukutukutaki ena Cakacaka 11:​27-​30, na nodra veivuke na lotu Vakarisito ena imatai ni senitiuri vei ira na mataveitacini e Jutia ni yaco na dausiga.

² Ena gauna oqo, sa vakadonuya na noda isoqosoqo me vakayagataki e dua na iwase ni ilavo me baleta na cakacaka ni veivuke, nodra vukei o ira na sotava na leqa tubukoso, na leqa eda vakavuna ga na tamata, kei na so tale.

³ Kena ivakaraitaki, ena yabaki sa oti e levu na tacida era cau vakailavo vei ira na vakaleqai ena ualoka mai na Ceva kei Esia. E marautaki dina na nodra soli ka mai vu ni lomadra na mataveitacini ina isoqosoqo. Ia ni cautaki vakatabakidua na ilavo me baleta e dua na leqa tubukoso, e so na vanua era vakatara ga me vakayagataki na cau oqori ina leqa e vakau yani kina na ilavo oya, me vakayagataki tale ga ena loma ga ni dua na gauna veitalia ke ra sa qarava tiko na tacida ena vanua oqori na leqa oya.

⁴ E vinaka gona me cautaki ga ina cakacaka ni vuravura raraba na ilavo e dau cautaki me baleta na leqa tubukoso kei na cakacaka ni vakacoko. Baleta na ilavo oqori e dau vakayagataki vei ira na sotava na leqa tubukoso vaka kina na kena qaravi na veika era gadreva vakayalo na mataveitacini e vuravura. Ia kevaka e vinakata e dua me cau me baleta na leqa tubukoso me ikuri ni ka e solia me baleta na cakacaka ni vuravura raraba, ena ciqomi na cau oya me qai vakayagataki ga vei ira na sotava na leqa tubukoso. Ena vinaka ga meda kua ni lavaka se mataqali leqa vakacava kei na vanua cava me vakayagataki kina na cau oya.

⁵ Ke da cau ga ina cakacaka ni vuravura raraba, na ilavo oya ena vakayagataki ena veika kece e vauca na cakacaka ni Matanitu ni Kalou, ena sega ni baleta vakatabakidua ga na leqa tubukoso. Oqo e salavata sara ga kei na ka e tukuni ena Efeso 4:​16 (VV), meda cakacaka vata me ‘tubu cake kina na yago taucoko me tara cake na loloma.’