Vakaraitaka ni O Kauai Dina ena Nomu Vakavakarau

¹ Noda vakavakarau ena cakacaka vakavunau e vakaraitaka na noda kauaitaki ira na itaukeinivale. Ena sala cava? Nida vakavakarau vinaka eda na sega kina ni kauaitaka tiko ga na ka meda tukuna, eda na kauaitaki ira na itaukeinivale. Eda na sega ni rere, ena uqeti keda tale ga meda vakamacala mai vu ni lomada. Ia eda na vakarautaka vakacava na ivakamacala e laulau?

² Vakayagataka na iWalewale e Veiganiti: Digia e dua na vakatutu mai na Noda Cakacaka Vakaitalatala, Janueri 2006 e ganita nomu yalava, qai vakasamataka na sala o na vakamacalataka kina ena nomu vosa ga. Veisautaka me ganita nomu yalava. Kena ivakaraitaki, kevaka o kila ni o na sotavi ira era lewena e dua na matalotu se dua na matatamata, vakasamataka na ivakamacala ena uqeti ira. Nomu veisautaka nomu ivakamacala me ganiti ira e vakaraitaka na nomu kauaitaki ira dina.​​—⁠1 Kor. 9:​22.

³ Tomana tiko ga nomu vakavinakataka na iwalewale o sa vakayagataka tiko. Ni dau bibi na itekitekivu ni noda vosa, saga mo raica na sala era kauaitaka kina na vakarorogo na nomu ikaunivosa. Era taleitaka beka na ulutaga o vosa kina? Era sauma beka na taro o taroga? Kevaka e sega, veiveisautaka tiko ga na nomu iwalewale me yacova ni sa yaga vei ira na vakarorogo.

⁴ iVukevuke ni Kena Nanumi: E levu e dredre mera nanuma na vakatutu era sa vakarautaka ena gauna era sa tu kina ena matanivale. Ke dau yaco oqori, o sa bau tovolea mada mo dau vakatovotovotaka vua e dua na vakatutu o sa vakarautaka tu? Oqo ena vukea mo nanuma vinaka na ka o na lai tukuna, ena rawarawa tale ga na nomu vakamacala. O na tu vakarau tale ga mo sauma na nodra vakatataro na itaukeinivale.

⁵ Dua tale na ivukevuke oya mo vola vakaleleka na ka o na lai tukuna ena dua na tikinipepa, qai raica ga vakatotolo ni bera ni o torova yani na katuba. E so era raica ni vukei ira sara ga mera lomavakacegu, e vakarawarawataka tale ga nodra veitalanoa kei ira na itaukeinivale. Na vakavakarau vinaka e vakaraitaka na noda kauaitaki ira na itaukeinivale, e vakavinakataka tale ga na iwalewale ni noda kacivaka na itukutuku vinaka.