Vakavulici Ira na Yalomalumalumu Mera Muria na Sala i Jiova
1. Na cava meda cakava meda vukei ira kina na gonevuli mera tisaipeli?
1 O ira na tisaipeli i Karisito ena imatai ni senitiuri era tukuni nira “muria tiko na Sala ni Turaga.” (Caka. 9:2, VV) E dodonu me laurai ena basoga ni nona bula taucoko e dua na lotu Vakarisito dina ni muria tiko na sala i Jiova. (Vkai. 3:5, 6) O koya gona e sega ni yala ga noda caka vuli iVolatabu ena noda vakavulica na ivakavuvuli vakaivolatabu, e bibi meda vukei ira tale ga na gonevuli mera muria tiko ga na sala i Jiova.—Same 25:8, 9.
2. Na cava ena uqeti ira na vuli iVolatabu mera muria na ivakaro ni Kalou?
2 Mera Lomani Jiova kei Jisu: E ka ni sasaga dina vei keda na tamata ivalavala ca meda veisautaka noda vakasama, itovo ni rai, ivakarau ni vosa, kei na noda imoimoi me salavata kei na loma ni Kalou! (Roma 7:21-23; Efeso 4:22-24) Ia na nodra mai lomana na Kalou kei na Luvena o ira na yalomalumalumu ena uqeti ira mera cakava na veisau vaka oqori. (Joni 14:15; 1 Joni 5:3) Eda na vukei ira vakacava noda vuli iVolatabu mera lomana na Kalou kei na Luvena?
3. Eda na uqeti ira vakacava na vuli iVolatabu mera lomani Jiova kei Jisu?
3 Tuberi gonevuli me kila se Kalou vakacava o Jiova. A vakamacalataka e dua na tacida, “E sega ni dua e rawa ni lomana e dua e sega ni kila, au saga kina ena imatai ni vuli meu vakavulica vei noqu gonevuli na yaca ni Kalou ena iVolatabu, au qara tale ga na sala meu vakavulica kina vua na itovo i Jiova.” Eda rawa tale ga ni cakava oqo ena noda dau kauta cake mai na ivakaraitaki i Jisu. (Joni 1:14; 14:9) Rawa nida vakayagataka tale ga na kato ni railesuvi ni cava na wase yadua ni ivola Kaya na iVolatabu, meda uqeti ira kina na gonevuli mera vakasamataka na nodrau itovo vakasakiti na Kalou kei na Luvena.
4. (a) Na cava e dau dredre kina vei ira e levu na gonevuli mera vunau? (b) Eda na vukei ira vakacava na gonevuli ena imatai ni gauna era cakacaka vakavunau kina?
4 Bibi Noda iVakaraitaki: Nida veivakavulici, e bibi na noda ivakaraitaki vei ira na gonevuli ni rawa nira vulica kina na ibalebale ni kena muri na sala i Jiova. (1 Kor. 11:1) Kena ivakaraitaki, e sega ni matau vei ira e levu na vuli iVolatabu mera vosa vei ira era sega ni veikilai mera vakamacalataka na nodra vakabauta. Ena gadrevi gona vei keda na yalovosovoso kei na kila meda vukei ira mera bucina na loloma, vakabauta, kei na yalodoudou me rawa kina nira vakaitavi ena cakacaka vakavunau kei na veivakavulici. (2 Kor. 4:13; 1 Ces. 2:2) Ke da gadreva dina meda tuberi ira vinaka na gonevuli, ena uqeti keda oqori meda tokoni ira ena imatai ni gauna era cakacaka vakavunau kina.
5. Ena vukei ira vakacava na gonevuli na noda ivakaraitaki mera raica kina na veika e okati ena kena muri na ivakaro ni Kalou?
5 Noda ivakaraitaki tale ga e rawa nira vulica kina na gonevuli na ivakarau ni bula ni dua na lotu Vakarisito. Nida sikovi ira na tauvimate, se nida vakabula vei ira na mataveitacini ena loma ni ivavakoso, era na raica sara tiko ga na gonevuli na noda bulataka na loloma dina vakarisito. (Joni 15:12) Nida vakaitavi ena samaki ni Kingdom Hall se nida cakava e so tale na ka meda veivuke kina, eda sa vakavulici ira tiko mera dau veiqaravi. (Joni 13:12-15) Nira raica nida sega ni vakabibitaka na veika vakayago ena noda bula, era na kila kina na ibalebale ni noda ‘vakasaqara taumada na Matanitu ni Kalou.’—Maciu 6:33.
6. Na cava eda vakila nida vukei ira na yalomalumalumu mera mai qaravi Jiova?
6 Na cakacaka ni veivakavulici ena Vosa ni Kalou, vaka kina na nodra vukei e so tale mera tisaipeli e sega ni cakacaka rawarawa. Ia e cakacaka marautaki dina nida raici ira na yalomalumalumu nira “muria tiko ga na dina”!—3 Joni 4.