Vakaraitaka ni O Kauai Dina ena Nomu Yalovinaka
1 “E dau yalovinaka o Jiova.” (Same 145:8, NW) Dina ga ni Turaga Cecere ni lomalagi kei vuravura, ia e dau yalololoma, veinanumi, qai dau veirokovi ena gauna e veitaratara kina kei keda na tamata ivalavala ca. (Vkte. 13:14; 19:18-21, 29) E rawa ni taleitaki na noda vunautaka na itukutuku vinaka ke da vakatotomuria na Kalou ena nona yalovinaka. (Kolo. 4:6) E bibi e ke na noda dau vosa vakayalovinaka kei na veidokai, ia e so tale na ka e okati kina.
2 E Veivale: Vakacava ke da gole yani ena dua na vale eratou qai osooso tu na itaukeinivale, se ratou kana tiko beka? Nida sotava na ituvaki vaka oqori, e dodonu meda veinanumi ena noda saga me lekaleka ga na noda ivakamacala, se rawa nida kaya nida na lesuvi ira tale ena dua na gauna veiganiti. Ke ra sa sega ni taleitaka na noda ivola, meda kua ni usuraka vei ira. Ke da vakaitikotiko ena taoni eda na veinanumi ena noda sogota vakamalua na bai se katuba, e bibi tale ga meda na vakavulici ira kina na luveda. Meda ciqimaka vinaka na noda ivolacebaceba ena katuba, me kua ni laurai tu mai e tuba. E macala gona ni noda yalovinaka kei na noda veinanumi ena uqeti keda meda cakava na ka eda vinakata me na caka vei keda.—Luke 6:31.
3 E Salatu: Nida cakacaka vakavunau ena salatu, eda na vakaraitaka noda veinanumi nida sega ni vakaosooso vei ira na tavali ena salatu, eda na sega tale ga ni vakasosoqoni tu ena matanisitoa, se na vanua ni bisinisi. Ke da veinanumi, eda na kauaitaka na kedra ituvaki o ira eda vosa vei ira, eda na vosa ga vakalekaleka ke da kila nira vakatotolo tiko se ra osooso. Kevaka e kosakosa na vanua eda cakacaka vakavunau tiko kina meda vosa toka vakalailai e cake, ia meda qarauna ga meda kua ni raici kina vakatani.—Maciu 12:19.
4 Vunau ena Talevoni: Nida veinanumi eda na vunau ena talevoni ena vanua e sega ni dau levu kina na maue. Na noda vakamacalataki keda da qai tukuna na inaki ni noda qiri e vakaraitaka nida vakaitovo. Ena vakarawarawataka tale ga na nodra rogoca na noda ivakamacala ena iVolatabu kevaka eda vosa vakavinaka ena talevoni, e rogo vinaka tale ga na itautau ni noda vosa. (1 Kor. 14:8, 9) Na noda yalololoma kei na noda veinanumi ena tikina oqo eda sa vakatotomuria tiko kina na Kalou yalovinaka o Jiova.