Vakaraitaka ni O Kauai Dina ena Nomu Sega ni Veivakaduiduitaki
1 A raivotutaka na yapositolo o Joni e dua na agilosi e vuka voli ena maliwa ni lomalagi kei vuravura, qai vunautaka tiko na itukutuku vinaka vei ira “kece ga na veimatanitu kei na veiyavusa, kei na veimataqali vosa kei na veimataqali tamata.” (Vkta. 14:6, VV) Eda na vakatotomuri koya beka na agilosi oqo ena noda sega ni veivakaduiduitaki nida vunau? De dua eda sega ni kila ni tiko vei keda na rai cala me baleti ira na duikaikai. Ia, ke sega ni vinaka na noda rai era na rawa ni vakila oqo nida vosa tiko vei ira ena cakacaka vakavunau. O koya gona, e bibi meda vakaraitaka na noda kauai dina nida vunau vei ira.
2 Ena Noda Yalava: Era tu beka e so na duikaikai ena noda yalava? De dua eda sega ni kauaitaki ira soti. Ia meda saga sara ga meda vosa vei ira, meda qai kilai ira vakavinaka. Na cava beka era dau gadreva, kauaitaka, taleitaka se besetaka, kei na veika era dau nuiqawaqawataka. Saga meda veisautaka na iwalewale ni noda vakamacalataka na itukutuku vinaka me ganiti ira. (1 Kor. 9:19-23) Me vakataki koya ga na yapositolo o Paula, meda raica ni noda itavi sara ga meda wasea na itukutuku vinaka vei ira kece na tiko ena yalava, okati kina o ira na lako mai vanuatani, o ira e duidui nodra isususu, o ira era vosataka e duatani na vosa, vaka kina o ira na vutuniyau.—Roma 1:14.
3 Eda na vunau vakacava vei ira e duatani nodra vosa? Vakayagataka na ivola lailai na Good News for People of All Nations. Rawa nida kauta tale tiko ga na ivolacebaceba se brochure ena vosa era vosataki vakalevu ena noda yalava. (Raica na Noda Cakacaka Vakaitalatala, Julai 2003, t. 4, p. 2-3.) E so na dautukutuku era vulica na vosa ni veikidavaki ni dua tale na vosa, vaka kina e dua na ivakamacala rawarawa ga. E dau tarai ira e so na itaukeinivale nira raica na noda sasaga meda vunau vei ira ena nodra vosa sara ga, dina ni sega ni taladrodro sara beka na noda ivakamacala. Dina nida sega beka ni kila vakavinaka na nodra vosa, ia na noda saga meda vosataka e rawa sara ga ni uqeti ira mera rogoca na itukutuku vinaka eda kacivaka.
4 Vakatotomuri Jiova: Na noda vosa vei ira na duikaikai eda sa vakatotomuria tiko kina na Kalou sega ni dauveivakaduiduitaki o Jiova, ni “vinakata me bula na tamata kecega, ka mai kila sara nai vakavuvuli dina.”—1 Tim. 2:3, 4.