Na Cava O Dau Vakaliuca?

¹ Eda na sauma vakacava na taro oqo? Io, eda vinakata kece meda vakaliuca na Matanitu ni Kalou. (Maciu 6:​33) Ia, de vinaka mo tarogi iko mada, ‘E laurai beka ena veika au vakatulewataka niu vakaliuca na Matanitu ni Kalou?’ Sa rauta me uqeti keda vaka oqo na iVolatabu: “Ni dikevi kemuni mada.” (2 Kor. 13:​5, VV) Na sala cava gona e rawa nida dikevi keda kina meda vakadeitaka nida sa vakaliuca tiko na Matanitu ni Kalou?

² Noda Vakayagataki Gauna: Meda tekivu sara ga ena noda dikeva na sala eda dau vakayagataka kina na noda gauna. (Efeso 5:​15, 16) Vakacava na levu ni gauna e veimacawa e kania na noda dau veigadivi, sara retioyaloyalo, vakayagataka na Internet, se vakaogai keda ena so na ka eda dau taleitaka? Kevaka eda vola na levu ni gauna eda vakayagataka ena veika oqori, da qai veidutaitaka kei na levu ni gauna eda vakaogai keda kina ena veika vakayalo, de dua eda na kurabuitaka na ka eda raica. Ena noda cakacaka saumi, eda dau cakacaka tale tiko beka ni sa gauna ni suka, da tini calata kina na soqoni, ena noda vinakata ga me levu na noda ilavo meda volia kina na veika eda galeleta? Dau wasoma beka noda calata na soqoni kei na cakacaka vakavunau, nida sa vakaliuca ga noda lako vagade ena muanimacawa?

³ Vakaliuci na Ka e Bibi: Levu vei keda, e lailai ga na gauna meda cakava kina na ka e tu me caka. Kevaka gona meda vakaliuca na Matanitu ni Kalou, e dodonu meda vakalewa se cava na ka e bibi vei keda, da qai tuvana noda gauna me baleta na “veika e uasivi sara.” (Fpai. 1:​10, VV) Macala ga ni oqo e okati kina na vulici ni Vosa ni Kalou, cakacaka vakavunau, qaravi vinaka ni vuvale, kei na tiko ena soqoni. (Same 1:​1, 2; Roma 10:​13, 14; 1 Tim. 5:8; Iper. 10:​24, 25) E yaga tale ga e so na ka me vaka na caka vakarauta ni vakaukauayago, kei na veivakalasai e rakorako. (Mari. 6:​31; 1 Tim. 4:⁠8) Ia, na veika oqo e sega soti ni bibi, me kua gona nida laiva me vakalatilati ina “veika e uasivi sara,” oya na veika vakayalo.

⁴ E dua na tacida tagane gone e vinakata me vakaliuca na Matanitu ni Kalou, a tekivu sara me cakacaka vakaitalatala vakatabakidua, a sega gona ni vakaliuca na vuli torocake me na rawata kina e dua nona cakacaka isau vinaka. A vulica e dua tale na vosa, qai toki me lai veiqaravi ena dua na vanua e gadrevi tu kina vakalevu na veivuke. E kaya: “Au sega ni tukuna rawa na levu ni noqu marautaka na noqu cakacaka e ke. Sa veivakacegui dina na cakacaka vakavunau! Au diva ga mera bau cakava tale ga na cakacaka oqo na itabagone kece, mera vakila kina na ka au vakila tu oqo. E sega tale ni dua na ka e uasivita na noda vakayagataka na veika kece e tu vei keda meda qaravi Jiova kina.” Io, eda na vakalougatataki dina nida vakaliuca na Matanitu ni Kalou, ia na kena e bibi duadua ni na vakamarautaka na Tamada vakalomalagi, o Jiova.​​—⁠Iper. 6:​10.