iVola na Revelation —Its Grand Climax At Hand!
1 “Sa kalougata ko koya sa wilika, kei ira era sa rogoca na vosa ni parofisai oqo, ka vakabauta na ka sa volai kina; ni sa voleka na kena gauna.” (Vkta. 1:3) Na vosa oqo e vakaraitaka na bibi ni ivola na Vakatakila, vakauasivi nida sa bula tu oqo ena gauna me na vakayacori kina e levu na ka e parofisaitaki tu kina. Oya na vuna e veiganiti kina na noda vulica tale na ivola Revelation—Its Grand Climax At Hand! ena Vulivola ni iVavakoso, me tekivu ena macawa ni 8 Janueri, 2007.
2 Ena iotioti ni gauna eda vulica vata kina na ivola oqo ena Vulivola ni iVavakoso, sa veisau sara vakalevu na veika e yaco tu e vuravura. (1 Kor. 7:31) O ira tale ga na ka vou era sa mai veitomani ena kacivaki ni itukutuku vinaka ni Matanitu ni Kalou, era se bera ni vulica ena Vulivola ni iVavakoso na ivola oqo. Na noda na vulica vata tale e dodonu me uqeti keda meda yadrava tiko na veika lelevu e sa na vakarau yaco.—Vkta. 16:15.
3 Me noda isausau meda kua sara ga ni calata e dua na vuli ena veimacawa. Na vuli oqo ena sega wale ga ni uqeti keda meda yadra tiko, ena vukei keda tale ga na itukutuku i Jisu vei ira na vitu na ivavakoso meda kua ni cakava na veika e rawa ni vakaleqai keda vakayalo, se tarova noda cakacaka vakavunau.—Vkta. 1:11, 19.
4 Vakavakarau Vinaka: Ni bera na vulivola, wilika na tikina ena vulici tiko ena Vakatakila. Wilika na kena ivakamacala ena ivola. Meda saga meda kila na uto ni ka e vulici tiko. (Niem. 8:8, 12) Vakatikitikitaka na gauna meda vakasama kina vakatitobu, da qai taroga: ‘Na cava e tukuni e ke me baleti Jiova kei na vakayacori ni nona inaki? Au na vakayacora vakacava na veika e salavata kei na nona inaki, meu qai vukei ira tale kina e so?’
5 Sa oti oqo e 92 na yabaki mai na gauna a tekivu kina “na siga ni Turaga” ena 1914. (Vkta. 1:10) Na gauna vakairogorogo e tukuni tu ena Vakatakila sa voleka sara ga ni yaco. Na vulici gona ni ivola oqo ena vakabulabulataka na lomada kei na noda vakasama, ena vakaukauataka tale ga noda vakabauta ni sa voleka ni yaco “nai valu ni siga dina ko ya ni Kalou Kaukauwa” vaka kina na vuravura vou.—Vkta. 16:14; 21:4, 5.